ەلباسى تۇركيا پرەزيدەنتى رەجەپ تاييپ ەردوعانعا كوڭىل ايتۋ جەدەلحاتىن جولدادى
ەلباسى تۇركيانىڭ يزمير پروۆينتسياسىندا جەر سىلكىنىسى سالدارىنان تۇرعىنداردىڭ زارداپ شەگىپ، قازا بولعانى تۋرالى سۋىت حاباردى كۇيزەلىسپەن قابىلدادى.
«قايعىلارىڭىزعا ورتاقتاسىپ، مارقۇم بولعانداردىڭ تۋىستارى مەن جاقىندارىنا، سونداي- اق بۇكىل تۇركيا حالقىنا كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋىنە تىلەكتەستىگىمدى بىلدىرە وتىرىپ، باۋىرلاس تۇرىك حالقىنىڭ وسى اۋىرتپالىقتى سابىرمەن ەڭسەرەتىنىنە سەنىمدىمىن»، - دەلىنگەن جەدەلحاتتا.
وسىعان دەيىن تۇركيانىڭ باتىسىندا 6,6 بالدىق جەر سىلكىنىسى بولعانى حابارلاندى. قازاقستاننىڭ تۇركياداعى ەلشىلىگى وسى وقيعانىڭ سالدارىنان زارداپ شەككەندەر اراسىندا قازاقستان ازاماتتارىنىڭ جوق ەكەنىن ءمالىم ەتىپ، كومەك قاجەت بولعان جاعدايدا حابارلاساتىن تەلەفون نومىرلەرىن جاريالادى. سوڭعى مالىمەتتەر بويىنشا، ءزىلزالانىڭ سالدارىنان تۇركيادا 12 ادام مەرت بولىپ، 522 ادام زارداپ شەكتى.