ەلوردادا ورازاق سماعۇلوۆتىڭ «قازاق حالقى جانە اتا تەگى» اتتى كىتابى تانىستىرىلدى
اتالعان عىلىمي ەڭبەكتە عالىمنىڭ 50 جىلعا جۋىق جيناقتاعان ماتەريالدارى نەگىزىندە قازاق حالقىنىڭ بەت- بەينەسى، قان جۇيەسى، ءتىس مورفولوگياسى، تەرى بەدەرى مەن قاڭقا سۇيەكتەرىنە جاسالعان سالىستىرمالى زەرتتەۋلەرىنىڭ عىلىمي تۇجىرىمدارى توپتاستىرىلعان. سونداي- اق كىتاپتىڭ جالپى مازمۇنى بايىرعى قازاقتاردىڭ اتامەكەنى مەن ونىڭ تۇرعىندارىنىڭ شىعۋ تەگىنە، ولاردىڭ تاريحي- بيولوگيالىق دامۋىنا بايلانىستى ەتنوانتروپولوگياسىنا، تۇركىتەكتەس حالىقتاردىڭ لينگۆيستيكاسى مەن انتروپولوگياسىنا ارنالعان.
ەڭبەككە سۇيەنسەك، بۇگىنگى قازاقستان جەرىندە مەكەن ەتكەن كونە زامان تۇرعىندارىنىڭ ءۇزىلىسسىز ءناسىل- تەك جالعاستىعىنىڭ كورىنىسى بۇگىنگى قازاق حالقىنىڭ مورفوفيزيولوگيالىق قۇرىلىمىندا ونىڭ ءتۇپ- تۇقيانىنىڭ انتروپولوگيالىق ەرەكشەلىكتەرى بايىرعى قازاق اتامەكەنىنىڭ قولا داۋىرىنەن باستاپ كەشەگى XX عاسىرعا دەيىن، ياعني 40 عاسىر بويى، ايتارلىقتاي دەڭگەيدە ساقتالىپ قالعانى بايان ەتىلەدى.
«ورازاق سماعۇلوۆتىڭ عىلىم سالاسىندا جۇرگەنىنە 65 جىلدان استى. ول قازاق ەلى انتروپولوگيالىق عىلىمىنىڭ تۇڭعىش بىلىكتى مامانى. بيىل 90 جاسقا تولىپ وتىرعان عالىم ەل، جەر، ۇرپاق ءۇشىن ماڭىزدى عىلىمي زەرتتەۋدى ەشقاشان ۇزگەن ەمەس. تاياۋدا عانا ونىڭ مەملەكەتتىك تىلدە «قازاق حالقى جانە اتا تەگى» اتتى ىرگەلى ەڭبەگى جارىق كوردى. كىتاپتىڭ بىرلەسكەن اۆتورى ايناگۇل سماعۇلوۆانىڭ دا ەرەكشە ەڭبەگىن اتاپ وتكەن ءجون»، - دەدى ل. ن. گۋميليەۆ اتىنداعى ە ۇ ۋ رەكتورى ەرلان سىدىقوۆ.
كىتاپتىڭ تانىستىرىلىمى بارىسىندا ورازاق سماعۇلوۆقا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ «قۇرمەتتى پروفەسسورى» اتاعى بەرىلدى. سونىمەن قاتار، تاريحشىلاردىڭ ۇلتتىق كونگرەسى ۇسىنىسىمەن، ۋنيۆەرسيتەت عىلىمي كەڭەسىنىڭ شەشىمىمەن عالىمعا ە ۇ ۋ- ءدىڭ «كۇلتەگىن» مەدالى تابىس ەتىلدى.
ەسكە سالا كەتەيىك، بيىل قازان ايىندا قازاقتان شىققان تۇڭعىش انتروپولوگ، قازاقستانداعى انتروپولوگيا مەكتەبىنىڭ نەگىزىن قالاۋشى، تاريح عىلىمدارىنىڭ دوكتورى، پروفەسسور، ۇلتتىق عىلىم اكادەمياسىنىڭ اكادەميگى، ش. ءۋاليحانوۆ اتىنداعى سىيلىقتىڭ لاۋرەاتى ورازاق سماعۇلوۆ 90 جاسقا تولدى.
اۆتور: رۋسلان عابباسوۆ
