مينيستر سوي الەمگە قازاقستاننىڭ تۋبەركۋلەزبەن كۇرەس شارالارىن ءمالىم ەتتى
بۇل تۋرالى 18-19-قاراشادا وتكەن «تۋبەركۋلەزدى توقتاتۋ» سەرىكتەستىك كەڭەسى باسقارماسىنىڭ 33-وتىرىسىندا ايتىلدى، دەپ حابارلايدى قازاقپارات. وتىرىسقا ق ر دەنساۋلىق ساقتاۋ ءمينيسترى الەكسەي سوي قاتىستى.
«الەمدىك قاۋىمداستىق تۋبەركۋلەزگە شالدىققان ءاربىر ناۋقاستى نازاردان، مەديتسينالىق جانە الەۋمەتتىك كومەكتەن تىس قالدىرماۋى كەرەك. اسىرەسە پاندەميا كەزىندە. ونىڭ ۇستىنە، دۇنيەجۇزىلىك دەنساۋلىق ساقتاۋ ۇيىمىنىڭ باعالاۋى بويىنشا 2020-2025 -جىلدار ارالىعىندا 6,3 ميلليون ادام تۋبەركۋلەزگە شالدىعادى جانە COVID-19 اسەرى سالدارىنان 1,4 ميلليون ناۋقاس قايتىس بولۋى مۇمكىن»، - دەلىنگەن ق ر دەنساۋلىق ساقتاۋ مينيسترلىگىنىڭ اقپاراتىندا.
«الەم ەلدەرى بىرىگىپ كۇرەسكەندە عانا قوعامدىق اۋرۋعا اينالعان تۋبەركۋلەزدى جويا الامىز»، - دەدى ا. سوي.
جيىن اياسىندا افريكا دەنساۋلىق ساقتاۋ مينيسترلەرىنىڭ قاتىسۋىمەن دوڭگەلەك ۇستەل وتىرىسى ءوتتى. وندا مينيستر الەكسەي سوي الەمدىك قوعامداستىقتى، اسىرەسە كوروناۆيرۋس ينفەكسياسى پاندەمياسى كەزىندە مەديتسينالىق- سانيتارلىق العاشقى كومەكتى كۇشەيتۋگە شاقىردى. مينيستر قازىر قازاقستاننىڭ تۋبەركۋلەزبەن اۋىراتىن ناۋقاستارعا ستاتسيونارلىق دەڭگەيدە كومەك كورسەتۋ مودەلىنەن مساك جانە ستاتسيوناردى الماستىراتىن ەمدەۋ مودەلىنە كوشكەنىن حابارلادى.
«ءبىز تۋبەركۋلەزگە قارسى ۇيىمداردى قارجىلاندىرۋدىڭ جاڭا تەتىگىن ازىرلەدىك. توسەك-ورىن قورىن قىسقارتۋ ەسەبىنەن ۇنەمدەلگەن قاراجات قايتا بولىنەدى. وسىلايشا، تۋبەركۋلەزگە شالدىققان ناۋقاستاردى امبۋلاتوريالىق ەمدەۋ مۇمكىندىگى كەڭەيدى، ەمدەۋ مەن پروفيلاكتيكادا جاڭا تەحنولوگيالار قولدانىلۋدا، مساك دەڭگەيىندە ناۋقاستارعا پسيحو-الەۋمەتتىك قولداۋ كورسەتىلەدى»، - دەدى ا. سوي.