ەلوردادا ابايدىڭ گيپەررەاليستىك ەكسكليۋزيۆتى ءمۇسىنى تانىستىرىلدى
ءمۇسىن بالاۋىز بەن سيليكون ماتەريالدارىنان جاسالعان. ەلىمىزدە سيرەك كەزدەسەتىن گيپەررەاليستىك باعىتتاعى ءمۇسىننىڭ اۆتورى - تالانتتى سۋرەتشى ءارى ءمۇسىنشى ايدوس ەسماعامبەتوۆ. ول بۇعان دەيىن ەلباسى نۇرسۇلتان نازاربايەۆتىڭ، باراك وبامانىڭ، ابىلاي حاننىڭ جانە گەنەرال- پولكوۆنيك ساعادات نۇرماعامبەتوۆتىڭ گيپەررەاليستىك مۇسىندەرىن جاساعان.
«بيىل ۇلى ويشىل، كەمەڭگەر اقىن ابايدىڭ 175 جىلدىعى ەلىمىزدە كەڭىنەن اتاپ وتىلۋدە. اقىننىڭ باعا جەتپەس ەڭبەكتەرىن دارىپتەۋ - ءبىزدىڭ ازاماتتىق پارىزىمىز. ابايعا دەگەن قۇرمەتىمىزدىڭ ءبىر بەلگىسى، ۇلى اقىننىڭ تۇلعاسىن دارىپتەۋگە ارنالعان ءىس- شارانىڭ ءبىرى - اباي ءمۇسىنىنىڭ تۇساۋكەسەرى. قازاقستاندا بالاماسى جوق جاڭا تۋىندىنىڭ اۆتورى - گيپەررەاليست ءمۇسىنشى، «قازاق كونسەرت» ۇيىمىنىڭ سۋرەتشىسى، 100 جاڭا ەسىم جوباسىنىڭ جەڭىمپازى ايدوس ەسماعامبەتوۆ.
ول بۇل ءمۇسىندى بيىل 60 جىلدىق مەرەيتويىن اتاپ وتكەن «قازاق كونسەرت» ۇيىمىنا تارتۋ ەتىپ وتىر. ماڭىزدى ەكى مەرەيتويدى ءبىر- بىرىمەن وسىلايشا بايلانىستىرىپ، بارشا قازاق ەلىنە ەرەكشە سىي جاساعان ايدوسقا العىس ايتامىز. ابايدىڭ تۇلعاسى وسىلاي جاڭا قىرىنان ناسيحاتتالۋدا. بۇل ءمۇسىن بولاشاقتا ۇلى بريتانياداعى مادام تيۋسسو مۋزەيىنەن ورىن الادى دەپ سەنەمىز»، - دەيدى «قازاق كونسەرتتىڭ» ديرەكتورى، قازاقستاننىڭ ەڭبەك سىڭىرگەن قايراتكەرى جەڭىس سەيدوللا ۇلى.
ايدوس ەسماعامبەتروۆتىڭ ايتۋىنشا، ۇلى ابايدىڭ وسى ءمۇسىنىن جاساۋعا ءتورت اي ۋاقىت كەتكەن. مۇسىنگە قاجەتتى كەيبىر ماتەريال قازاقستاندا ساتىلمايدى، سوندىقتان ونى شەتەلدەن ساتىپ الۋعا تۋرا كەلگەن.
«بۇل ءمۇسىندى جاساۋ ءۇشىن ابايدىڭ سۋرەتىنىڭ ءتۇپنۇسقاسى كەرەك بولدى. ينتەرنەتتە ونىڭ سۋرەتتەرى مەن بەينەسى كوپ. ءبىراق ول سۋرەتتەردى ۇلعايتقان كەزدە بۇلدىراپ كەتەدى دە، ونى انىق قاراۋ مۇمكىندىگى بولمايدى. سوندىقتان اباي مۇراجايىنا حابارلاسىپ، ابايدىڭ ءتۇپنۇسقا سۋرەتىن سۇرادىم. سونداي- اق، سول كەزەڭمەن سايكەس كەلۋى ءۇشىن ارنايى شاپانعا دا تاپسىرىس بەردىم»، - دەيدى ول.
اۆتور: زارينا قاھارمان
