قازاقستاندىق تورەشى توكيو وليمپياداسىندا قازىلىق جاسايتىن ۇمىتكەرلەر قاتارىنا ەندى
رەسمي تۇردە ۇسىنىلعان 14 تورەشىنىڭ قاتارىندا قازاقستان كاراتە فەدەراتسياسىنىڭ وكىلى اسقار مولداعالي دا بار دەپ حابارلايدى قازاقپارات Olympic.kz سايتىنا سىلتەمە جاساپ.
اسقار مولداعالي كاتا مەن كۋميتەدەن تولىق ليتسەنزياعا يە حالىقارالىق دارەجەدەگى تورەشى. ول ءوزىنىڭ جاستىعىنا قاراماستان، تاجىريبەسى مەن كاسىبي شەبەرلىگىنىڭ ارقاسىندا الەمدىك فەدەراتسيانىڭ سەنىمىنە كىرگەن.
«ارينە، بۇل ماعان عانا ەمەس، ۇلتتىق فەدەراتسيا مەن جالپى قازاقستان سپورتى ءۇشىن جاعىمدى جاڭالىق. وليمپيادا قارساڭىنداعى ەكى جىل تورەشىلەر ءۇشىن وتە قيىن ءوتتى. ۇوك، كونفەدەراتسيا مەن مادەنيەت جانە سپورت مينيسترلىگى، سونداي- اق، ۇلتتىق كاراتە فەدەراتسياسىنىڭ قولداۋىمەن مەن مۇمكىن بولعان 25 ليتسەنزيالىق ءتۋرنيردىڭ بارىنە قاتىستىم. وليمپيادالىق تسيكل اياقتالعانشا اتقاراتىن جۇمىس كوپ. دەگەنمەن، مەن ءۇمىتتى اقتاۋعا تىرىسامىن»، - دەيدى اسقار.
ت م د ەلدەرىنىڭ اراسىنان تەك ەكى تورەشى عانا تىزىمگە ىلىنگەن. ولاردىڭ ءبىرى اسقار مولداعالي، ەكىنشىسى ازەربايجان وكىلى.
«قازاقستاندىق تورەشىنىڭ وليمپيادا ويىندارىندا قىزمەت ەتەتىن قازىلار قاتارىنا ەنگەنى وتاندىق فەدەراتسيانىڭ اۋىزبىرشىلىگى مەن ەڭبەگىنىڭ كورىنىسى. ءبىزدىڭ تورەشىلەر الەمنىڭ ۇزدىكتەرىمەن ءبىر دەڭگەيدە جۇمىس ىستەي الاتىنىن دالەلدەدى. وليمپيادا قارساڭىندا قازاقستاندىق كوماندانىڭ بارلىق مۇشەسى ءبىر جاعادان باس، ءبىر جەڭنەن قول شىعارىپ، ءبىر ماقسات- مۇددە جولىندا ەڭبەك ەتتى. سوندىقتان، الەمدىك ۇيىمنان كەلگەن بۇل جاڭالىق ءبارىمىزدى قۋانتىپ تاستادى»، - دەيدى كوماندا باس باپكەرى جاستالاپ ساناۋوۆ.