قوجا احمەت ياساۋي كەسەنەسىندەگى تۋلار تاريحي ورنىنا قويىلدى

تۇركىستان. قازاقپارات – ق ر مادەنيەت جانە سپورت مينيسترلىگى، «ازىرەت سۇلتان» مەملەكەتتىك تاريحي- مادەني قورىق- مۋزەيىنىڭ ۇيىمداستىرۋىمەن قوجا احمەت ياساۋي كەسەنەسىنىڭ قازاندىق بولمەسىندە «قاسيەتتى لاۋحانىڭ جاڭعىرىلۋى» شاراسى ءوتتى، دەپ حابارلايدى قازاقپارات.

قورىق- مۋزەيىنىڭ باسپا ءسوز قىزمەتىنىڭ مالىمەتىنشە، تاريحي لاۋحالاردى (تۋدىڭ باسى) ورناتۋعا ارنالعان شاراعا تۇركىستان قالاسىنىڭ اكىمى راشيد ايۋپوۆ، وبلىستىق، قالالىق ارداگەرلەر كەڭەسىنىڭ مۇشەلەرى، زيالى قاۋىم وكىلدەرى قاتىستى. شارا بارىسىندا قالا باسشىسى راشيد ايۋپوۆ تاريحي ماڭىزعا يە جادىگەرلەردى قايتا جاڭعىرتىپ، ءوز ورنىنا ورنالاستىرعان قر مادەنيەت جانە سپورت مينيسترلىگى مەن «ازىرەت سۇلتان» مەملەكەتتىك تاريحي- مادەني قورىق- مۋزەيىنە العىس ءبىلدىردى.

«بۇگىن - وتكەنىمىزدى قايتا جاڭعىرتىپ، جوعالتقانىمىزدى تاپقان ەرەكشە كۇن. ەلباسى نۇرسۇلتان ءابىش ۇلىنىڭ «بولاشاققا باعدار: رۋحاني جاڭعىرۋ« باعدارلاماسى اياسىندا مۇحاممەد (س. ا. ۋ. ) پايعامبارىمىزدان باستاپ مۇسىلمان الەمىنە ءماشھۇر احمەت ەسىمىمەن ايگىلى شايىقتاردىڭ ەسىمدەرى جازىلعان لاۋحالار تايقازاننىڭ اينالاسىنا، ياعني تاريحي ورنىنا قايتا ورناتىلدى. ءتول جادىگەرلەرىمىزدى، تاريحىمىزدى تۇگەندەپ، ناسيحاتتاۋ بولاشاق ۇرپاق ءۇشىن ماڭىزدى مۇرا بولىپ قالارى ءسوزسىز. تاريحىمىزدى تانۋ، جاڭعىرتۋ جولىنداعى ماڭىزدى كۇنمەن بارشاڭىزدى قۇتتىقتايمىن»، - دەدى «ازىرەت سۇلتان» مەملەكەتتىك تاريحي- مادەني قورىق- مۋزەيىنىڭ ديرەكتورى نۇربولات احمەتجانوۆ.

قوجا احمەت ياساۋي كەسەنەسىندەگى تايقازاندى قورشاي ورنالاسقان ون لاۋحا جونىندە 1871-1872 ج ج. ورىس ساياحاتشىسى ا. ل. كۋننىڭ البومىندا جانە م. ە. ماسسون 1928 -جىلى تۇركىستانعا ارنايى كەلگەن ساپارىندا: «تايقازاننىڭ ون قۇلاعىنا جىلقى قىلىمەن ۇشتالعان، كەيبىرى جارتى اي سەكىلدى ءيىلىپ بىتكەن، تەمىرمەن قاپتالعان ۇزىن ون لاۋحا بەكىتىلگەن» - دەپ جازادى. 1935-1940 -جىلدارى كەسەنە قاراۋسىز قالعان تۇستا ون لاۋحا قولدى بولعاندىعى جايىندا دەرەكتەر كەزدەسەدى. عالىم پ. ن. احمەروۆتىڭ «احمەت ياساۋي ءمورىنىڭ جازباسى» اتتى ەڭبەگىندە ون لاۋھالاردا جانە موردە مۇسىلمان الەمىنە بەلگىلى احمەت ەسىمىمەن ايگىلى بولعان شايىقتاردىڭ ەسىمدەرى جازىلعاندىعى ايتىلادى. ولاردىڭ بەرىلۋ ءتارتىبى مىنانداي:

1. «احمەت (ياعني مۇحاممەد (س. ا. ۋ. ) - اللانىڭ ەلشىسى».

2. «شايىق احمەت حانبال» .

3. «احمەت حەيرۋن- ناساج» (توقىماشىلاردىڭ ەڭ ۇزدىگى).

4. «شايىق احمەت اركام» (شۇبار الا).

5. «شايىق احمەت حازراۆي».

6. «شايىق احمەت راۆيا» (راۆيالىك).

7. «شايىق احمەت مۇحتار» (تاڭداۋلى).

8. «شايىق احمەت حامي» (ساقتاۋشى).

9. «شايىق احمەت كابير» (ۇلى).

10. «شايىق احمەت ساعاري» - دەپ اتالادى.

شاراعا قاتىسۋشىلار «قاسيەتتى لاۋحانىڭ تاريحى» كورمەسىن تاماشالادى.