اسحات ايماعامبەتوۆ: بالالاردىڭ ءال-اۋقاتى يندەكسىن دايىنداۋ بويىنشا ۇلكەن جۇمىس اتقارۋدامىز

نۇر-سۇلتان. قازاقپارات - دۇنيەجۇزىلىك بالالار كۇنى اياسىندا ق ر ءبىلىم جانە عىلىم ءمينيسترى اسحات ايماعامبەتوۆ بىرنەشە مەكتەپ وقۋشىسىمەن ونلاين-كەزدەسۋ وتكىزدى، دەپ حابارلايدى قازاقپارات.

ونلاين-كەزدەسۋلەر يۋنيسەفتىڭ «Kids Take over - بالالار كوش باستايدى» باستاماسى نەگىزىندە ۇيىمداستىرىلدى.

«ءبىز قازىر بالالاردىڭ ءال-اۋقاتى يندەكسىن دايىنداۋ بويىنشا ۇلكەن جۇمىس جۇرگىزىپ جاتىرمىز. بالالاردىڭ ءال-اۋقاتى - تەك ءبىلىم بەرۋ عانا ەمەس، سونىمەن قاتار دەنساۋلىق ساقتاۋ جانە باسقا دا كوپتەگەن سالانىڭ ماسەلەسى. ءبىز يندەكس جاساپ، ءار قالا، ءار اۋدان، ءار وبلىس بويىنشا قانداي دا ءبىر وبلىستىڭ قالاي جۇمىس ىستەيتىنىن جانە بالالارعا قانداي جاعداي جاسايتىنىن، بالا قۇقىقتارىن قالاي قورعايتىنىن كورگىمىز كەلەدى. بۇل جۇمىستى باستاپ تا كەتتىك، كەلەسى جىلدىڭ قاڭتار ايىنان باستاپ جۇمىس جۇيەلى تۇردە جۇرگىزىلەتىن بولادى دەپ ويلايمىن. سونداي-اق، ءبىز ءار مەكتەپتە ءوزىن-ءوزى باسقارۋ ينستيتۋتتارى - مەكتەپ پارلامەنتتەرى بولعانىن قالايمىز»، - دەدى ءبىلىم جانە عىلىم ءمينيسترى اسحات ايماعامبەتوۆ.

ەفير بارىسىندا وقۋشىلار تاراپىنان ۇسىنىستار مەن باستامالار ايتىلدى.

اتاپ ايتقاندا، وقۋشىلار بالا قۇقىقتارىن قورعاۋ ماقساتىندا سەنىم تەلەفوندارىن ۇيىمداستىرۋدى ۇسىنادى، سونداي-اق مەكتەپتەردى كوركەم ادەبيەتتەرمەن قامتاماسىز ەتۋ ماسەلەلەرىن كوتەردى.

«ءبىز «وقيتىن ۇلت» دەگەن ۇلكەن جوبانى باستادىق. ءار مەكتەپتى كوركەم ادەبيەتپەن، اسىرەسە قازاق تىلىندەگى ادەبيەتتەرمەن قامتاماسىز ەتكىمىز كەلەدى. كىتاپحانالاردى كوركەم ادەبيەتپەن قامتاماسىز ەتۋ كەرەك. بالالارىمىزدىڭ كىتاپ وقۋى ءبىز ءۇشىن وتە ماڭىزدى»، - دەدى ءبىلىم ءمينيسترى قاشاندا وقۋشىلاردى تىڭداۋعا جانە قولداۋعا دايىن ەكەنىن ايتا كەلە.

ەستەرىڭىزگە سالا كەتەيىك، قازاقستاندا «وقيتىن مەكتەپ - وقيتىن ۇلت» جوباسى باستالدى.