ەكى دۇركىن «قازاقستان بارىسى» اتانعان ايبەك نۇعىماروۆ تويعا بارعانى ءۇشىن جازالانادى
ايبەك نۇعىماروۆتىڭ قالادا تويعا بارۋى سوڭعى ەكى كۇن ىشىندە قىزۋ تالقىلانعان جاڭالىقتاردىڭ ءبىرى بولدى. وسىعان وراي ش ق و ءبىلىم باسقارماسى تۇسىنىك بەردى.
«وبلىستىڭ بارلىق كوللەدجدەرى جاڭا 2020-2021 وقۋ جىلىنا دايىندىق شارالارىن قابىلدادى. اۋىلدىق جەرلەردە جانە شاعىن قالالاردا ورنالاسقان 6 كوللەدجدە عانا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ دەپارتامەنتىمەن كەلىسىم بويىنشا وقۋ جىلى بارلىق سانيتارلىق تالاپتاردى قاتاڭ ساقتاي وتىرىپ، ءداستۇرلى فورماتتا باستالدى. وسىنداي قيىن كەزەڭدە ستۋدەنتتەر مەن قىزمەتكەرلەردىڭ دەنساۋلىعىن ساقتاۋ - نەگىزگى ءارى ماڭىزدى ماسەلەنىڭ ءبىرى. مۇنداي كۇردەلى كەزەڭدە بارلىق جۇمىسشىلار مەن ستۋدەنتتەرگە ۇلگى بولاتىن ديرەكتوردىڭ ءوزى سانيتارلىق-ەپيدەميولوگيالىق تالاپتاردى بۇزىپ وتىر. ايبەك سەرىكبول ۇلى قازىرگى ۋاقىتتا ەڭبەك دەمالىسىندا. جۇمىسقا شىققاننان كەيىن ونى تارتىپتىك جاۋاپكەرشىلىككە تارتۋ ماسەلەسى قارالادى» دەلىنگەن ءبىلىم باسقارماسىنىڭ باسشىسى سايرانگۇل ءجۇمادىلوۆانىڭ جاۋابىندا.
ايتا كەتەيىك، سوڭعى كۇندەرى جەلىدە ايبەك نۇعىماروۆتىڭ تويدا جۇرگەن ۆيدەوسى تاراعان بولاتىن.
ايبەك نۇعىماروۆ قازاق كۇرەسىنەن ءتورت دۇركىن الەم چەمپيونى، ازيا چەمپيونى. قازاق كۇرەسىنەن الەم كۋبىگىنىڭ يەگەرى، قازاق كۇرەسى چەمپيوناتتارىنىڭ جەڭىمپازى، سامبودان قازاقستان رەسپۋبليكاسىنىڭ جەڭىمپازى. سونداي-اق، ەكى دۇركىن قازاق كۇرەسىنەن «قازاقستان بارىسى» اتاعىنىڭ يەگەرى.