ءتىس پەن سۇيەكتىڭ ايىرماشىلىعى قانداي؟
ءتىس قۇرامى جاعىنان سۇيەككە قاراعاندا تەرىگە جاقىنىراق دەيدى عالىمدار. ءتۇرى ۇقساس، قۇرامى بىردەي سەكىلدى كورىنگەنىمەن - ولاردىڭ قۇرامى ءارتۇرلى. ءارقايسىنا عانا ءتان وزىندىك ەرەكشە قاسيەتى بار. مىسالى ءتىستىڭ ەمالى وتە بەرىك، ال سۇيەكتىكى السىزدەۋ. دەگەنمەن سۇيەك سىنعان سوڭ قايتا قالپىنا كەلە الادى، ال ءتىستىڭ مۇنداي قابىلەتى جوق.
ءتىس قۇرامىنىڭ باسىم بولىگىن فوسفور مەن كالتسي الادى. سىرتقى قابىعىن ەمال قاپتاعان. بۇل - ادام اعزاسىنداعى ەڭ بەرىك ءتىن. ەمالدى تۇزەتىن جاسۋشىلار زاقىمدانعان جاعدايدا قايتا قالپىنا كەلمەيدى. سول ءۇشىن دە سىنعان ءتىس وسپەيدى.
سۇيەك كوللاگەن دەپ اتالاتىن ءتىرى تىننەن تۇرادى. وسىنىڭ ارقاسىندا سۇيەك يىلگىش كەلەدى. كوللاگەندەردىڭ اراسىنداعى بوس كەڭىستىكتە ورنالاسقان كالتسي بولسا سۇيەكتى بەرىك قىلادى. سۇيەكتىڭ يىلگىشتىگى قاڭقانىڭ ءومىر بويى تۇسەتىن «جۇكتى» كوتەرە الۋىنا اسەر ەتەدى.
ءتىس پەن سۇيەك ىشىندەگى زاتتارىمەن دە ەرەكشەلەنەدى. ءتىستىڭ ىشىندە كوكتامىر، كۇرەتامىر، جۇيكە تامىرلارى بار بايلانىستىرۋشى ءتىن بولسا، سۇيەكتە قان جاسۋشاسىن تۇزۋدە ماڭىزدى ءرول اتقاراتىن جىلىك مايى بار. بۇعان قوسا سۇيەكپەن كوپتەگەن كۇرەتامىر بايلانىسقان، سونداي- اق، وندا اعزاداعى ەڭ ۇلكەن كالتسي مەن فوسفور قورى بار. تىستەگى بايلانىستىرۋشى ءتىن - ۇلپا ءتىس پەن يەكتىڭ اراسىندا ورنالاسقان. ەمال زاقىمدانعاندا ۇلپاداعى جۇيكە تامىرلارى قوزىپ، قاتتى اۋىرادى. سونداي- اق، ەمال جۇقارعاندا ىستىق نە سالقىن سۋ ىشكەندە ىڭعايسىز سەزىم تۋدىرادى.
سۇيەك پەن ءتىستىڭ تاعى ءبىر- ەكى ايىرماشىلىعى:
- ءتىس ءارتۇرلى داۋىس شىعارۋعا اتسالىسادى، ال سۇيەك تەك سىقىرلاي الادى؛
- ءتىس اشىق تۇرعاندىقتان ادامنىڭ ەموتسياسىن ءبىلدىرىپ، ەستەتيكالىق فۋنكتسيانى اتقارادى، ال سۇيەك تەرىمەن قاپتالىپ، جاسىرىن تۇر.
massaget.kz