التايداعى ءداستۇرلى قازاق ەمحاناسى جوعارى باعاعا يە بولدى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات- «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

شيرازدا وتە سيرەك كەزدەسەتىن مي وتاسى جاسالدى - «فارس» اقپارات اگەنتتىگى

بۇل وتا يران مەديتسيناسى ءۇشىن جاڭادان جاسالعان قادامداردىڭ ءبىرى، دەپ حابارلايدى parstoday.com.

بۇرىن مۇنداي وپەراتسيانى تەك امەريكاندىق جانە يتاليالىق دارىگەرلەر عانا جاسايتىن. ەندى يراندىق مەديتسينا ماماندارى دا بۇنداي كۇردەلى وتانى جاساي الاتىن بولعان. اتالعان ب ا ق- تىڭ كەلتىرگەن دەرەگىنە سۇيەنسەك، شيراز مەديتسينالىق ۋنيۆەرسيتەتى ماماندارىنىڭ ەرىك- جىگەرىمەن ەڭ سيرەك كەزدەسەتىن مي وتاسى نامازي اۋرۋحاناسىندا ءساتتى جاسالدى.

«بۇل وتا كەزىندە دارىگەرلەر ءبىر جارىم جاستاعى بالانىڭ ميىنداعى وڭ جارتىشارىن الىپ تاستادى. بالادا ميدىڭ وڭ جارتىشارىنىڭ بۇزىلۋىنا بايلانىستى تۇراقتى ۇستامالار بولعان. بۇرىن مۇنداي وپەراتسيانى تەك امەريكاندىق جانە يتاليالىق دارىگەرلەر جاساي الاتىن» ، دەپ جازادى «فارس» اقپارات اگەنتتىگى.

باتىس ايماقتاردىڭ چەمپيوناتى باستالدى - Kaznews 6

قاراشا كۇنى بايان- ولگەي ايماعىندا تەننيستەن ەرەسەكتەر مەن جاسوسپىرىمدەر اراسىنداعى باتىس ايماقتارىنىڭ چەمپيوناتى باستالدى، دەپ حابارلايدى موڭعوليالىق Kaznews اقپاراتتىق پورتالى.

موڭعوليانىڭ باتىس وڭىرىندە ورنالاسقان بەس ايماقتان 200 گە جۋىق سپورتشى باسەكەلەسەدى.

«توپتىق جانە جەكەلەي سىنعا ءتۇسىپ ءبىرىنشى، ەكىنشى ورىن يەلەنگەن سپورتشىلار ۇلانباتىر قالاسىندا وتەتىن ەل بىرىنشىلىگىنە قاتىسۋعا جولداما الادى. جارىس 7 - قاراشادا اياقتالادى» ، دەپ جازادى موڭعوليالىق ب ا ق.

قازاقستان دەنساۋلىق ساقتاۋ ءمينيسترى ىستانبۇلدا كەزدەسۋلەر وتكىزدى – TRT

تۇركيادا وتكەن دەنساۋلىق ساقتاۋ سالاسىنا ارنالعان عىلىمي كەڭەستىڭ ءتورتىنشى وتىرىسى اياسىندا ق ر دەنساۋلىق ساقتاۋ ءمينيسترى الەكسەي سوي ءبىرقاتار ماڭىزدى كەزدەسۋ وتكىزدى، دەپ حابارلايدى تۇركيا راديو تەليەۆيزيا پورتالى .

اتالعان ب ا ق- تىڭ كەلتىرگەن دەرەگىنە سۇيەنسەك، ا. سوي ددسۇ ەۋروپالىق بيۋروسىنىڭ وڭىرلىك ديرەكتورى حانس كليۋگەمەن كەزدەسۋ بارىسىندا ارىپتەستەرىنە اسىرەسە COVID-19-عا قارسى كۇرەس باعىتىندا ەۋرو ددسۇ تاراپىنان قازاقستانعا كورسەتىلگەن تەحنيكالىق قولداۋ ءۇشىن العىس بىلدىرگەن. سونداي- اق، ا. سوي تۇركى تىلدەس مەملەكەتتەر ىنتىماقتاستىعى كەڭەسىنىڭ باس حاتشىسى باعدات امىرەيەۆپەن دە كەزدەستى. سونىمەن قاتار، ا. سوي تۇركيانىڭ دەنساۋلىق ساقتاۋ ءمينيسترى فاحرەتين قوجا مىرزامەن كەزدەسىپ، دەنساۋلىق ساقتاۋ سالاسىنداعى ىنتىماقتاستىقتىق پەن فارماتسيا سالاسىنداعى بايلانىستى دامىتۋ جانە دەنساۋلىق ساقتاۋدى سيفرلاندىرۋ ماسەلەلەرىن تالقىلاعان.

«ا. سوي قىرعىز رەسپۋبليكاسىنىڭ دەنساۋلىق ساقتاۋ مينيسترىمەن جانە وزبەكستان رەسپۋبليكاسىنىڭ دەنساۋلىق ساقتاۋ ءمينيسترى الىشەر شادمانوۆپەن كەزدەستى. ارىپتەستەرىن قازاقستانداعى كوروناۆيرۋس ينفەكتسياسى بويىنشا ەپيدەميولوگيالىق جاعداي جايلى حاباردار ەتتى جانە كوروناۆيرۋس ينفەكتسياسىنىڭ ىقتيمال ەكىنشى تولقىنىنا دايىندىق اياسىندا ەلىمىزدە قابىلداعان شارالار تۋرالى ايتتى» ، دەپ تۇيىندەيدى TRT.

التايداعى ءداستۇرلى قازاق ەمحاناسى جوعارى باعاعا يە بولدى - «اعاجاي- التاي»

قازاق مەديتسيناسى - قازىرگى ۋاقىتتا قازاق شيپاگەرلىگى نەمەسە قازاق ەمشىلىگى دەپ اتالىپ ءجۇر. حالىق شيپاگەرلىگى وسى زامانعى مەديتسينا قالىپتاسقانعا دەيىن عاسىرلار بويى ۇلتىمىزدىڭ ءوسىپ- ونۋىنە وزىندىك ىقپالىن تيگىزىپ كەلدى. وسىلايشا عاسىرلار كەرۋەنىنەن سۇرىپتالىپ، كەمەلدەنىپ جەتكەن ءداستۇرلى مەديتسينا قازىرگى كۇنى قىتايدا تۇراتىن قانداستارىمىزدىڭ ورتاسىندا ءوز ومىرشەڭدىگىن ساقتاپ، قوعامنىڭ قاجەتىنە جاراپ كەلەدى.

وسى اپتادا قىتايدىڭ التاي قالاسىنداعى التاي ايماقتىق ءداستۇرلى قازاق مەديتسينالىق اۋرۋحاناسىنا مەديتسينالىق قىزمەت كورسەتۋ ساپاسىنا ىشكى جانە سىرتقى ساراپتامالاردى جۇرگىزىلدى. شىنجاڭ ولكەلىك دەنساۋلىق ساقتاۋ كوميتەتى قىتايشا جانە باسقادا ۇلتتىق ەمشىلىكتىڭ دارەجەسىن باعالاۋشى ماماندار توبى التاي ايماقتىق ءداستۇرلى قازاق مەديتسينالىق اۋرۋحاناسىنا «3ا» دارەجە بويىنشا تەكسەردى، دەپ حابارلايدى «اعاجاي- التاي» اقپاراتتىق پورتالى.

بۇل جولعى باعالاۋشى ماماندار مەملەكەتتىك دەنساۋلىق ساقتاۋ مينيسترلىگىنىڭ قاۋلىسى بويىنشا قازاق مەديتسينالىق اۋرۋحاناسىن جۇزدەگەن ولشەم جانە كورسەتكىش بويىنشا ساپا، باسقارۋ، قىزمەت كورسەتۋ جانە قاۋىپسىزدىك شارالارى سەكىلدى ءارتۇرلى تارماقتار بويىنشا ساراپتاما جاسادى. باعالاۋشى ماماندار توبىنىڭ مۇشەسى، شىنجاڭ ولكەلىك ۇيعىر مەديتسينالىق اۋرۋحاناسىنىڭ ورىنباسار باستىعى شين چىڭ التايداعى قازاق مەديتسينالىق اۋرۋحاناسىنا جوعارى باعا بەرگەن.

«التاي ايماقتىق اكىمشىلىك مەكەمەسىنىڭ قامقورلىعى مەن كومەگىندە، ايماقتىق قازاق مەديتسينالىق اۋرۋحاناسى قازىر وتە جاقسى دامىعانىنا كوزىمىز جەتتى. بۇل مەديتسينالىق اۋرۋحانا قىزمەتكەرلەرىنىڭ الەۋمەتتىك قۇرىلىمى، جوبالاۋ، قىزمەت وتەۋ قابىلەتى سىندى جاقتاردان جوعارى ساپا رەتىندە «3A» دارەجەلى دەگەن مەديتسينالىق دەڭگەيدە لايىق ەكەنىنە كوزىمىز جەتتى» ، - دەيدى باعالاۋشى شين چىڭ.

«ايماقتىق قازاق مەديتسينالىق اۋرۋحاناسىنىڭ «3A» دارەجەلى باعا الۋى اتالعان مەديتسينالىق ورتالىقتىڭ ۇلكەن جەتىستىكتەرىنىڭ ءبىرى. قازاق مەديتسينالىق ورتالىعى ەڭ باستىسى ويداعىداي قىزمەت كورسەتۋدى، دۇرىس دياگنوز قويۋدى، سونداي- اق ەمدەۋ ساپاسىن جوعارىلاتۋدا كوپتەگەن ناتيجەلەرگە قول جەتكىزدى. بۇل دەڭگەيگە قازاق مەديتسينالىق ەمحاناسىنىڭ بارلىق قىزمەتكەلەرى جۇدىرىقتاي جۇمىلىپ قىزمەت كورسەتۋى ارقىلى جەتكەنى بەلگىلى. ەگەر اتالعان ورتالىق بۇل جولعى «3A « دارەجەلى باعالاۋدان ءساتتى وتسە، بۇكىل ايماقتىڭ دەنساۋلىق ىستەرىنە سىڭىرگەن زور ۇلەسى بولماق. وسىلاي جالعاسا بەرسە، ءداستۇرلى مەديتسينانىڭ جالپى قوعامعا بەت الۋىنا، دۇنيە جۇزىنە تانىلۋىنا مۇمكىندىك تۋار ەدى.. .» ، دەپ تۇيىندەيدى kazakh.altxw.com.

بەرليندە «اباي ءۇيى» اشىلدى - TRT

بۇل تۋرالى اقپاراتتى وسى اپتادا تۇركيا راديو تەليەۆيزيا پورتالى دا حابارلادى. قازاقستان رەسپۋبليكاسى اقپارات جانە قوعامدىق دامۋ مينيسترلىگى، قر سىرتقى ىستەر مينيسترلىكتەرىنىڭ قولداۋىمەن «وتانداستار» قورى «دۇنيەجۇزى قازاقتارى قاۋىمداستىعى» ح ق ۇ- مەن بىرلەسىپ، بەرليندە (گەرمانيا) «اباي ءۇيى» قازاق مادەني- ىسكەرلىك ءۇيىنىڭ سالتاناتتى اشىلۋىن وتكىزدى، دەپ مالىمدەيدى TRT.

اتالعان ب ا ق- تىڭ دەرەگىنشە، ءىس- شارا اياسىندا «اباي ءۇيى» مادەني- ىسكەرلىك ءۇيىنىڭ تۇساۋكەسەرى ءوتىپ، وندا گەرمانياداعى قازاق قوعامداستىعىنىڭ مادەني، ىسكەرلىك جانە ءبىلىم بەرۋ قىزمەتىن قولداۋعا باعىتتالعان بىرلەسكەن جوبالاردى ىسكە اسىرۋ ماسەلەلەرى تالقىلاندى.

«ءىس- شاراعا قازاقستان رەسپۋبليكاسى اقپارات جانە قوعامدىق دامۋ مينيسترلىگى ەتنوسارالىق قاتىناستاردى دامىتۋ كوميتەتى ءتوراعاسىنىڭ ورىنباسارى ەركىن ۇيسىمبايەۆ، قازاقستان رەسپۋبليكاسى سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ قازاق دياسپوراسىمەن جۇمىس باسقارماسىنىڭ باسشىسى مۇحتار كارىباي، قازاقستاننىڭ گەرمانياداعى ەلشىلىگىنىڭ مادەنيەت جونىندەگى اتتاشەسى قۋانىش امىرعازيەۆ، «وتانداستار» قورى» ك ە ا ق ۆيتسە- پرەزيدەنتى ماعاۋيا سارباسوۆ، گەرمانيا- قازاقستان قوعامىنىڭ ديرەكتورى گالينا نۇرتازينوۆا، قازاقستان رەسپۋبليكاسىنىڭ بادەن- ۆيۋرتەمبەرگتەگى قۇرمەتتى كونسۋلى دوروتەيا حاللەر- لەيبلە، گەرمانياداعى قازاق قاۋىمىنىڭ وكىلدەرى جانە ت. ب. قاتىستى» ، دەپ جازادى تۇركيا راديو تەليەۆيزيا پورتالى.

ەسكە سالا كەتەيىك، بۇعان دەيىن «اباي ءۇيى» مادەني- ىسكەرلىك ۇيلەرى ومبىدا (رەسەي) ، تاشكەنتتە (وزبەكستان) ، ستامبۋلدا (تۇركيا) اشىلعان بولاتىن.

اۆتور: بەيسەن سۇلتان