تۇركيادا ءزىلزالا سالدارىنان قازا بولعاندار مەن جارالانعاندار سانى بەلگىلى بولدى
بۇعان دەيىن تۇركياداعى يزمير جاعالاۋىندا 6,6 بالدىق جەر سىلكىنىسى بولعانى حابارلانعان. تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە جويۋ باسقارماسىنىڭ (AFAD) حابارلاۋىنشا، جەراستى ءدۇمپۋى جەرگىلىكتى ۋاقىتپەن 14.51 دە، يزمير پروۆينتسياسى سەفەرحيسار اۋدانىنداعى ەگەي تەڭىزىنىڭ جاعالاۋىندا تىركەلگەن. ءزىلزالا وشاعى 16,5 شاقىرىم تەرەڭدە بولعان. جەر ءدۇمپۋى 15 سەكۋندقا سوزىلىپ، تۇركيانىڭ باتىسىنداعى كوپتەگەن پروۆينتسيادا سەزىلگەن.
تۇركيا ءى ءى م حابارلاۋىنشا، ءزىلزالا سالدارىنان يزمير قالاسىنىڭ بورنوۆا جانە بايراكلى اۋداندارىندا التى تۇرعىن ءۇي قيرادى. قازىرگى مالىمەت بويىنشا جەر سىلىكىنىسىنەن يزميردە 4 ادام مەرت بولىپ، 120 تۇرعىن زارداپ شەككەن.
تۇركيا پرەزيدەنتى رەجەپ تايىپ ەردوعان يزميردەگى ءزىلزالا سالدارىنان زارداپ شەككەن وتانداستارىنا الاڭداۋلى ەكەنىن جەتكىزدى. قازاقستان رەسپۋبليكاسىنىڭ تۇركياداعى ەلشىسى ابزال ساپاربەك ۇلى جەر سىلكىنىسى بولعان پروۆينتسياداعى قازاقستاندىقتار كومەك قاجەت بولسا ەلشىلىككە حابارلاسۋىن سۇرادى.