تارازدا قالالىق سوتتى جارماقشى بولعان ازامات ۇستالدى

تاراز. قازاقپارات - تاراز قالالىق سوت عيماراتىن گراناتامەن جارامىن دەپ قورقىتقان كۇدىكتى قولعا ءتۇستى، دەپ حابارلايدى قازاقپارات ءتىلشىسى.

قاتتى ۇرەيلەندىرگەن تۇرعىننان ەشقانداي جارىلعىش زات تابىلماعان. بۇل تۋرالى جامبىل وبلىستىق پوليتسيا دەپارتامەنتىنىڭ باسپا ءسوز قىزمەتى ءمالام ەتتى.

«2020 -جىلدىڭ 5- قاراشاسى كۇنى ساعات 09.10-دا وبلىستىق پوليتسيا دەپارتامەنتىنىڭ كەزەكشى بولىمىنە №2 تاراز قالالىق سوتىنىڭ كىرەبەرىسىندە بەلگىسىز ازامات گراناتى جارىلعىش زاتىن جارماقشى بولىپ جاتقانى تۋرالى حابارلاما كەلىپ ءتۇستى. وقيعا ورنىنا جەدەل جەتكەن ءتارتىپ ساقشىلارى 49 جاستاعى قالا تۇرعىنىن ۇستادى. تەكسەرىس بارىسىندا ودان ەشقانداي جارىلعىش زات تابىلعان جوق. ودان بولەك كۇدىكتىنىڭ اقىل- ەسى كەم رەتىندە پسيحيكالىق ديسپانسەردە تىركەۋدە تۇرعانى بەلگىلى بولدى»، - دەلىنگەن ۆەدومستۆو حابارلاماسىندا.

اتالعان فاكت بويىنشا ق ر قىلمىستىق كودەكسىنىڭ «تەرروريزم اكتىسى تۋرالى كورىنەۋ جالعان حابارلاۋ» 273-بابى بويىنشا سوتقا دەيىنگى تەرگەۋ باستالدى. كۇدىكتى جامبىل وبلىستىق پسيحونيەۆرولوگيالىق ديسپانسەرىنە ورنالاستىرىلدى.

اۆتور: سايا سەمباي