قاراعاندىلىق قۇتقارۋشى التى جەتىم بالانى باۋىرىنا باسقان

قاراعاندى. قازاقپارات - قاراعاندىلىق قۇتقارۋشى نيكولاي سوبوليەۆسكي كوپبالالى اكە.

جۇبايى تاتيانامەن بىرگە ولار ءتۇرلى ۇلت جانە ءتۇرلى جاستاعى 9 بالانى تاربيەلەپ وتىر.

ولاردىڭ ۇشەۋى - ەرلى-زايىپتىلاردىڭ ءوز بالالارى، ال قالعان التاۋىن بالالار ۇيىنەن اسىراپ العان، دەپ حابارلايدى قازاقپارات ءتىلشىسى.

نيكولاي سوبوليەۆسكي 13 جىلدان بەرى قاراعاندى قالاسىنىڭ قۇتقارۋ بولىمشەسىندە باس قۇتقارۋشى بولىپ قىزمەت ەتەدى. ماماندىعىنىڭ قيىندىعىنا قاراماستان، ءوز جۇمىسىن جاقسى كورەدى. سونىمەن قاتار، ول - سۇيىكتى جار، توعىز بالانىڭ اكەسى. كوپ بالالى نيكولاي مەن تاتيانا سوبوليەۆسكيدىڭ ءىسىن ەرلىككە بالاۋعا بولادى.

نيكولايدىڭ ايەلى تاتيانا بالالار ۇيىندە تاربيەشى. ولار بۇگىنگە دەيىن التى بالانى اسىراپ العان. وعان قوسا، تاعى ءۇش تۋعان بالاسى بار. جەتىمدەردى اسىراپ الۋ قىزى نينەلدىڭ يدەياسى بولعان. بالا كەزىنەن اناسىنىڭ جۇمىسىنا بارىپ جۇرگەن كىشكەنتاي قىز، باۋىرلارىنىڭ بولعانىن قالايتىنىن جەتكىزگەن. كەيىن نيكولاي مەن تاتيانا اقىلداسىپ، بىرەۋى جەتكىلىكسىز دەگەن پىكىرگە كەلەدى.

وسىلايشا ەرلى-زايىپتىلار، نيكولايدىڭ ايەلى جۇمىس ىستەيتىن بالالار ۇيىنەن التى بالانى اسىراپ الادى.

«بارلىق بالا اتا-انانىڭ مەيىرىمىن كورۋى ءتيىس»، - دەگەن وتباسى ءار بالاسىنان نەمەرە- شوبەرە ءسۇيۋدى ارماندايدى. وزدەرىنىڭ ەكى ۇلى - كيريلل مەن دەنيس بولەك تۇرادى.

كىشكەنتايلارىنان تاعدىردىڭ تالكەگىن كورگەن كسەنيا، ناستيا، كارينا، الينا، ماريا، لۋيزا قازىر اكە مەن شەشەنىڭ مەيىرىمىنە بولەنىپ، باقىتتى عۇمىر كەشىپ جاتىر. دوستىعى مىعىم، بەرەكەلى وتباسىنىڭ بالالارىنىڭ ۇلكەنى - 24 جاستا، كىشىسى - 10 جاستا. بۇل ۇيدەگى ءار بالانىڭ تاعدىرى سان ءتۇرلى. التى بالانىڭ ءارقايسىسى ءتۇرلى ۇلتتان.

«اسىراپ العان بالالارىمىزعا دەيىن بىزدە جاعدايى تومەن وتباسىنىڭ بالاسىن تاربيەلەۋ تاجىريبەسى بولدى. ءبىز انارا اتتى قىزعا رەسمي تۇردە قامقورلىق جاسادىق. تەك بالاعا كوڭىل ءبولىپ، جاقسى كوردىك. انارا ءبىزدىڭ بالالارمەن قاتار ءوستى. جۇبايىم ەكەۋمىز قىزىمىزدىڭ باقىتتى بولعانىنا قۋانىشتىمىز. قازىر ول 37 جاستا، تۇرمىستا، 4 بالانىڭ اناسى»، - دەدى قۇتقارۋشى نيكولاي.

دەگەنمەن، سوبوليەۆسكيلەر وتباسى ءارتۇرلى جانە بەيتانىس بالالاردى تاربيەلەۋ وڭاي بولمايتىنىن بىلگەن. تاتيانانىڭ ايتۋىنشا، بارلىق قيىندىقتاردى ەڭسەرۋىمىز نيكولايدىڭ قولداۋىنىڭ ارقاسى دەيدى.

«ءبىز ەشقاشان اكەمىزدىڭ بىرەگەيلىگىنە كۇماندانعان ەمەسپىز. ول بولماسا، مەن ءبىر ءوزىم شەشىم قابىلداي الار ما ەدىم؟ جوق. بارلىعى ونىڭ قولداۋىمەن! قيىندىقتار مەن ۋايىمدار... ولار كىمدە جوق؟ بارلىق كوپ بالالى وتباسىلارداعىداي. بۇگىنگى تاڭدا ءبىزدىڭ قىزدارىمىز كەرەمەت انا بولاتىنىنا كۇمانىمىز جوق جانە اتا-انالارىنىڭ قاتەلىكتەرىن قايتالامايدى دەپ سەنىمدى تۇردە ايتا الامىز»، - دەيدى تاتيانا.

ءاربىر قىز بالا ءۇشىن اكە - الەمدەگى ەڭ جاقسى ادام ەكەنى ءسوزسىز. نيكولاي اناتوليەۆيچ قيىن قىزمەتىنە قاراماستان ءارقاشان وتباسى ءۇشىن ۋاقىت تابادى. قىزدارىنىڭ ايتۋىنشا، ول جۇمىستا قاتال بولعانىمەن ۇيدە جۇمساق، ءارى قامقور.