ادەمى قارتايۋ دا ءبىر باقىت

None
None
نۇر-سۇلتان. قازاقپارات - ەكى جارىم جىل بۇرىن الماتى قالاسىندا زەينەت جاسىنداعى ادامدارعا ارنالعان «ۇزاق جاساۋ ورتالىعى» اشىلدى.

بۇگىنگى تاڭدا اتالمىش ورتالىققا ادەمى قارتايعىسى كەلەتىن ءۇش مىڭنان اسا اتا-اپالارىمىز بارىپ ءجۇر ەكەن.

اتى ايتىپ تۇرعانداي «ۇزاق جاساۋ ورتالىعىن» اشۋداعى ماقسات - زەينەتكەر، الايدا ءومىر سۇرۋگە قۇشتار، سپورتتى سۇيەتىن، سالاۋاتتى ءومىر سالتىن سەرىك ەتكەن، جاڭاشىلدىققا بەيىم جانداردى قولداۋ. ورتالىقتاعى اكىمشىلىك قىزمەتكەرى ايگۇل تۇرار قىزىنىڭ ايتۋىنشا، مۇندا سپورت جانە شىعارماشىلىق كلۋبتار سونداي- اق قاريالارعا ءبىلىم بەرۋ كۋرستارى بار. ءبارى تەگىن. اتاپ ايتار بولساق، يوگا، ايكۇنە، سكانديناۆ ءجۇرىسى، شاحمات سەكىلدى وزگە دە كوپتەگەن دەنساۋلىق پەن اعزاعا پايدالى كۋرس تۇرلەرى جۇمىس ىستەيدى. ءتىپتى قارتتارعا سمارتفون پايدالانۋدى ۇيرەتەتىن دە كۋرس بار ەكەن. وندا ۇلكەن كىسىلەر «Egov « ارقىلى ونلاين قىزمەت الۋدى سونداي-اق «دامۋ مەد» سەكىلدى قوسىمشانى دۇرىس پايدالانىپ، دارىگەردىڭ قابىلداۋىنا ونلاين جازىلۋ، مەديتسينالىق انىقتاما الۋ، ساراپتاما ناتيجەلەرىمەن تانىسۋ سەكىلدى قىزمەت تۇرلەرىن ۇيرەنەدى. ال، شىعارماشىلىق باعىتتاعى كۋرستاردا اتا- اپالارىمىز قولونەر شەبەرلىگىمەن قاتار سۋرەت سالۋعا قولدارىن جاتتىقتىرىپ، ءتۇرلى بۇيىمدار جاساۋدى ۇيرەنىپ ءجۇر.


ەكسپەريمەنت رەتىندە اشىلعان پيلوتتىق جوبا بىردەن الماتىلىق زەينەتكەرلەردىڭ كوڭىلىنەن شىعىپ، تىلەگى مەن جۇرەگى ءبىر، سالاۋاتتى ءومىر سالتىن ۇستاناتىن ىنتازار جانداردىڭ باسىن قوساتىن ۇلكەن الاڭعا اينالدى. ءتىپتى شاھاردا ءدال وسىنداي ەكىنشى ورتالىق اشىلىپ، كەلەم دەۋشىلەر قاتارى ارتقان.

«ۇزاق جاساۋ ورتالىعىنىڭ» مەكەن- جايى الماتى قالاسى، جەلتوقسان كوشەسى 29-ۇيدە ورنالاسقان. بايلانىس تەلەفونى: 87272780015

وسى ورتالىققا باراتىن زەينەتكەرلەردىڭ اراسىندا جاسى ۇلكەن قاريالارىمىزدىڭ ءبىرى - سوفيا شاميكۋلوۆا اپامىز ەكەن. جاسى 90 نان اسسا دا بي ساباعى مەن ايكۇنە سپورت ۇيىرمەسىن جىبەرمەي قاتىسادى. قانشاما زامانداستارىنا ۇلگى بولىپ جۇرگەن اپامىز ءسانى مەن سىمباتىنا دا قاتتى ءمان بەرەدى. دۇرىس تاماقتانۋدى سەرىك ەتىپ، دەنساۋلىعىن بارىنشا كۇتەدى.


زەينەت جاسىنداعى ادامدار ءۇشىن سالاۋتتى ءومىر سالتىن ۇستانۋ - دەنساۋلىق كەپىلى. قازاقىلىق تانىمعا سالىپ، «مەن قارتايدىم، زەينەتكە شىقتىم ەندى نەمەرە باعامىن» نەمەسە «قارتايعاندا بىزگە نە كەرەك؟»، «اياعىم قاقاسايدى، بەلىم اۋىرادى» دەپ وزدەرىن ىسىرىپ قويىپ، ويشا اۋرۋ تىلەپ، مورالدىق تۇرعىدا وزدەرىن ەشكىمگە كەرەكسىز سەزىنبەي، قايتا وسىنداي ورتالىقتار ارقىلى ءوزىن وزگە قىرىنان تانىپ، ومىرگە دەگەن قۇشتارلىعى ارتا تۇسكەن جاندار قانشاما؟!

سولاردىڭ ءبىرى - تاتيانا كاريموۆا

تاتيانا يۆانوۆنانىڭ جاسى 78 دە. اپتانىڭ دەمالىس كۇندەرى مىندەتتى تۇردە ءداستۇردى بۇزباي قۇربىلارىمەن بىرگە تاۋعا شىعۋدى ادەتكە اينالدىرعان. كۇندەلىكتى كۇيبىڭ تىرلىكتەن ءبىر ءسات دەمالىپ، تازا ساف اۋامەن تىنىستاپ، ءارى جاياۋ ءجۇرۋ ارقىلى دەنەنى شىنىقتىرادى. اسىرەسە جازدا ەمدىك قاسيەتى بار، دەنساۋلىققا پايدالى شوپتەر مەن جيدەكتەر تەرىپ قايتۋدى جانى سۇيەدى. بۇل ءارى تاتيانا اپامىز ءۇشىن قۇربىلارىمەن اڭگىمە- دۇكەن قۇرىپ، جاقىنىراق ارالاسۋدىڭ تاپتىرماس ءادىسى.


دۇنيەجۇزىلىك دەنساۋلىق ساقتاۋ قورىنىڭ مالىمەتىنشە

سالاۋاتتى ءومىر سالتىن سەرىك ەتكەن بەلسەندى قارتتاردىڭ جۇرەك قان- تامىر، تىنىس الۋ، بۇلشىق ەت جۇيەسىنىڭ فۋنكتسيانالدىق دەڭگەيى از قوزعالاتىن، سپورتقا قىزىقپايتىن قۇرداستارىنا قاراعاندا الدەقايدا جوعارى بولادى.

ولاردىڭ سۇيەك قۇرىلىسى الدەقايدا مىقتى، سالماقتارى دۇرىس، دەنە ءبىتىمى ادەمى بولىپ كەلەدى.

سپورتتى جاقسى كورەتىن زەينەتكەرلەردىڭ ەستە ساقتاۋ قابىلەتى كۇشتى، ويلاۋ قابىلەتى شاپشاڭ وزگە دە كوگنيتيۆتى فۋنكتسيالارى مىقتى كەلەدى.

سونداي- اق، فيزيكالىق تۇرعىدا بەلسەندى قارتتاردىڭ ءولىم كورسەتكىشى الدەقايدا تومەن. اسىرەسە، جۇرەك اۋرۋى، قان قىسىمىنىڭ كوتەرىلۋى، ينسۋلت، ديابەت، توق ىشەكتىڭ وبىرى، ءسۇت بەزىنىڭ وبىرى سەكىلدى سىرقاتتار سيرەك كەزدەسۋى مۇمكىن.

عاليدوللا بەكقۋجيەۆ، 80 جاستا

جاس كۇنىمدە كوپ جۇمىس ىستەدىم، ءوزىم قىزىعاتىن سپورت تۇرلەرىمەن شۇعىلداناتىن ۋاقىت تاپشى بولدى. الايدا، زەينەتكە شىعا سالا جۇگىرۋدى قولعا الدىم. قورشاعان ورتانى ايالاۋ، جانۋارلارعا قامقورلىق كورسەتۋدى جانىم سۇيەدى. ءوزىمنىڭ شاعىن زووباعىمدا توتىقۇس، تىشقان، قويان، تاسباقا، ۇلۋ، شوتلانديالىق مىسىق، انگورا تۇقىمداس مىسىق بار. ءار تاڭىمدى دەنەنى سوزۋ جاتتىعۋلارىنان باستايمىن. جازدا جۇزۋمەن شۇعىلدانامىن، ۆەلوسيپەد تەبەمىن. ال، قىستا كونكي تەۋىپ، اتقا مىنگەندى، شاڭعى تەبۋدى جاقسى كورەمىن. بۇدان وزگە مەندە قىستا قار تازالاۋ، جازدا باقشا سۋارۋ، ونى باپتاپ- كۇتۋ سىندى سۇيىكتى ءىسىم تاعى بار. ولاي دەيتىنىم، بارلىق بۇلشىق ەت ىسكە قوسىلىپ، دەنە شىنىعادى. سپورت ەمەي نەمەنە؟

بىرنەشە جىل بۇرىن جاڭا ءۇي سالۋدى باستاپ، % 50 جۇمىسىن ءوز قولىممەن تىندىرعانمىن. جانە ءبىر ماڭىزدى اتاپ ايتارلىعى الكوگول ىشىمدىكتەرىنە اۋەستىگىم جوق، شىلىم شەكپەيمىن. بىلەسىز بە، جىل وتكەن سايىن وتە بەلسەندى بولا باستاعانىمدى اڭعارامىن. قوزعالعان سايىن ءوزىمدى جەڭىل سەزىنەمىن. كوڭىل- كۇيىم دە كەرەمەت، ۇيقىم دا قانىق. كوپ جىلدار بويى اۋرۋ دەگەننىڭ نە ەكەنىن ۇمىتتىق (تفۋ-تفۋ)، ءدارى دەگەندى دە بىلمەيمىن. بەس بالام بار، نەمەرە، شوبەرەلەرىم بار. ەڭ ۇلكەن شوبەرەمنىڭ جاسى 13 دە بولسا، كەنجەسى 2 جاستا. مەملەكەت تاراپىنان زەينەت جاسىنداعى ادامدارعا قولداۋ كورسەتۋ - وتە دۇرىس قادام دەپ ەسەپتەيمىن. ءدال وسىنداي ورتالىقتار ەلىمىزدىڭ وزگە قالالارىندا دا اشىلسا يگى بولار ەدى. سارىاعاش، بۋراباي سىندى تابيعاتى تامىلجىعان جەرلەردەگى ەمدەۋ- ساۋىقتىرۋ ساناتورييلەرىنە تاعى بارۋدى جوسپارلاپ ءجۇرمىن.

دارىگەرلەردىڭ پايىمىنشا، دەنەدەگى بۇلشىق ەت ماسساسى ازايعان سايىن، قارتتار وزدەرىن ءالسىز سەزىنەدى. بۇل جەردە جاس كورسەتكىشىنىڭ تۇك قاتىسى جوق. قايتا جاس ۇلعايعان سايىن بۇلشىق ەتتى نىعايتۋعا تىرىسۋ كەرەك.


جاياۋ سەرۋەن - جاسى ۇلعايعان جاندار ءۇشىن تاپتىرماس سپورت.

جاياۋ ءجۇرۋ مەن دۇرىس تىنىسالۋ ورگانيزمدى كيسلورودپەن تولتىرادى.

رەسمي دەرەككە سەنسەك، قازىر جەر شارىندا ءومىر سۇرەتىن ادامداردىڭ %2,5 ى 75 جاستان اسقان قارتتار

كۇلىمحان بورىقبايەۆا، 63 جاستا

دەنە- ءبىتىمىمدى ءبىر قالىپتا ۇستاۋ ءۇشىن فۋتبول وينايمىن. 27 جىل بۇرىن كۇيەۋلەرىمىزدىڭ كەزەكتى ماتچىنان كەيىن، ايەلدەر قاۋىمى دا دوپ تەۋىپ كورۋدى ءجون كوردىك. بىزگە بىردەن ۇناپ قالدى. وسىلايشا فۋتبولعا قىزىعۋشىلىعىمىز ويانىپ، قالايشا كىرىسىپ كەتكەنىمىزدى اڭعارماي قالدىق. كوماندامىزدا جاسى 70 بولسا دا جاستاردان كەم جۇگىرمەيتىن ويىنشىلارىمىز بار. فۋتبول بۇلشىقەتتىڭ جۇمىسىن قىزدىرىپ، قان اينالىمىن جاقسارتاتىن سپورت تۇرلەرىنىڭ ءبىرى دەپ بىلەمىن. دوپ تەۋىپ جۇرگەنىمىزگە 30 جىلدان استى، ءوزىمىزدى جەڭىل ءارى كۇشتى، جاس سەزىنەمىز. ەڭ باستىسى ادەمى ءارى دەنىمىزدىڭ ساۋ ەكەنىن جان- تانىڭمەن سەزىنۋ - عاجاپ سەزىم. ءاربىر ماتچتان كەيىن بىزگە بۋعا قىزدىرىنۋ ءۇشىن مونشاعا بارامىز، ازىلدەسىپ ءشاي ىشەمىز. فۋتبولدىڭ ءبىزدى بىرىكتىرگەنى سونشالىق، ءبىر وتباسىنداي بولىپ كەتتىك. قانداي دا ءبىر قيىندىق تۋسا، ءبىر- بىرىمىزگە قول ۇشىن سوزىپ، كومەكتەسۋگە دايىن تۇرامىز. وتباسىلىق مەرەكەلەردە ءبىر- بىرىمىزگە بارىپ، ارالاسىپ، كاراوكەدە بىرگە ءان شىرقاۋدى ۇناتامىز.


بەكتىباي ساۋرانبايەۆ، 77 جاستا

مەن كۇن سايىن جاياۋ سەرۋەندەپ، شاحمات ويناعاندى ۇناتامىن. ناعىز كاسىبي جۇرگىزۋشى بولسام دا، قالا ىشىندە جاياۋ جۇرگەندى جانىم سۇيەدى. بالا كۇنىمدە تاۋعا شىعۋدى، شاڭعى مەن كونكي تەبۋدى جاقسى كورۋشى ەدىم. 60 -جىلداردان باستاپ سپورتپەن شۇعىلدانا باستادىم. ول ۋاقىتتا شاھاردا نەشە ءتۇرلى سپورت كلۋبتارى جۇمىس ىستەيدى. مەن ۆولەيبول وينادىم. 1961 -جىلى قالا بويىنشا ءبىزدىڭ كوماندا چەمپيون اتانعانى بار. ال، شاحمات ويناۋدى ءوز بەتىمشە ۇيرەنىپ الدىم. قازىر شاحمات ويناۋ ءۇشىن كۇندە ساياباققا بارام. جاس كورسەتكىش ەشقاشان كەدەرگى بولمايدى. ازارت بارشاعا ورتاق سەزىم. مۇندا كارىسى دە جاسى دا جينالىپ، ويناي بەرەدى.

نادەجدا ستەپانوۆا، 60 جاستا

باستى ۇستانىمىم - «ءومىردى ءسۇيۋ جانە باعالاۋ»، «قۋانىش پەن كۇلكى - ءومىردىڭ جەتىستىگى»، «قوزعالىس - ءومىر». سالاۋاتتى ءومىر سالتىن جاقسى كورەمىن. سەرگىتۋ جاتتىعۋلارىن جاسايمىن. كوبىرەك جاياۋ سەرۋەندەگەندى، بيلەگەندى جانىم سۇيەدى. كۇن ۇزاق تازا سۋ ءىشىپ جۇرگەندى قۇپ كورەمىن جانە تاماقتى تويىپ جەمەيمىن. تاماق ىشكىم كەلگەن ساتتە عانا اۋقاتتانامىن. مەنىڭ راتسيونىمدا جاسىل ءشوپ پەن كوكەنىس سونداي-اق جەمىس- جيدەك كوپ. 50 جاسقا كەلگەندە كونكيي مەن روليك تەبۋدى ۇيرەندىم. ال، 60 جاسىمدا شاڭعى تەبۋدى مەڭگەردىم.

كۇلزادا يگىبايەۆا ، 70 جاستا

سپورتپەن بەلسەندى تۇردە شۇعىلدانۋدى بىلتىر جازدا قولعا الدىم. قالا اكىمىنىڭ باستاماسىمەن اشىلعان «ۇزاق جاساۋ ورتالىعىنا» بارعان كۇننەن باستاپ، سپورت مەنىڭ اينىماس سەرىگىمە اينالدى. يوگا، قازاق گيمناستيكاسى ايكۇنە، سكانديناۆ جۇرىسىمەن اينالىستىم. سپورتتىڭ بۇل تۇرلەرى بۇلشىق ەت جۇيەسىن نىعايتىپ، دەنەنى شىنىقتىرادى. ناتيجەسىندە مەندەگى 26 % ماي ماسساسى بۇلشىق ەتكە اينالدى، وتە قۋانىشتىمىن. قازىر دە يوگاعا بارام، ايكۇنە جاتتىعۋلارىن جاسايمىن، ۇيدە سكانديناۆ جۇرىسىمەن شۇعىلدانىپ، ءۇش جىل بويى جۇزۋمەن اينالىسىپ ءجۇرمىن. جانە مۇمكىندىگىمە قاراي ديەتا ۇستاعاندى ۇناتامىن. ۇلكەن كىسىلەرگە ارنالعان ءدال وسىنداي ورتالىقتار الماتى قالاسىنىڭ ءار بۇرىشىندا اشىلسا عوي دەگەن تىلەگىم بار. سەبەبى جىلىنا تەك ءبىر اي عانا بارۋعا رۇقسات بەرەدى. جىل ون ەكى اي باراتىنداي مۇمكىندىك بولسا نۇر ۇستىنە نۇر بولار ەدى.

ەلوردادا 2017 -جىلدان بەرى زەينەت جاسىنداعى قاريالارعا ارنالعان «ارداگەر» ورتالىعى جۇمىس ىستەيدى. زەينەتكەرلەر بۇل ورتالىقتى قازاق جانە اعىلشىن تىلدەرىن ۇيرەنىپ، كومپيۋتەرلىك ساۋاتتىلىقتى ۇيرەتەتىن ارنايى كۋرستارعا قاتىسادى. سونداي- اق، جاتتىعۋ زالدارىندا سپورتپەن شۇعىلدانىپ، يوگا جاتتىعۋلارىن مەڭگەرۋگە مۇمكىندىك بار.

«ارداگەر» ورتالىعى نۇر- سۇلتان قالاسىنداعى پوتانين كوشەسى 9 ۇيدە ورنالاسقان.

بايلانىس تەلەفونى: 87172493231

2018 -جىلى الماتى قالاسىنىڭ تۇرىكسىب اۋدانىندا «زەينەت جاسىنداعى قارتتار كۇندىز باراتىن ورتالىق» اشىلدى. مۇندا ەستە ساقتاۋ قابىلەتى بۇزىلعان نەمەسە ديابەت جانە ينسۋلت اۋرۋىنان زارداپ شەككەن قارتتارعا رەابيليتاتسيالىق باعدارلاما اياسىندا كومەك كورسەتىلەدى.

مەكەن- جايى پوتانين كوشەسى، 247ا ورنالاسقان.

قىزىق دەرەك

100 جاسىندا پاراشيۋتپەن سەكىرگەن رەكوردسمەن


جاسى 100 دى ەڭسەرسە دە ءومىر باقي ءوزىن جاس سەزىنەتىن رەكوردسمەن دجوردجينا حارۆۋد 1915 -جىلى وڭتۇستىك افريكادا ومىرگە كەلگەن. ستۋدەنتتىك جىلداردا- اق قاتارلاستارىنان وق بويى وزىق كورىنگەن ول كەيپتاۋن ۋنيۆەرسيتەتىن ءتامامداعان العاشقى ايەل بولدى. ارتىنشا تۇرمىسقا شىعىپ، ءتورت بالالى بولىپ، جۇرت قاتارلى ءومىر ءسۇردى. كەيىن نەمەرە، شوبەرە ءسۇيدى. 90 جاسىندا ومىرگە قۇشتار اپامىز بولمىسى وزگەشە حوببيگە قىزىقتى.

پاراشيۋتپەن سەكىرۋدى ماقسات ەتكەن كەيۋانا ەكى جىل بويى اسىقپاي دايىندالدى. ءوزىن مورالدىق ءارى فيزيكالىق تۇرعىدا دايىنداعان اجەمىز 92 جاسىندا العاش رەت پاراشيۋتپەن ءساتتى سەكىردى. قاۋىپى مەن قاتەرى قاتار جۇرەتىن ەرەكشە سپورت تۇرىنە دەگەن ەكىنشى قادامىن تەك 97 جاسىندا جاساپ، ەكىنشى رەت اسپان الەمىن باعىندىردى. 100 جاسقا تولۋ مەرەيتويىن دجوردجينا اپامىز جاقىندارىنىڭ ورتاسىندا سالتاناتپەن تويلادى.

وسىلايشا ءوزىنىڭ ءۇشىنشى رەكوردىق قادامىن 100 جاسىندا جاساپ، اسپان تۇڭعيىعىندا پاراشيۋتپەن قالىقتادى. ارتىنشا وكەانعا سۇڭگىپ، ءجۇزىپ وتكەن. بۇدان كەيىن اپامىز ءۇش جىل ءومىر ءسۇرىپ، 2018 -جىلى ۇيىقتاپ جاتىپ، ماڭگىلىك مەكەنىنە اتتانعان ەكەن.

80 جاسىندا ەۆەرەستى باعىندىرعان قاريا


80 جاسىندا ەۆەرەستى باعىندىرعان يۋيتيرو ميۋرا جاپونيادا تۋعان. ونىڭ اكەسى تانىمال ساياحاتشى ءارى شاڭعىشى بولعان. يۋيتيرو اكە جولىن قۋىپ، شاڭعى سپورتىن جانىنا سەرىك ەتتى. ول الەمدەگى ەڭ بيىك شىڭداردى باعىندىرىپ، تاۋدىڭ باسىنان شاڭعىمەن ءتۇسۋدى ادەتكە اينالدىرعان. ەۆەرەست شىڭىنا شىققان قادامى دەرەكتى فيلمگە ارقاۋ بولعان. يۋيتيرونىڭ شاڭعى سپورتىنداعى جەتىستىگى تۋرالى تۋىندى 1975 -جىلى «وسكار» سىيلىعىن الىپتى. ال، 2003 -جىلى جاپوندىق قاريا ەۆەرەستى باعىندىرعان ەڭ كارى سپورتشى رەتىندە تانىلدى. الايدا، بۇل رەكورد تەك 5 جىل عانا ءوز مارتەبەسىن ۇستاپ تۇردى. سەبەبى، نەپال ءالپينيسى مين باحادۋر شەرحان 76 جاسىندا ەۆەرەستكە كوتەرىلىپ، رەكوردتى جاڭالادى. بۇل جاڭالىق يۋيتيرو ميۋرانىڭ جىگەرىن جاسىتقان جوق، كەرىسىنشە ول 2013 -جىلى 80 جاسىندا ەۆەرەستىڭ ەڭ بيىك شىڭىن باعىندىرىپ، رەكوردتى جاڭارتتى. وسىلايشا ءوز اتىن تاريح بەتىندە تاعى ءبىر مارتە قالدىردى. بۇل رەكوردتى وسى كۇنگە دەيىن ءالى ەشكىم وزگەرتكەن جوق. سوندا دا يۋيتيرو بوساڭسىماي ءالى دە شاڭعى سپورتىمەن بەلسەندى تۇردە اينالىسادى. ال، الپينيست مين باحادۋر شەرحان 6-مامىردا دۇنيە سالىپتى.

بالەت ونەرىندەگى دەبيۋت


80 جاسىندا بالەت بيلەپ تاڭقالدىرعان كەلەسى كەيىپكەر - دجون لوۋ.

دجون لوۋ 1919 -جىلى ۇلىبريتانيادا تۋعان. ونىڭ ءومىربايانى تۋرالى ەپوپەيا جازۋعا بولادى. باقىتتى بالالىقتان باستالعان ءومىر داستانى سوعىس، تۇتقىن، جاپون لاگەرى، كومىر شاحتاسىن دا كوردى. وتانىنا ورالعاننان كەيىن جۇرەگىنە قاياۋ سالعان ەستەلىكتەر مەن كۇيزەلىس ونى ءبىراز مازالادى. الايدا، ول بەرىلمەي جارالى جانىن ارت- كوللەدجدە ەمدەۋدى ءجون كوردى. سۋرەت ونەرىن قاتتى جاقسى كورگەن دجون سۋرەت ماماندىعىن جەتە مەڭگەرىپ، سۇيىكتى ىسىمەن شۇعىلدانۋ مۇمكىندىگىنە يە بولدى. ءتىپتى وسى ورتادان ومىرلىك جارىن كەزدەستىردى. ۋاقىت وتە كەلە سۋرەت ونەرى ەكىنشى جوسپارعا ويىسىپ، قىزمەت، وتباسى اراسىندا شىعارماشىلىق دەپ ءومىرى ءوتىپ جاتتى. كوزدى- اشىپ جۇمعانشا قالاي 80 جاسقا تولعانىن بىلمەي قالدى. بالالارى ەر جەتتى، ءۇيلى بولدى، بالالى- شاعالى ۇلكەن اۋلەتكە اينالدى. نەمەرەلەرى ۇنەمى اتاسىنا بالەت ستۋدياسى تۋرالى ايتىپ قىزىقتىردى. ءبىر قىزىعى، دجون ءومىر باقي بي ونەرىنە قاتتى قىزىققان ەكەن، ءتىپتى تالاي بيشىلەردىڭ سۋرەتىن سالىپتى. ءبىراق، ەشقاشان بيلەپ كورمەپتى.

بىردە نەمەرەلەرى اتاسىن Lantern Dance ستۋدياسىنا سۇيرەگەندەي قىلىپ اپارادى. بي ونەرى جانىنا جاعىپ، بالەت قيمىلدارىن وڭاي ەڭسەرەتىنىن بايقايدى. ءتىپتى ءبىر جىلدان كەيىن ءتۇرلى شارالارعا قاتىسىپ، جەرگىلىكتى جۇلدىزعا اينالادى. بالەت ونەرىنە جان-تانىمەن بەرىلگەن دجون ءبىر كورگەن ادامعا ءومىر بويى وسى بيمەن اينالىساتىنداي كورىنەتىن بولعان. قاريا 90 جاسىن ءوزى تۇرىپ جاتقان شاعىن عانا ەلي قالاسىندا تويلادى. مەرەيتويىندا ول «سۋرەتشى ءومىرى» اتتى قويىلىم قويىپ، كوپشىلىك الدىندا بيلەدى. بيگە دەگەن قۇشتارلىعى ولە ولگەنشە سونگەن جوق. قارت 99 جاسىندا نەمەرە، شوبەرەلەرىنىڭ ورتاسىندا كوز جۇمدى.

EL. KZ

سوڭعى جاڭالىقتار