بيىل ءۇش رەت ماس كۇيدە ۇستالعان جۇرگىزۋشى باس بوستاندىعىنان ايىرىلماق

پەتروپاۆل. قازاقپارات - سولتۇستىك قازاقستان وبلىسىندا وتكەن دەمالىس كۇندەرى ماس جۇرگىزۋشىلەردىڭ كىناسىنەن ەكى جول-كولىك وقيعاسى تىركەلدى، دەپ حابارلايدى قازاقپارات ءتىلشىسى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، اقجار اۋدانى گوركوۆسكوە ەلدى مەكەنىندە «پريورا» اۆتوكولىگىنىڭ جۇرگىزۋشىسى مەتال اركاعا سوعىلىپ، قورشاۋلاردى زاقىمداعان.

مەديتسينالىق كۋالاندىرۋ 42 جاستاعى اۋىل تۇرعىنىنىڭ ماس ەكەنىن راستادى. ول ءبىر جىلدىڭ ىشىندە وسىمەن ءۇشىنشى رەت پوليتسياعا ماس كۇيدە ۇستالىپ وتىر.

ءبىرىنشى رەت اقپان ايىندا ول كولىكتى ماس كۇيدە باسقارعانى ءۇشىن جۇرگىزۋ قۇقىعىنان 7 جىلعا ايىرىلعان جانە 15 تاۋلىككە اكىمشىلىك قاماۋعا الىنعان، الايدا بۇل وعان ساباق بولماپتى. شىلدە ايىندا وسىعان ۇقساس قۇقىق بۇزۋشىلىق جاساعانى ءۇشىن ول سوت ۇكىمىمەن قوعامدىق جۇمىستارعا تارتىلدى جانە ءومىر بويىنا كولىك جۇرگىزۋ قۇقىعىنان ايىرىلدى.

ءۇشىنشى رەت ۇستالعان ول ەندى قىلمىستىق جاۋاپكەرشىلىككە تارتىلماق. اققايىڭ اۋدانىندا كولىكتى ماس كۇيدە باسقارۋدىڭ سوڭى اۋىر جاعدايعا اكەلدى. قيالى ەلدىمەكەنىنىڭ 25 جاستاعى تۇرعىنى سپيرتتىك ىشىمدىك ىشسە دە رولگە وتىرىپ، استراحانكا اۋىلىنىڭ ماڭىندا كولىك تىزگىنىنە يە بولا الماي اۋدارىلعان.

سالدارىنان «مەرسەدەس» اۆتوكولىگىنىڭ جۇرگىزۋشىسى ءتۇرلى دەنە جاراقاتىمەن اۋرۋحاناعا ەمدەلۋگە جاتقىزىلدى.

«ماساڭ كۇيدە رولگە وتىرعان جۇرگىزۋشى ءوز ومىرىنە عانا ەمەس، وزگەلەردىڭ ومىرىنە دە قاۋىپ توندىرەدى. بيىل زاڭناماداعى وزگەرىستەرگە سايكەس ماس كۇيدە كولىك باسقارعاندارعا جازا كۇشەيتىلە ءتۇستى. بۇل شارا ازاماتتاردىڭ سانا-سەزىمىن نىعايتۋعا باعىتتالعان»، - دەيدى س ق و پ د باستىعىنىڭ ءبىرىنشى ورىنباسارى قانات ايتبايەۆ.

جىل باسىنان س ق و جولدارىندا 851 ماس جۇرگىزۋشى ۇستالدى.