ەۋروپاداعى كوروناۆيرۋس: ساراپشىلار نەگە الاڭداپ وتىر؟
ينفەكتسيادان بارلىعى 288444 ەۋروپالىق قايتىس بولدى، دەپ حابارلايدى «قازاقپارات» ح ا ا مەنشىكتى ءتىلشىسى.
ناۋقاستار سانى بويىنشا كوش باستاپ تۇرعان فرانسيا (100 مىڭ ادامعا شاققاندا 667 جاعداي)، يسپانيا 485 جانە ۇلى بريتانيا 490 بولىپ وتىر. نيدەرلاندى ساراپشىلارىنىڭ پىكىرىنشە، پاندەميانىڭ ەكونوميكاعا تيگىزەر زالالى اسىرەسە كەلەسى جىلدىڭ ەكىنشى توقسانىندا بايقالادى.
بۇل كەزدە الەم ەلدەرى بۇرىنعىداي قالىپتى جاعدايعا كەلۋگە ۆاكتسينا كومەكتەسەدى دەگەن ۇمىتپەن كروناۆيرۋسپەن كۇرەس شارالارىنا مەملەكەت تاراپىنان قولداۋدى توقتاتا باستايدى.
داعدارىستىڭ ىقتيمال سالدارى بويىنشا PwC كونسالتينگ كومپانياسى مەن لەيدەن ۋنيۆەرسيتەتى جۇرگىزگەن ساۋالناماعا بانك، زاڭ، ينۆەستيتسيا سالالارى بويىنشا 102 ەكسپەرت قاتىستى.
ولاردىڭ 47 پايىزى 2021-جىلدىڭ ءساۋىر، مامىر، ماۋسىم ايلارىندا بانكروتقا ۇشىرايتىندار سانى كۇرت ارتادى دەگەن بولجام جاساپ وتىر.
ساۋالناماعا قاتىسقانداردىڭ ۇشتەن ءبىرى جاعدايدىڭ بۇلاي بولۋىنا كوروناۆيرۋسپەن كۇرەس شارالارى اسەر ەتەدى دەگەن پىكىردە، %15 بۇل پروبلەمانى قارجىلاندىرۋ كولەمىنىڭ ازدىعىمەن بايلانىستىرادى، %11 قارجىلىق قيىندىقتارعا مەنەدجمەنتتىڭ دۇرىس جۇزەگە اسىرىلماۋى سەبەپ بولىپ وتىر دەگەن ويدا.
«قازىرگى تاڭدا مەملەكەتتىك قولداۋدىڭ ارقاسىندا ايدارىنان جەل ەسىپ تۇرعان كاسىپكەرلەر پروبلەمالارعا تاپ بولۋى مۇمكىن»، - دەيدى ەسەپ اۆتورلارىنىڭ ءبىرى ەدۆين ۆان ۆەينگااردەن.
«قازىر سالىق كەيىنگە قالدىرىلىپ، جاڭا قارجىلاندىرۋدىڭ ناتيجەسىندە ولاردىڭ قارىزدارى كوبەيىپ جاتىر. اڭگىمە ولار الداعى ۋاقىتتا سول قارىزدارىن جابا الادى ما دەگەن ماسەلەگە كەلىپ تىرەلىپ تۇر. مىسالى: ۇيدەن جۇمىس ىستەۋ، ينتەرنەتتەن ساتىپ الۋ سياقتى شارتتار كوپتەگەن كومپانيالاردىڭ بۇرىن ۇيرەنىپ قالعان ادەتتەرىن وزگەرتۋگە ماجبۇرلەيدى»، - دەيدى ەدۆين ۆان ۆەينگااردەن.
بەرليندە كوپتەگەن ميگرانتتار پاندەميا سالدارىنان جۇمىس تابا الماي، ءوز قونىستارىندا الەممەن بايلانىستان اجىرايدى.
گەرمانيانىڭ ارنايى ورتالىقتارىندا 20000 بوسقىن ءومىر ءسۇرىپ جاتىر. «بۇرىن ءبىزدىڭ تۇرعىندار نەمىس ءتىلى ساباعىنا بارىپ تۇراتىن»، - دەيدى ميگرانتتارعا ارنالعان بەرلين ورتالىعىنىڭ ديرەكتورى پەتەر حەرمانس.
«قازىر ول مۇمكىن ەمەس. كەيبىرەۋلەرگە ينتەرنەت ارقىلى جۇمىس ىستەۋ قيىنعا سوعىپ، ولاردىڭ جۇيكەسى سىر بەرىپ جاتادى. فرانسيادا تاياۋدا جۇرگىزىلگەن زەرتتەۋلەر ەگەر Covid-19-عا قارسى ۆاكتسينا جالپىعا بىردەي قولجەتىمدى بولعاندا، ونى فرانسۋزداردىڭ %54 عانا الۋعا نيەتتى ەكەنىن كورسەتتى. بۇل ساۋالناما جۇرگىزىلگەن ە و ەلدەرىنىڭ اراسىنداعى ەڭ تومەنگى كورسەتكىش.
«جالپى العاندا فرانسۋزدار ۆاكتسينا قابىلداۋعا اسا قۇلىقتى ەمەس»، - دەيدى فرانسيادا ۆاكتسيناعا قاتىستى تۇرعىنداردىڭ كوڭىل كۇيىن زەرتتەگەن الەۋمەتتىك عىلىمدار پروفەسسورى انتۋان بريستيل.
«بۇل جەردە ۆاكتسيناعا دەگەن كوزقاراس جاس ەرەكشەلىگىنە دە بايلانىستى. جاسى ۇلكەن ادامدار ۆاكتسينا قابىلداۋعا دايىن. سونداي-اق گەندەرلىك فاكتورلار دا بار. ۆاكتسيناعا ەرلەرگە قاراعاندا ايەلدەر سەنىمسىزدەۋ قارايدى. مۇنداي كوزقاراستىڭ قالىپتاسۋىنىڭ ماڭىزدى سەبەپتەرىنىڭ ءبىرى ساياسي ينستيتۋتتار مەن عالىمدارعا دەگەن سەنىمسىزدىك»، - دەيدى ساراپشى.
زەرتتەۋ جۇمىستارى پاندەميانى توقتاتۋ ءۇشىن فرانسۋزداردىڭ %80 ۆاكتسينا سالدىرۋى كەرەك ەكەنىن كورسەتتى.
كەيبىر فرانسيا ساياساتكەرلەرى ۆاكتسينانى مىندەتتى ەتۋ كەرەك دەپ وتىر.