سولتۇستىك قازاقستان اۋماعىنان شىعۋ ءۇشىن ەندى پ ت ر تەست انىقتاماسى كەرەك - دارىگەرلەر

پەتروپاۆل. قازاقپارات - سولتۇستىك قازاقستان وبلىسىندا كارانتيندىك شەكتەۋلەردىڭ كۇشەيتىلۋىنە بايلانىستى بۇدان بىلاي پ ت ر تەست ناتيجەسى بولماسا تۇرعىندار ءوڭىر اۋماعىنان شىعا المايدى، دەپ حابارلايدى قازاقپارات ءتىلشىسى.

س ق و سانيتاريالىق-ەپيدەميولوگيالىق باقىلاۋ دەپارتامەنتى ماماندارى وڭىردە كارانتيندىك شارالاردى كۇشەيتۋگە قاتىستى بريفينگ وتكىزدى.

سانيتاريا دارىگەرلەرىنىڭ ايتۋىنشا، پ ت ر- تەست ناتيجەسى وبلىس اۋماعىنان شىعاتىن بارلىق جولاۋشىلارعا كەرەك.

«س ق و- دا پ ت ر- تەستتى 4 زەرتحانادا جاساتۋعا بولادى. ونىڭ ءبىرى - سانيتاريالىق- ەپيدەميولوگيالىق باقىلاۋ دەپارتامەنتىنىڭ ۇلتتىق ساراپتاما ورتالىعىندا ورنالاسقان. تاعى ءبىرى - پۋلمونولوگيا ورتالىعىندا ورنالاسقان. سونداي-اق ەكى جەكەمەنشىك كلينيكادا جاساتۋعا بولادى. تاعى ءبىر جەكەمەنشىك زەرتحانا قاراشا ايىنىڭ 20 سىنان كەيىن اشىلادى دەپ جوسپارلانعان.

وندا 2 مىڭعا دەيىن تەست جاساتۋعا بولادى. ۇلتتىق ساراپتاما ورتالىعى جەكە تۇلعالارعا 8 مىڭ تەڭگەگە، زاڭدى تۇلعالارعا 9 مىڭ تەڭگەگە جاسايدى. زەرتحانالار ۇلگەرىپ جاتىر، ەشقانداي دۇرلىگۋ جوق»، - دەيدى س ق و سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ مىندەتىن اتقارۋشى تاتيانا گورلوۆا.

سانيتاريا دارىگەرىنىڭ ايتۋىنشا، سوڭعى كەزدە سىرتتان كەلۋشىلەر اراسىندا ك ۆ ي- ءدى جۇقتىرۋشىلار كوبەيگەن.

6- قازان مەن 2- قاراشا ارالىعىندا رەسەيمەن شەكارالاس باقىلاۋ پۋنكتتەرى ارقىلى 15663 ادام وتكەن. ونىڭ شامامەن 4,5 مىڭىندا عانا انىقتاما بولعان. 1400 دەي ادام كارانتينگە الىنىپ، COVID-19 تەكسەرىلدى.

ناتيجەسىندە 118 ادامنان كوروناۆيرۋس انىقتالدى. 77 شەتەلدىك پ ت ر- تەست ناتيجەسى بولماعاندىقتان كەرى قايتارىلعان.

«كوروناۆيرۋستى جۇقتىرۋشىلار اراسىندا جۇك تاسىمالداۋشىلار كوپ. قازان ايىندا رەسەيدەن كەلگەن 104 ادامدا ك ۆ ي انىقتالسا، سونىڭ 24 ءى جۇك كولىكتەرىنىڭ جۇرگىزۋشىلەرى. سونىڭ ىشىندە جۇك تاسىمالداۋشىلاردىڭ 22 ءسى - باسقا وڭىرلەردىڭ تۇرعىندارى. ولاردا قاۋىپتى ينفەكتسيا س ق و اۋماعىندا انىقتالعاندىقتان، وسى ءوڭىردىڭ ستاتيستيكاسىنا كىرەدى»، - دەيدى تاتيانا گورلوۆا.