تارازداعى ۇلكەن تويحانا ازىق-تۇلىك دۇكەنىنە اينالدى

تاراز. قازاقپارات - تاراز قالاسىنداعى «اياۋلىم» مەيرامحاناسىنىڭ ورنىنان «ءدامدى سەبەت» ساۋدا ورتالىعى اشىلدى، - دەپ حابارلايدى قازاقپارات ءتىلشىسى.

جۇمىسىن ەندى عانا باستاعان ساۋدا ورتالىعىنا كەلۋشىلەردىڭ قاراسى قالىڭ. ونداعى ازىق-تۇلىك باعاسى دا نارىق باعاسىنان تومەندەۋ ەكەنى بايقالادى.

جامبىل وبلىسى اكىمدىگى كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى اسپانديار سەيسەبايەۆتىڭ ايتۋىنشا، قازىرگى تاڭداعى پاندەميالىق احۋالعا بايلانىستى مەيرامحانالار مەن رەستوران بيزنەسى توقتاپ تۇر. بۇل كوپتەگەن كاسىپكەرلەردى تابىسىنان قاققانى جاسىرىن ەمەس.

«ولاردىڭ بانكتەر الدىندا بەرەشەكتەرىنىڭ بارىن ەسكەرىپ، ودان شىعۋ جولدارىن ۇسىنۋدامىز. ماسەلەن، تاراز قالاسىندا مۇنداي 67 مەيرامحانا بار ەكەن. ءوز عيماراتىن «ءدامدى سەبەت» ساۋدا ورتالىعىن جاساۋعا جالعا بەرىپ وتىرعان بىردەن-ءبىر مەيرامحانا - «اياۋلىم». ول بۇرىن تويحانا، ءبىر جاعى رەستوران ەدى. ەندى ازىق-تۇلىك دۇكەنىنە اينالدى. بۇل - تاراز قالاسىندا عانا جالعاسىپ جاتقان ءىس-شارا ەمەس، قازاقستان بويىنشا قولعا الىنعان باستاما»، - دەدى باسقارما باسشىسى.

اتالعان ساۋدا ورتالىعى وپەراتسيا زالىنىڭ ديرەكتورى شولپان ولجابەك قىزى مۇندا 5 مىڭ تاۋار ءتۇرى وتكەرىلەتىنىن جەتكىزدى. سونىمەن قاتار، ەكى اپتادا ءبىر رەت ءبىر زاتقا ءبىر زات قوسىپ بەرۋ اكتسياسىن وتكىزۋ جوسپارلاۋدا.

كەيبىر ازىق-تۇلىك باعالارى 10-30 پايىزعا جەڭىلدەتىلگەن. جالپى سورەلەرگە قويىلعان ءونىمنىڭ باسىم بولىگىن وتاندىق تاۋارلار قۇرايدى. سونداي-اق مۇندا ساۋدا جەلىسىنىڭ ءوز ناۋبايحاناسى، تورت ءپىسىرۋ سەحتارىنىڭ ونىمدەرى دە ساۋدالانادى.