لوندوندا ابايدىڭ اعىلشىن تىلىندەگى جيناعى جارىق كوردى

None
None
لوندون. قازاقپارات - ۇلى بريتانيادا قازاقتىڭ ۇلى اقىنى اباي شىعارمالارىنىڭ اعىلشىن تىلىندەگى جاڭا جيناعىنىڭ ونلاين تۇساۋكەسەرى ءوتتى، دەپ حابارلايدى قازاقپارات.

كىتاپتىڭ باستى ەرەكشەلىگى ۇلى ويشىل ەڭبەكتەرىنىڭ قازاق تىلىنەن تىكەلەي، ءتۇپنۇسقاعا بارىنشا جاقىن اۋدارىلۋىندا. بۇعان دەيىن ابايدىڭ ولەڭدەرى مەن قارا سوزدەرى ورىسشادان ءتارجىمالانعان بولاتىن.

جوبانى ۇلتتىق اۋدارما بيۋروسى جانە الەمگە ايگىلى كەمبريدج ۋنيۆەرسيتەتىنىڭ باسپاسى ابايدىڭ 175 جىلدىعى قارساڭىندا جانە «رۋحاني جاڭعىرۋ» باعدارلاماسى اياسىندا جۇزەگە اسىرىپ وتىر.

تۇساۋكەسەر بريتانيالىق ۇلتتىق كىتاپحانادا وتەدى دەپ جوسپارلانعان بولاتىن. ءبىراق انگليادا ەكىنشى جالپىۇلتتىق لوكداۋننىڭ جاريالانۋىنا بايلانىستى ونلاين فورماتتا ۇيىمداستىرىلدى.

اباي ەڭبەكتەرى بۇعان دەيىن كەڭەس يدەولوگياسىنا سايكەس، ءىشىنارا عانا جانە ورىس تىلىنەن ءتارجىمالانىپ كەلگەن بولاتىن. ەندى ول بارىنشا تولىق جانە ءوز ءمانىن جوعالتپاعان ەرەكشە جيناق رەتىندە تاريحتا قالماق.

شارادا ءسوز العان ق ر مادەنيەت جانە سپورت ءمينيسترى اقتوتى رايىمقۇلوۆانىڭ ايتۋىنشا، اعىلشىن ءتىلى ميللياردتان استام ادامنىڭ ورتاق ءتىلى. ابايدىڭ تولىق شىعارمالار جيناعىنىڭ اعىلشىن تىلىنە اۋدارىلۋىن اقىن شىعارمالارى ميلليارد وقىرمانعا ۇسىنىلدى دەگەن ءسوز. ۇلتتىق اۋدارما بيۋروسى ءتارجىما ىسىنە بريتانيالىق تاجىريبەلى اۋدارماشىلاردى تارتقان.

سوڭعىلارى قازاقشادان تۋرا اۋدارىلعان ءماتىندى اعىلشىننىڭ ادەبي تىلىندە سويلەتكەن. اۋدارماشىلار الدىمەن ۇلى اقىننىڭ شىعارماشىلىعىن تەرەڭ زەرتتەپ، ونىڭ تۇڭعيىعىنا بويلاعاندارىن ايتادى.

بريتانيالىق تانىمال اۋدارماشى ءارى اقىن شون و’برايەننىڭ پايىمداۋىنشا اباي ولەڭدەرىنە اعىلشىن تىلىندە جان ءبىتىرۋ وڭايعا تۇسپەگەن.

«اۋدارمانىڭ ءساتتى شىعۋى ءۇشىن كاسىبي كۇش-جىگەرىمدى ايامادىم. اۋەزدىلىگىن، ءمانىن تولىق جەتكىزە ءبىلۋ، سويلەم قۇرىلىمىن ساقتاۋ، دراماتيزمدى ۇستانۋ، ءبارى-ءبارى مەن ءۇشىن وتە ماڭىزدى بولدى»، - دەيدى و’برايەن.

كەمبريدج ۋنيۆەرسيتەتى باسپاسىنىڭ باسشىسى پيتەر فيلليپس: «بۇل جوبانى جۇزەگە اسىرا وتىرىپ، قازاقستاندىق سەرىكتەستەرىمىزبەن بىرگە جاھاندىق اۋديتورياعا قازاقتىڭ باي مۇراسىن جەتكىزەمىز دەگەن ۇمىتتەمىز. جيناققا اقىننىڭ 145 ولەڭى، 3 پوەماسى جانە قارا سوزدەرى ەنگىزىلگەن»، دەدى.

بۇل كوممەرتسيالىق جوبا ەمەس جانە پايدا تابۋدى كوزدەمەيدى. ازىرگە شەكتەۋلى تيراجبەن شىعارىلاتىن كىتاپتار قازاقستاننىڭ ۇلى بريتانياداعى ەلشىلىگىنىڭ ىقپال ەتۋىمەن جەرگىلىكتى ۋنيۆەرسيتەتتەر مەن كىتاپحانالارعا تاراتىلاتىن بولادى. بۇدان بولەك ونى ونلاين دا وقۋ مۇمكىن بولماق.

سوڭعى جاڭالىقتار