قازاقستاندا «بايلىق سالىعىن» ەنگىزۋ ۇسىنىلدى

نۇر-سۇلتان. قازاقپارات - سالىق كودەكسىنە ەنگىزىلەتىن وزگەرىستەر لەگى تالقىلاعان سەنات وتىرىسىندا دەپۋتات مۇرات باقتيار ۇلى بايلىق سالىعىن ەنگىزۋدى ۇسىندى، دەپ حابارلايدى قازاقپارات ءتىلشىسى.

«مەملەكەت باسشىسى 2019 -جىلعى جولداۋىندا «جالپى ىشكى ءونىم مەن حالىق تابىسىنىڭ ارتۋىنا قاراماستان قوعامدا مۇلىكتىك جىكتەلۋ ۇدەرىسى ساقتالىپ وتىر، ءتىپتى كۇشەيىپ بارادى. بۇل - الاڭداتارلىق فاكتور. سوندىقتان وعان ەرەكشە نازار اۋدارۋ كەرەك» دەگەن بولاتىن.

بۇل ماسەلەنى شەشۋدىڭ كوپتەگەن جولى بار. سونىڭ ءبىر جولى رەتىندە بايلىققا سالىق سالۋدى ەنگىزۋدى قاراۋعا بولادى. مۇنداي حالىقارالىق تاجىريبە كوپتەگەن ەلدە بار. بيۋدجەتكە تۇسەتىن تۇسىمدەردى ءسان-سالتاناتقا ارنايى سالىق ەنگىزۋ بۇگىنگى كۇنى وتە وزەكتى ماسەلە بولىپ سانالادى. اۋقاتتى قازاقستاندىقتار حالىق الدىندا الەۋمەتتىك جاۋاپكەرشىلىكتە بولۋعا جانە ءوز بايلىعىن ەلدىڭ دامۋىنا باعىتتاۋى ءتيىس. تاۋەلسىزدىكتىڭ 30 -جىلدىعىنىڭ ىشىندە حالىقتىڭ باي مەن كەدەي توپتارىنىڭ اراسىنداعى الشاقتىق ايتارلىقتاي وسكەنىن كورىپ وتىرمىز. بۇل جەردە ماسەلە ياحتالار، ۇشاقتار، ەليتالى جىلجىمايتىن مۇلىكتەر، قىمبات اۆتووكلىكتەر، زەرگەرلىك بۇيىمدار سەكىلدى ءسان- سالتاناتتى زاتتارعا سالىق سالۋعا قاتىستى بولىپ وتىر. بايلىق سالىعىن ەنگىزۋ - سالىق سالۋدىڭ ادىلەتتى جۇيەسىن قالىپتاستىرادى دەپ ەسەپتەيمىن»، - دەدى مۇرات باقتيار ۇلى سالىق كودەكسىنە ەنگىزىلەتىن وزگەرىستەر لەگى تالقىلانعان پارلامەنت سەناتىنىڭ وتىرىسىندا.

بۇل ماسەلەگە بايلانىستى دەپۋتات ۇلتتىق ەكونوميكا ءمينيسترى رۋسلان دالەنوۆتىڭ ۇستانىمىن سۇرادى.

«ارينە مۇنداي جوسپارىمىز بار. قازىرگى تاڭدا جاڭا سالىق كودەكسىندە ادىلەتتى جانە ايقىن پرينسيپتەر كوزدەلگەن. سالىق سالۋ - تابىستاردى تەڭەستىرۋدىڭ ءتيىمدى قۇرالدارىنىڭ ءبىرى. وندا ەكى باعىت بار. بۇل - مۇلىكتىڭ باعاسىنا قاراي جوعارى سالىق سالۋ جانە تاپقان تابىسقا سالىق سالۋ. تابىسقا سالىق سالۋ نەمەسە جەكە تابىس سالىعى بويىنشا ەلدە 10 پايىزدىق ءبىرىڭعاي مولشەرلەمە قولدانىلادى. ءبىراق تومەندەتىلگەن مولشەرلەمە دە بار. 70 مىڭ تەڭگەگە دەيىنگى تابىستار قوسىمشا شەگەرىمدەر قولدانىلادى. ياعني بۇل رەتتە تابىستارعا تومەن سالىق سالىنادى. وسىلايشا جەكە تابىس سالىعى بويىنشا ديففەرەنسيالانعان ءادىس قولدانىلادى. سالىق كودەكسىندە كولىك سالىعى، مۇلىك سالىعى بويىنشا ۇلكەن ايىرماشىلىق بار. مۇلىكتىڭ قۇنى جوعارى بولسا وعان سالىناتىن سالىقتىڭ دا مولشەرى جوعارى بولادى. كولىك سالىعى بويىنشا ايىرماشىلىق 8-600 مىڭ تەڭگە ارالىعىندا تۇر. مەنىڭ ويىمشا بۇل سالىق سالۋدىڭ بۇل ءادىسى ءتيىمدى قۇرال. سالىق سالۋ ارقىلى تەڭسىزدىكتى تومەندەتۋگە بولادى»، - دەدى مينيستر.

اتالمىش ماسەلە بويىنشا سەنات ءتوراعاسى ماۋلەن اشىمبايەۆ رۋسلان دالەنوۆكە بۇل ماسەلەنى ءجىتى نازارعا الۋدى تاپسىردى.