ۆيكتوريا ترەگۋبوۆا: بويىمدا ورىس قانى تۋلاسا دا، جانىم – قازاق

نۇر- سۇلتان. قازاقپارات - ابايدىڭ مول مۇراسىن عاسىردان- عاسىرعا جەتكىزەتىن ءبىز - جاستارمىز. مۇنداي پىكىردى جۋرناليست ۆيكتوريا ترەگۋبوۆا ءبىلدىردى، دەپ حابارلايدى قازاقپارات ءتىلشىسى.

«مەن رەسەيدىڭ ۋليانوۆسك وبلىسىندا دۇنيەگە كەلدىم. انام - جامبىل وبلىسى مويىنقۇم اۋدانىنىڭ تۋماسى. مەكتەپ بىتىرگەن سوڭ، ءىلىم- ءبىلىم ىزدەپ، رەسەيگە اتتاندى. سول جاقتا اكەمدى جولىقتىرىپ، ەكەۋى شاڭىراق كوتەرەدى. ارادا بەس- التى جىل وتكەندە شەشەم اكەمدى توركىنىنە تانىستىرماق بولىپ، قازاقستانعا كەلەدى. اكەمە قازاق ەلىنىڭ قوناقجايلىعى ۇناعانى سونشالىق، ءبىز رەسەيگە قايتىپ ورالمادىق. مەن كىشكەنتاي ۇلانبەل اۋىلىندا ءوسىپ، سول جەردە قازاق تىلىندە ءبىلىم الدىم. ال، اعام مەملەكەتتىك ءتىلدى مەنەن جاقسى بىلەدى. بىزگە ۇيدەگىلەردەن تىس سىرلاسۋ قاجەت بولسا، ءبىز قازاق تىلىندە سويلەسۋگە كوشەمىز. وسىنداي ساتتە ولار بىزگە «ناعىز قازاقتار» دەپ ازىلدەيدى. مەنىڭ بويىمدا ورىس قانى تۋلاپ جاتسا دا، مەنىڭ جانىم - قازاق. سوندىقتان مەن ءارقاشان جانە بارلىق جەردە ءوزىمدى «ورىستىڭ قازاق قىزى» دەپ تانىستىرامىن»، - دەدى ول ەلباسى نۇرسۇلتان نازاربايەۆتىڭ توراعالىعىمەن وتكەن قازاقستان حالقى اسسامبلەياسى كەڭەسىنىڭ وتىرىسىندا.

سونىمەن قاتار، ول ق ر تۇڭعىش پرەزيدەنتىنىڭ باستاماسىمەن قولعا الىنعان «رۋحاني جاڭعىرۋ» باعدارلاماسى اياسىندا ۇلتتىق قۇندىلىقتارىمىز تۇگەندەلىپ، قايتا جاڭعىرعانىن باسا ايتتى. «ءسىز ءارقاشان ەتنوستاردىڭ قازاقستان ەكونوميكاسى مەن الەۋمەتتىك سالاسىنىڭ جانە مادەنيەتىنىڭ دامۋىنا قوسقان زور ۇلەسىن اتاپ جۇرەسىز. بيىل «قازاقستانداعى ەتنوستاردىڭ قازاقستان حالقىنىڭ ورتاق تاريحي- مادەني مۇراسىنا قوسقان ۇلەسى» جوباسى ىسكە اسىرىلدى. وندا ۆ. رادلوۆ، گ. بەلگەر، ە. برۋسيلوۆسكي جانە باسقالاردىڭ ەسىمدەرى جازىلعان. ولار بارلىق قازاقستاندىقتارعا رۋحاني جاقىن جانە ءبىزدىڭ بىرلىگىمىزدىڭ التىن ارقاۋى»، - دەدى ۆيكتوريا ترەگۋبوۆا.

سونىمەن قاتار، ول قازاقستان پرەزيدەنتى قاسىم- جومارت توقايەۆ باستاماشىلىق جاساعان اباي قۇنانباي ۇلىنىڭ 175 جىلدىعىنا ارنالعان پوەتيكالىق چەللەندجگە 1000 نان استام ءتۇرلى ەتنوس جاستارى بەلسەنە قاتىسقانىن ايتتى.

«اسسامبلەيانىڭ «جاڭعىرۋ جولى» جاستار قوزعالىسىنداعى دوستارىم الەۋمەتتىك جەلىلەردى ابايدىڭ ولەڭدەرىمەن، سوزدەرىمەن، اندەرىمەن تولتىردى. ابايدىڭ ارقاسىندا قازاق ءتىلى ءبىزدى - ءتۇرلى ەتنوس جاستارىن بىرىكتىردى. اباي شىعارماشىلىعىنا دەگەن ماحابباتىمدى وسى ءبىر ولەڭ جولدارىمەن پاش ەتكىم كەلەدى.

ولەڭ - ءسوزدىڭ پاتشاسى، ءسوز ساراسى،

قيىننان قيىستىرار ەر داناسى.

تىلگە جەڭىل، جۇرەككە جىلى ءتيىپ،

تەپ- تەگىس جۇمىر كەلسىن اينالاسى.

ولەڭگە اركىمنىڭ- اق بار تالاسى،

سوندا دا سولاردىڭ بار تاڭداماسى.

ءىشى التىن، سىرتى كۇمىس ءسوز جاقسىسىن

قازاقتىڭ كەلىستىرەر قاي بالاسى؟ عۇلاما ابايدىڭ مول مۇراسىن عاسىردان- عاسىرعا جەتكىزەتىن ءبىز - جاستارمىز. ەندەشە ابايدى بىرگە وقيىق، بىرگە زەرتتەپ- زەردەلەيىك، بىرگە تانيىق!» ، - دەدى ۆيكتوريا ترەگۋبوۆا.