قازاقستان تۇركياداعى جەر سىلىكىنىسىنەن زارداپ شەككەندەرگە كومەكتەسۋگە دايىن - توقايەۆ

نۇر- سۇلتان. قازاقپارات - مەملەكەت باسشىسى تۇركيا پرەزيدەنتى رەدجەپ تاييپ ەردوعانعا كوڭىل ايتۋ جەدەلحاتىن جولدادى، دەپ حابارلايدى اقوردانىڭ رەسمي سايتى.

قازاقستان پرەزيدەنتى قاسىم- جومارت توقايەۆ يزمير پروۆينتسياسىنداعى جەر سىلكىنىسى سالدارىنان قايتىس بولعان جانە زارداپ شەككەن ازاماتتار تۋرالى سۋىت حاباردى تەرەڭ كۇيزەلىسپەن قابىل الدى.

- سىزگە جانە وسى تابيعي اپاتتا جاقىندارىنان ايىرىلعان وتباسىلارعا قازاقستان حالقىنىڭ جانە جەكە ءوزىمنىڭ اتىمنان كوڭىل ايتىپ، ورنى تولماس قايعىعا ورتاقتاسامىن. جاراقات العان ادامداردىڭ تەز ارادا وتباسىلارىنا قايتا ورالۋلارىنا دۇعا ەتەمىز. باۋىرلاس تۇرىك حالقىنا شىنايى تىلەكشى ەل رەتىندە، قاجەتتىلىك تۋىنداعان جاعدايدا، قازاق حالقى مەن ۇكىمەتى ءتيىستى كومەك كورسەتۋگە دايىن، - دەلىنگەن جەدەلحاتتا.

وسىعان دەيىن تۇركيانىڭ باتىسىندا 6,6 بالدىق جەر سىلكىنىسى بولعانى حابارلاندى. قازاقستاننىڭ تۇركياداعى ەلشىلىگى وسى وقيعانىڭ سالدارىنان زارداپ شەككەندەر اراسىندا قازاقستان ازاماتتارىنىڭ جوق ەكەنىن ءمالىم ەتىپ، كومەك قاجەت بولعان جاعدايدا حابارلاساتىن تەلەفون نومىرلەرىن جاريالادى. سوڭعى مالىمەتتەر بويىنشا، ءزىلزالانىڭ سالدارىنان تۇركيادا 12 ادام مەرت بولىپ، 522 ادام زارداپ شەكتى.