اكە-شەشەمدى رەنجىتىپ الۋدان قورقامىن - ديماش قۇدايبەرگەن

نۇر-سۇلتان. قازاقپارات - ديماش قۇدايبەرگەن اتاقتى ءانشى بولعاننان باستاپ نەدەن ساقتاناتىنىن رەسەيلىك مۋز-ت ۆ ارناسىنا ايتىپ بەردى، دەپ حابارلايدى قازاقپارات ءتىلشىسى.

«قىتايداعى «I am a singer» جوباسىنىڭ العاشقى تۋرىنان كەيىن كەلەسى كۇنى كەلەسى باعدارلاماعا ارناپ دەرەكتى فيلم ءتۇسىرۋىمىز كەرەك بولاتىن. ۇيىمداستىرۋشىلار ءسال كەشىگىپ كەلەتىنىن حابارلادى. مەن قوناق ۇيدەن شىعىپ بارا جاتقاندا ءبىرىنشى رەت كۇزەتپەن ءجۇردىم. ادامدار ماعان جاقىنداپ، ۇمتىلا باستادى. قۋانىشتى ەدىم سول ساتتە. ەكىنشىدەن، ازداعان ۇرەي پايدا بولدى، سەبەبى جانكۇيەرلەرىم شىعارماشىلىعىما جان-تانىمەن بەرىلگەنىن شىن سەزىندىم. ءوز-ءوزىمدى ۇستاپ ارى قاراي جىلجۋىم كەرەك بولدى. سول كەزدە پايدا بولعان ازداعان ۇرەي ءالى دە بار. ءبىراز جىلدان كەيىن مەنى دە ۇمىتىپ كەتەدى-اۋ دەگەننەن قورىقپايمىن. ولاردى رەنجىتىپ الام با دەگەننەن جاسقانامىن. اتا- اناما، دوستارىما ءاردايىم ۇنامدى بولعىم كەلەدى. اكە- شەشەمدى رەنجىتىپ الۋدان قورقامىن»، - دەدى ديماش قۇدايبەرگەن رەسەيلىك مۋز-ت ۆ ارناسىنىڭ باس ديرەكتورى ارمان داۋلەتياروۆقا بەرگەن سۇحباتىندا.

سۇحبات بارىسىندا ءانشى ءوزىنىڭ اتا-اناسىنىڭ ومىردەگى ءرولى تۋرالى ويىمەن ءبولىستى. «سەرىكتەسە جۇمىس جۇرگىزەتىن ءارتۇرلى ەلدە ءارتۇرلى پروديۋسەرلەر بار. ءبىراق ەشقايسىسى ماعان قارىز ەمەس. ءبارى دە دوستىق پەن سەنىمگە نەگىزدەلگەن. ومىردەگى باستى شەشىمدەردىڭ ءبارىن دە ەرەسەك ادام رەتىندە ءوزىم قابىلدايمىن. ايتسە دە اكەممەن كوپ اقىلداسامىن، سەبەبى ول اقىلدىراق، تاجىريبەسى مولىراق. اكەم مەن شەشەمنىڭ جانىندا ءوزىمدى جايلى سەزىنەمىن. ومىردەگى ەڭ باستى باقىت - تۋعاندارىڭنىڭ جانىندا بولىپ، ولاردىڭ ماحابباتىن، جىلۋىن سەزىنۋ. اكەم مەن شەشەم ومىردەگى بارىم دەسەم دە بولادى. ءوزىمدى قالاي ۇستاپ، قانداي جاعدايعا دا دايىن بولۋىم كەرەكتىگىن تۇسىندىرگەن اتا- اناممەن ماقتانامىن»، - دەدى ديماش قۇدايبەرگەن.

اۆتور: ايان بەكەن ۇلى