اۆستراليادا اكۋلا شابۋىلداعان ەر ادام مەرت بولدى

ليون. قازاقپارات - اۆستراليانىڭ سولتۇستىك-باتىس بولىگىندەگى برۋم قالاسىنا جاقىن ماڭداعى جاعالاۋدا اكۋلا شابۋىلداعان ەر ادام مەرت بولدى، دەپ حابارلايدى قازاقپارات Euronews اگەنتتىگىنە سىلتەمە جاساپ.

جىرتقىش قالانىڭ باس جاعاجايلارىنىڭ بىرىندە سۋدا ءجۇزىپ جۇرگەن ازاماتتى باسسالعان. اكۋلا ونىڭ قولىن جۇلىپ العان، سونداي-اق ەر ادام اياعىنان اۋىر جاراقات الدى.

وقيعانىڭ كۋاگەرلەرى زارداپ شەككەن ازاماتتى جاعاعا شىعارىپ، جەدەل جاردەم شاقىرتقان. الايدا ەر ادام جەدەل جاردەم كەلگەنشە ءجانتاسىلىم ەتتى. جاعاجاي قازىر جابىق، وندا كۇزەت قويىلعان.

«بۇل جانتۇرشىگەرلىك جاعداي. وقيعا وعان كۋا بولعان ادامداردىڭ جۇيكەسىنە اسەر ەتەرى ءسوزسىز. ولار ءبىزدىڭ دە ويىمىزدان كەتەر ەمەس»، - دەدى باتىس اۆستراليا شتاتىنىڭ پرەمەر-ءمينيسترى مارك ماكگوۋەن.

بۇل قۇرلىقتا ەڭ قاۋىپتى سانالاتىن اۆستراليانىڭ باتىس جاعالاۋىندا سوڭعى 1,5 ايدا بولىپ وتىرعان ەكىنشى جاعداي. بيىل اكۋلالاردىڭ وسىنداي شابۋىلدارىنىڭ سالدارىنان 8 ادام قايتىس بولعان.