سولتۇستىك قازاقستاندا قونىس اۋدارۋشىلارعا ساپاسىز سالىنعان ۇيلەر ءۇشىن اكىم جازالاندى

None
None
پەتروپاۆل. قازاقپارات - سولتۇستىك قازاقستان وبلىسىندا اققايىڭ اۋدانىنىڭ اكىمى قونىس اۋدارۋشىلارعا ارنالعان ۇيلەردىڭ ناشار ساپاسى ءۇشىن جازالاندى، دەپ حابارلايدى قازاقپارات ءتىلشىسى.

س ق و اكىمى قۇمار اقساقالوۆتىڭ تاپسىرماسىمەن اققايىڭ اۋدانىندا جۇرگىزىلگەن قىزمەتتىك تەكسەرۋ اياقتالدى. تەكسەرۋ جۇمىس كۇشى كوپ وڭىرلەردەن قونىس اۋدارۋشىلارعا ارنالعان جەكە تۇرعىن ۇيلەردىڭ ساپاسىنا قاتىستى ءوتتى. ناتيجەسىندە باسپانا قۇرىلىسىندا جىبەرىلگەن ولقىلىقتار ۋاقىتىندا جويىلماعانى ءۇشىن اۋدان اكىمى رۋستەم ەلۋبايەۆ قاتاڭ سوگىس الدى.

جاڭادان سالىنعان ۇيلەردە تابىلعان ولقىلىقتار بەلگىلەنگەن مەرزىمدە جويىلۋى قاجەت. رەسمي مالىمەتتە، ءوڭىر باسشىسىنىڭ اۋدان اكىمدەرى مەن مەملەكەتتىك ورگانداردىڭ باسشىلارىنا جاۋاپكەرشىلىكتى ەسكە سالىپ، قىزمەتتەرىنەن بوساتىلاتىندىعىن ەسكەرتكەندىگى ايتىلعان.

بۇعان دەيىن اققايىڭ اۋدانىنا وڭتۇستىك وڭىرلەردەن كوشىپ كەلگەن تۇرعىندار الەۋمەتتىك جەلىدە ۇيلەرىنىڭ ساپاسىز سالىنعانىن، سۋىق ەكەنىن ايتىپ شاعىمدانعان ەدى. سوزدەرىنە قاراعاندا، اۋدان اكىمى ولاردىڭ ماسەلەسىنە ءمان بەرمەگەن.

اۆتور: اقەركە داۋرەنبەك قىزى

سوڭعى جاڭالىقتار