التايدا وقۋشىلار مىندەتتى تۇردە اتقا ءمىنۋ ساباعىن وقيدى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

التاي قالاسىندا مەكتەپ وقۋشىلارىنا ارنالعان ات سپورتى ساباعى قايتا باستالادى - «اعاجاي- التاي» سايتى

2019 -جىلى قىتايدىڭ التاي قالاسىندا مەكتەپ باعدارلاماسىنا ەنگىزىلگەن ات سپورتى ساباعى بيىلعى جاڭا وقۋ ماۋسىمىندا قايتا باستالدى، دەپ حابارلايدى kazakh.altxw.com سايتى.

اتالعان ب ا ق- تىڭ جازۋىنشا، وتكەن جىلى بۇل ەرەكشە دەنە شىنىقتىرۋ ساباعىنا التايداعى 10 مىڭ جاس ءوسپىرىم قاتىسقان. بيىلعى جىلى جاڭا وقۋ ماۋسىمدا ات سپورتى ساباعىنا 4-8-سىنىپ وقۋشىلارى قاتىسپاق. وسى اتقا ءمىنۋدى ۇيرەتىپ، ات سپورتى ونەرىنە باۋليتىن ەرەكشە باعدارلاما التاي قالاسىنداعى مەكتەپ وقۋشىلارىنىڭ ءسوزسىز وقيتىن مىندەتتى ساباعىنا اينالعان.

جەرگىلىكتى ۇكىمەتپەن 10 جىلدىق وقىتۋ تۋرالى كەلىسىمگە كەلىپ، وقۋ-ماتەريالدىق بازاسىن ۇسىنىپ وتىرعان «التايدىڭ التىن قاندى اسىل تۇقىمدى جىلقى شارۋاشىلىعى» ج ش س 3 ميلليون يۋان قارجىعا تالاپقا ساي ات سپورتىنا ارنالعان جاتتىعۋ الاڭدارىن جاساپ جانە جاڭا جابدىقتار ساتىپ العان. مۇندا وقۋشىلارعا جىلقى شارۋاشىلىعى بويىنشا جوعارى وقۋ ورىندارىنان ءبىلىم العان بىلىكتى ۇستازدار ساباق بەرەدى.

«ات سپورتى ساباعىندا وقۋشىلار الدىمەن جىلقىلاردىڭ تىرشىلىك ەتۋ ورتاسى مەن جىلقىلاردىڭ جالپى سيپاتى جانە ات سپورتى ونەرى تۋرالى جان- جاقتى ماعلۇماتتارمەن تانىسادى. سودان كەيىن اتقا ءمىنۋدى ۇيرەنەدى. مامانداردىڭ ايتۋىنشا، بۇل باعدارلاما وقۋشىلاردىڭ كۇيزەلىسىن جەڭىلدەتىپ، دەنە شىنىقتىرۋ ساباعىنا قىزىعۋشىلىعىن ارتتىرادى. سونداي- اق، جاستاردىڭ وزىنە دەگەن سەنىمدىلىگىن كۇشەيتىپ، ات ۇستىندە تەپە- تەڭدىكتى ساقتاي وتىرىپ، دەنە ءبىتىمىنىڭ شىمىر، ءتۇزۋ وسۋىنە، اعزانى نىعايتاۋعا كومەكتەسەتىن ەرەكشەلىكتەرى بار. سونىمەن بىرگە بۇل باعدارلامانىڭ نەگىزگى ماقساتتارىنىڭ ءبىرى جەرگىلىكتى جىلقى مادەنيەتىن قورعاۋ جانە ونى بۇگىنگى ۇرپاققا ناسيحاتتاپ قالدىرۋدى كوزدەيدى. جالپى التايداعى وقۋشىلاردىڭ دەنە شىنىقتىرۋ ساباعى شاڭعى تەبۋ مەن ات سپورتى ونەرىن ۇيرەنۋگە باسىمدىق بەرىلگەن»، - دەپ جازادى «التاي اقپارات» سايتى.

ادامنىڭ ازامات قاتارىنا قوسىلۋىنىڭ ءوزىن «ات جالىن تارتىپ ءمىندى» دەپ بەينەلەيتىن قازاق حالقى ءۇشىن جىلقى تۇلىگى قاشاندا ەرەكشە ماڭىزعا يە بولعان.

قىتايداعى قازاقتار شوعىرلى قونىستانعان التاي ايماعىنداعى ءتول مادەنيەتىمىزدى ۇلىقتاعان، قازاق ەلىنە ۇلگى بولارلىق بۇل جاڭالىعى كوڭىلگە قۋانىش ۇيالاتادى. وسى دەرەككوزىنىڭ جازۋىنشا، ات سپورتى ونەرىن ۇيرەنۋ ساباعىندا، وقۋشىلار بۇرىن اتقا ءمىنىپ كورمەگەن سوڭ، باستاپقىدا قورىققان. كەيىننەن وقۋشىلار اتتىڭ قاسىنا بارىپ، باسىنان سيپاپ، جەتەلەپ، ءمىنىپ كورىپ ۇيىرەنە باستايدى. وسىلايشا التاي جەرىندە ءومىر سۇرگەن، ات جالىندا وسكەن اتالارىنىڭ جولىن قۋىپ، مادەنيەتىن ساقتاپ، جالعاستىرۋشى ۇرپاقتارى ءتول مادەنيەتىن قايتا بويىنا دارىتپاق نيەتتە. قىتاي ەلىندە مۇنداي وڭىرلىك ەرەكشەلىككە يە مىندەتتى كۋرستاردى ۇيرەتۋ ءداستۇرى قالىپتاسقان ەكەن. مىسالى، التايدا وقۋشىلارعا اتقا ءمىنۋ ساباعى وقىتىلسا، گۋانجوۋدا وقۋشىلار «سورپا جاساۋدى»، حايناندا سۋدا ءجۇزۋدى مىندەتتى ساباققا ەنگىزگەن.

گورگاندا اباي مادەني- ادەبي ورتالىعى اشىلدى - «فارس» اقپارات اگەنتتىگى

يراننىڭ سولتۇستىگىندە ورنالاسقان گۇلستان وبلىسىنىڭ ورتالىعى گورگان قالاسىنداعى قازاقستان رەسپۋبليكاسىنىڭ باس كونسۋلدىعىندا اباي مادەني- ادەبي ورتالىعى اشىلدى، دەپ جازادى «فارس» اقپارات اگەنتتىگى.

«قازاقتىڭ ۇلى اقىنى ابايدىڭ 175 جىلدىعى جانە الەمگە ايگىلى ويشىل ءارى فيلوسوف ءال- فارابيدىڭ 1150 جىلدىعىنا وراي 9 -قاراشادا قازاقستان رەسپۋبليكاسىنىڭ گورگانداعى باس كونسۋلدىعىندا قازاقستان ەلشىسى اسحات ورازباي، گۇلستان وبلىسى اكىمىنىڭ ورىنباسارى، باسقا دا لاۋازىمدى تۇلعالار جانە يراندىق قازاقتاردىڭ قاتىسۋىمەن اباي مادەني- ادەبي ورتالىعىنىڭ رەسمي اشىلۋ سالتاناتى ءوتتى. بۇل راسىمدە ابايدىڭ ولەڭدەرى مەن قارا سوزدەرىن پارسى تىلىنە اۋدارعان يراندىق قازاق قاجى مۇحاممەد شادكام قازاقستان ۇكىمەتى تاراپىنان ەكىنشى دارەجەلى «دوستىق» وردەنىمەن ماراپاتتالدى»، - دەپ جازادى «فارس» اقپارات.

قورقىت اتا فيلم فەستيۆالى وتەدى - TRT

حالىقارالىق كينوماتوگرافيا قاۋىمداستىعى تاراپىنان ءبىرىنشى رەت ۇيىمداستىرىلاتىن قورقىت اتا تۇركى الەمى فيلم فەستيۆالى 8-12-جەلتوقسان كۇندەرى ارالىعىندا ستامبۋلدا وتەدى، دەپ جازادى تۇركيا راديو تەلەۆيزيا پورتالى.

«قورقىت اتا اتىمەن اتالعان فەستيۆال باعدارلاماسىندا تۇركى تىلدەرىندە تۇسىرىلگەن، تاۋەلسىز تۇركى رەسپۋبليكالارى مەن اۆتونومدىق جانە باسقا دا تۇركى حالىقتارى مەكەندەگەن ايماقتارىنان 43 فيلم كورسەتىلەدى. قورقىت اتا اتىنداعى بۇل فەستيۆال الداعى ۋاقىتتا داستۇرگە اينالىپ، جىل سايىن تۇركى الەمىنىڭ مادەنيەت استاناسى بولىپ تاڭدالعان قالادا ءوتىپ وتىرادى. فيلم فەستيۆالىنىڭ باعدارلاماسىن www.turkdunyasifilmfestivali.org سىلتەمەسىنەن كورۋگە بولادى»، - دەپ حابارلايدى TRT.

تۇڭعىش رەت «ۇركەر» ۇلتتىق جۋرناليستيكا سىيلىعى شەتەلدەگى قازاق ءتىلدى ب ا ق- قا بەرىلدى - KAZNEWS

13-قاراشا كۇنى نۇر-سۇلتان قالاسىندا باسپا، راديو جانە ينتەرنەت-جۋرناليستيكا سالاسىنداعى «ۇركەر - 2020» ۇلتتىق سىيلىعىنىڭ جەڭىمپازدارىن ماراپاتتاۋ ءراسىمى ءوتتى، دەپ جازادى موڭعوليالىق KAZNEWS اقپاراتتىق پورتالى.

«بيىل «وتانداستار قورىنىڭ» ۇسىنىسىمەن جانە اقپارات جانە قوعامدىق دامۋ مينيسترلىگىنىڭ قولداۋىمەن «ۇركەر» ۇلتتىق سىيلىعى «قازاقپارات» حالىقارالىق اقپارات اگەنتتىگىنىڭ 100 جىلدىعىنا وراي شەتەلدەگى قازاق ءتىلدى ب ا ق وكىلدەرىنە ارنايى ءبىر نوميناتسيا تاعايىندالعان.

بايقاۋعا رەسەي، وزبەكستان، موڭعوليا، تۇركيا، يران مەملەكەتتەرىنەن 10 ۇمىتكەر قاتىستى. قازىلار القاسىنىڭ شەشىمىمەن موڭعوليا رەسپۋبليكاسىنداعى قازاق ءتىلدى kaznews.mn سايتى جەڭىمپاز اتاندى.

ايتا كەتەيىك، «وتانداستار قورى» مەن «قازاقپارات» حالىقارالىق اقپارات اگەنتتىگى بىرلەسە جۇمىس ىستەپ كەلەدى. 2019 -جىلى ەكى تاراپتىڭ قولداۋىمەن شەتەلدەگى قازاق ءتىلدى بۇقارالىق اقپارات قۇرالدارىنىڭ جيىنى ۇيىمداستىرىلدى.

اتالعان ماجىلىستە شەتەلدەگى قازاق ءتىلدى ب ا ق بىرلەستىگىن قۇرۋ ۇسىنىلدى. سونداي-اق، 2020 -جىلى اقپارات جانە قوعامدىق دامۋ مينيسترلىگىنىڭ «شەتەلدىك جانە قازاقستان رەسپۋبليكاسىنا كەلگەن ەتنيكالىق قازاقتاردى قولداۋدى قامتاماسىز ەتۋ جونىندەگى قىزمەتتەر» باعدارلاماسى شەڭبەرىندە 80 استام شەتەلدەگى قازاق ءتىلدى ب ا ق-تىڭ دەرەكقورى انىقتالدى. ەندى 2021 -جىلى شەتەلدەگى قازاق ءتىلدى ب ا ق بىرلەستىگىن قۇرۋ جوسپارلانعان»، - دەپ جازادى KAZNEWS پورتالى.

يران مەن قازاقستاننىڭ ەكىجاقتى ىنتىماقتاستىعىن ودان ءارى دامىتۋ تالقىلاندى - «فارس» اقپارات اگەنتتىگى

ي ي ر- نىڭ الماتىداعى باس كونسۋلى مەن الماتى وبلىسىنىڭ اكىمى ەكى ەلدىڭ قارىم- قاتىناسىن دامىتۋ، اسىرەسە وبلىسارالىق ارىپتەستىكتى كەڭەيتۋ قاجەتتىگىن قۋاتتادى، دەپ جازادى «فارس» اقپارات اگەنتتىگى.

«ي ي ر- نىڭ الماتىداعى باس كونسۋلى موحسەن فاعاني بەيسەنبى كۇنى الماتى وبلىسىنىڭ اكىمى اماندىق باتالوۆپەن كەزدەسىپ، يران وبلىستارىنىڭ قازاقستاننىڭ وبلىستارىمەن ءتۇرلى سالادا ارىپتەستىك جاساۋعا دايىن ەكەنىن مالىمدەدى. سونداي- اق فاعاني يراننىڭ ەۋرازيا ەكونوميكالىق وداعىمەن پرەفەرەنتسيالىق ساۋدا كەلىسىمىنە قول قويۋىن ەكىجاقتى ارىپتەستىكتى دامىتۋعا جاسالعان جاعداي دەپ اتادى. وسى كەزدەسۋدە الماتى وبلىسىنىڭ اكىمى اماندىق باتالوۆ: «يرانمەن ونەركاسىپ، اۋىل شارۋاشىلىعى مەن تۋريزم سالالارىندا ارىپتەستىك جاساۋ ءۇشىن الماتىدا وتە جاقسى الەۋەتتەر بار»، - دەدى»، - دەپ جازادى parstoday .

تامدى اۋدانىندا «ونەر اپتالىعى-2020» بايقاۋى ءوتتى - «تامدى شارۋاگەرى» گازەتى

وزبەكستان رەسپۋبليكاسىنىڭ ناۆوي وبلىسى، تامدى اۋدانىندا جاستار اراسىندا جاڭا دارىندى، قابىلەتتى جانداردى انىقتاۋ ماقساتىندا «ونەر اپتالىعى-2020» بايقاۋى ءوتتى، دەپ جازادى وزبەكستاندا شىعاتىن «تامدى شارۋاگەرى» گازەتى.

«جاستاردىڭ مۋزىكا، بەينەلەۋ ونەرى، ادەبي شىعارماشىلىق، تەاتر جانە ونەردىڭ باسقا دا تۇرلەرىنە قىزىعۋشىلىقتارىن ارتتىرۋ، جاستار اراسىندا جاڭا دارىندى، قابىلەتتى جانداردى انىقتاۋ ماقساتىندا تامدى اۋداندىق مۋزىكا جانە ونەر مەكتەبى عيماراتىندا «ونەر اپتالىعى-2020» بايقاۋى ۇيىمداستىرىلدى.

«ناعىز ونەردى جاندى داۋىستا ورىندايمىز» ۇرانىمەن وتكەن «ونەر اپتالىعى» كوپشىلىك كورەرمەندەر كۇتكەندەي ءماندى دە مازمۇندى ءوتتى»، - دەپ جازادى وزبەكستاندا شىعاتىن «تامدى شارۋاگەرى» گازەتى.

اۆتور: باقىتجول كاكەش