مال ۇرلىعى ءۇشىن قانداي جازا قولدانىلادى

نۇر-سۇلتان. قازاقپارات - كريمينالدىق پوليتسيا دەپارتامەنتىنىڭ باستىعى، پوليتسيا پولكوۆنيگى دۋمان تايەۆ مال ۇرلىعىن ازايتۋ بويىنشا اتقارىلعان جۇمىستاردى باياندادى، دەپ حابارلايدى قازاقپارات ءتىلشىسى.

«مينيسترلىكتىڭ باستاماسىمەن قىلمىستىق زاڭناماعا «قىلمىستى بىرنەشە رەت جاساعانى ءۇشىن» جانە «ءۇي- جايعا زاڭسىز كىرگەنى ءۇشىن» قىلمىستىق جاۋاپتى كۇشەيتۋ بويىنشا وزگەرىستەر ەنگىزىلدى. اتالعان بەلگىلەردى اۋىر قىلمىس قاتارىنا اۋىستىرۋ ارقىلى كۇدىكتىلەر ىمىراعا كەلۋ جولىمەن جازادان سىتىلىپ كەتە المايدى، بۇل ۇرلىق سانىن %51,6 عا (108718-دەن 52602-گە دەيىن) تومەندەتۋگە مۇمكىندىك بەردى»، - دەدى د. تايەۆ مينيستردىك ۇيىمداستىرعان ونلاين بريفينگتە.

ونىڭ ايتۋىنشا، مال شارۋاشىلىعى ادامداردىڭ ءومىرى مەن رەسپۋبليكا ەكونوميكاسىندا باسىم باعىتتاردىڭ ءبىرى جانە اۋىل حالقى ءۇشىن ەڭ باستى قىزمەت ءتۇرى بولىپ وتىر. وسىعان بايلانىستى، مال ۇرلىعى ەلدەگى ەڭ ءجيى جاسالاتىن قىلمىس سانالادى.

«ءى ءى م باستاماسىمەن بيىل اقپان ايىنان باستاپ قىلمىستىق كودەكسكە 188-1 «مال ۇرلىعى» بابى ەنگىزىلگەنىن اتاپ وتكەن ءجون. وندا 12 جىلعا دەيىن باس بوستاندىعىنان ايىرۋ جانە مۇلكىن تاركىلەۋ تۇرىندەگى ەڭ جوعارعى جازا كوزدەلگەن. بۇل باپتىڭ ۇرلىقتان باستى ايىرماشىلىعى - قاتاڭ جاۋاپكەرشىلىك. ماسەلەن جىل باسىنان بەرى مال ۇرلىعى ءۇشىن 350 كۇدىكتى ادام ۇستالىپ، قاماۋعا الىندى، بۇل رەتتە %77 (270) قاتىستى «قاماۋدا ۇستاۋ» بۇلتارتپاۋ شاراسى تاڭدالدى. بۇرىن بۇل كورسەتكىش %30 پايىزدان اسپايتىن»، - دەيدى دەپارتامەنت باسشىسى.

ايتا كەتەيىك، وتكەن اپتادا قازاقستاندا 251 مال ۇرلىعى انىقتالىپ، 229 ادام ۇستالدى.