ەربول ىرگەباي: عالىم قايىم مۇحامەدحانوۆتىڭ ەسىمىن ۇلىقتاي ءبىلۋىمىز كەرەك
6 قاراشا 15:26

ەربول ىرگەباي: عالىم قايىم مۇحامەدحانوۆتىڭ ەسىمىن ۇلىقتاي ءبىلۋىمىز كەرەك

نۇر-سۇلتان. قازاقپارات - نۇر-سۇلتان قالاسىنىڭ № 90-مەكتەپ- گيمنازياسىنىڭ ديرەكتورى، قايىمتانۋشى، قايىم مۇحامەدحانوۆتىڭ شىعارمالار جيناعىنىڭ 10-تومدىعىن قۇراستىرۋشى ەربول ىرگەباي عالىمنىڭ ەسىمىن ۇلىقتاۋ جولىندا بىرنەشە ۇسىنىس بارىن ءمالىم ەتتى، دەپ حابارلايدى قازاقپارات ءتىلشىسى.

«ءبىز «قايىم مۇحامەدحانوۆتىڭ ءومىرى مەن شىعارماشىلىعى ارقىلى جان-جاقتى دامىعان تۇلعانى قالىپتاستىرۋ» دەگەن جوبا ازىرلەدىك. وسىنداعى نەگىزگى قايىم مۇحامەدحانوۆتىڭ تۇلعالىق قاسيەتى تۋرالى ايتىپ جاتىرمىز عوي. ول - عالىم، ۇستاز، اقىن، درامماتۋرگ، اۋدارماشى، تەكستولوگ. قايىمنىڭ عۇمىرىن ارى قاراي ءبىز تانىستىرۋىمىز كەرەك. قايىمنىڭ مۋزەيى اشىلسا، قايىم وقۋلارى وتسە، قايىم تانۋ كۋرسى بولسا دەيمىز. «ەر قازاق» پەن قايىم دەگەن - ءبىر- بىرىنەن اجىرامايتىن سوزدەر. وسى رەتتە «ەر قازاق» دەگەن ءبىر جۋرنال شىعارىلسا دەيمىن. قايىمنىڭ ءومىرىن تانىستىرۋعا ارنالعان ەكسپەديتسيالار ۇيىمداستىرىلىپ، قايىمنىڭ اتىنداعى سىيلىقتار بولسا دەگەن ۇسىنىستار بار»، - دەدى ەربول ىرگەباي نۇر-سۇلتان قالاسىنىڭ «رۋحاني جاڭعىرۋ» جوبالىق كەڭسەسىندەگى بريفينگىدە بەرگەن سۇحباتىندا.

ونىڭ ايتۋىنشا قايىمنىڭ بويىنداعى ىزگى قاسيەتتەردى قازىرگى جاس بۋىننىڭ بويىنا سىڭىرە بىلگەن ابزال.

«وسى جوبادا اتالعان ماسەلەلەردىڭ ءبارىن قامتۋعا تىرىستىق. ءساتىن سالسا كەلەشەكتە ونى مىندەتتى تۇردە جۇزەگە اسىرامىز دەگەن ويدامىز»، - دەدى ول. ەسكە سالا كەتسەك سوۆەت زامانىنداعى قايىم مۇحامەدحانوۆتىڭ سولاقاي ساياساتتان كورگەن قىساستىعى تۋرالى بۇعان دەيىن ماقالا جاريالاعان ەدىك.

اۆتور: ايان بەكەن ۇلى


جاڭالىقتار