قىتايدىڭ ۋحان قالاسىندا يمپورتتالعان ەتتىڭ پاكەتىنەن كوروناۆيرۋس انىقتالدى

نۇر-سۇلتان. قازاقپارات - قىتايدىڭ ۋحان قالاسىندا يمپورتتالعان مۇزداتىلعان ەتتىڭ پاكەتىنەن كوروناۆيرۋس انىقتالدى.

بۇل تۋرالى جەرگىلىكتى دەنساۋلىق ساقتاۋ ورگاندارىنىڭ وكىلدەرى ايتتى، - دەپ حابارلايدى شينحۋا.

دەرەككوز مالىمەتىنشە، ەت ۋحانعا برازيليادان تيانجين كەدەنى ارقىلى 25- قىركۇيەكتە اكەلىنىپ، توڭازىتقىشقا سالىنعان. جالپى سالماعى 27 توننا بولاتىن مۇزداتىلعان سيىر ەتىنىڭ 1313 بلوگىنان كوروناۆيرۋس تابىلىپ وتىر.

قازىرگى ۋاقىتتا وسى جاعداي بويىنشا تەرگەۋ جۇمىستارى ءجۇرىپ جاتىر. ال جەرگىلىكتى بيلىك وكىلدەرى قاجەت تاۋارلاردى مورلەپ، قويمالاردى دەزينفەكتسيالاپ جاتىر.

بۇعان دەيىن ۋحان بيلىگى قالا بويىنشا بارلىق يمپورتتالعان مۇزداتىلعان ازىق-تۇلىك ءونىمىن مۇقيات تەكسەرۋدى تاپسىرعان بولاتىن.

ەسكە سالايىق، مۇنىڭ الدىندا 20 ەلدىڭ ازىق-تۇلىك پاكەتتەرىنەن كوروناۆيرۋس انىقتالعانى حابارلانعان ەدى.