قانداستاردىڭ تاريحي وتانىنا دۇنيە-مۇلكىمەن كوشىپ كەلۋى ماسەلەسىن شەشۋىمىز كەرەك - بەكتايەۆ
بۇل تۋرالى «اۋىل» حالىقتىق-دەموكراتيالىق پاتريوتتىق پارتياسىنىڭ ءتوراعاسى ءالي بەكتايەۆ ايتتى، دەپ حابارلايدى قازاقپارات ءتىلشىسى.
«ۇلتتىق قۇندىلىقتارىمىزدى ساقتاپ، ونى كۇشەيتۋگە، سونىمەن قاتار دەموگرافيامىزدىڭ كۇرت وسۋىنە ارقاۋ بولاتىن قانداستارىمىز! تاۋەلسىزدىك العالى بەرى تاريحي وتانىنا 1 ميلليون 200 مىڭ اعايىن كوشىپ كەلگەن بولسا، ولاردىڭ قازىرگى سانى 3 ميلليونعا جۋىق. بۇگىندە بۇل ۇلكەن الەۋمەت. ولاردىڭ قوعامعا دا، مادەنيەتكە دە، ءتىپتى اۋىل شارۋاشىلىعىنا دا سىڭىرگەن ەڭبەگى زور»، - دەدى ول پارتيانىڭ كەزەكتەن تىس XVIII سەزىندە.
الايدا، ءالي بەكتايەۆ بەيرەسمي دەرەكتەرگە سايكەس سىرتتا ءالى 7,5 ميلليون قانداسىمىز جۇرگەندىگىن ايتادى.
«وكىنىشتىسى، ولاردىڭ قازاقستانعا كوشىپ كەلۋ ۇدەرىسى سوڭعى ون جىلدا كۇرت ازايعان. سەبەبى 2010 -جىلدان باستاپ مەملەكەتتىك قولداۋ تەتىكتەرى توقتاتىلدى. 2017 -جىلدان بەرى قونىس اۋدارۋ كۆوتاسى پايدا بولدى. دەسە دە ناتيجە نولگە تەڭ. وسى ماسەلەنى قولعا الۋ كەرەك دەپ سانايمىز. سونىمەن قاتار، قانداستار كوشىن قايتا جانداندىرۋ ءۇشىن ديپلوماتيالىق ميسسيا قۇزىرلى ورگاندارمەن بىرگە ەتنيكالىق قازاقتاردىڭ تاريحي وتانىنا قونىس اۋدارۋى كەزىندە مال، تەحنيكا ءتارىزدى جىلجىمالى مۇلىكتەرىن وزدەرىمەن الىپ كەلۋى ماسەلەسىن شەشۋى ءتيىس»، - دەدى «اۋىل» پارتياسىنىڭ ءتوراعاسى.