قازاقستان پرەزيدەنتى سولتۇستىك ەكونوميكالىق ىنتىماقتاستىق جونىندەگى حالىقارالىق فورۋمدا ءسوز سويلەدى
«COVID-19-دان كەيىنگى جاھاندىق وزگەرىستەر جانە سولتۇستىك ەكونوميكالىق ىنتىماقتاستىقتىڭ كەلەشەگى» تاقىرىبىنداعى شارا بۇگىن سەۋل قالاسىندا باستالدى، دەپ حابارلايدى قازاقپارات اقورداعا سىلتەمە جاساپ.
مەملەكەت باسشىسى قاسىم-جومارت توقايەۆ پرەزيدەنت مۋن چجە ين باستاماشى بولعان جانە سوڭعى ءۇش جىلدىڭ ىشىندە ءوزىنىڭ وزەكتىلىگى مەن ومىرشەڭدىگىن دالەلدەگەن «جاڭا سولتۇستىك ساياسات» ستراتەگياسىن جوعارى باعالاپ، وڭتۇستىك كورەيا باسشىسىنىڭ وركەندەگەن، ءوزارا بايلانىسى مىعىم جانە تۇراقتى ەۋرازيا قۇرۋ كورەگەن يدەياسىن قۇپتادى. قازاقستان پرەزيدەنتىنىڭ پىكىرىنشە، قازىرگىدەي الەم كوروناۆيرۋس پاندەمياسىنىڭ تەڭدەسسىز تەگەۋرىندەرىنە تاپ بولعان كەزدە ساياسي جىگەر مەن ەكونوميكالىق سانا سينەرگياسى ەرەكشە مانگە يە.
قاسىم-جومارت توقايەۆ قازاقستان مەن وڭتۇستىك كورەيا اراسىنداعى ستراتەگيالىق ىنتىماقتاستىقتىڭ ورتاق قۇندىلىقتارعا، ءوزارا قولداۋ مەن تىعىز بايلانىستارعا نەگىزدەلگەنىن ايتا كەلە، ەلىمىزدە ءومىر ءسۇرىپ جاتقان، دوستىقتىڭ «التىن كوپىرى» سانالاتىن ءجۇز مىڭ كورەي قاۋىمداستىعىنىڭ ەكى ەل اراسىنداعى قارىم-قاتىناسقا قوسقان ۇلەسىن اتاپ ءوتتى.
- كورەيانىڭ قازاقستان ەكونوميكاسىنا جاساعان ينۆەستيتسياسى 7 ميلليارد دوللاردان استى. جاھاندىق تۇراقسىزدىققا قاراماستان، ەكىجاقتى تاۋار اينالىمى ارتتى. ورتالىق ازيانىڭ بارلىق بەس ەلىنىڭ ورتاق جالپى ىشكى ءونىمنىڭ 70 پايىزى قازاقستاننىڭ ۇلەسىنە تيەسىلى. كورەي مەملەكەتى جەتەكشى ينۆەستورلاردىڭ اراسىنداعى 10-ورىنعا يە. بۇل رەتتە، ءوزارا ءتيىمدى ىنتىماقتاستىقتى ودان ارى جالعاستىرۋدىڭ ءالى دە پايدالانىلماعان ۇلكەن الەۋەتى بار، - دەدى مەملەكەت باسشىسى.
قازاقستان پرەزيدەنتى 2019-جىلدىڭ ءساۋىر ايىندا مۋن چجە ءيننىڭ ەلىمىزگە جاساعان تاريحي ساپارى ەكىجاقتى ءوزارا ءىس-قيمىلدىڭ جاڭا بەلەسىن اشتى دەپ سانايدى. ساپار اياسىندا قول قويىلعان «سامال جەل» باعدارلاماسى قازاق-كورەي ەكونوميكالىق، ساۋدا جانە مادەني جان-جاقتى بايلانىستاردى جانداندىرۋعا باعىتتالعان. سونىمەن قاتار قاسىم-جومارت توقايەۆ «سامال جەل» باعدارلاماسى مەن «جاڭا سولتۇستىك ساياسات» ستراتەگياسى «سيفرلى قازاقستان»، «نۇرلى جول» سەكىلدى ۇلتتىق باعدارلامالاردا بەلگىلەنگەن ستراتەگيالىق مىندەتتەرگە سايكەس كەلەتىنىن ايتتى.
مەملەكەت باسشىسى الەمدەگى ۇزاققا سوزىلعان مۇناي ءداۋىرىنىڭ اياقتالىپ كەلە جاتقانىن ايتىپ، قازاقستان ءۇشىن ءارتاراپتاندىرىلعان جانە تۇراقتى ەكونوميكا قۇرۋدىڭ ەرەكشە ماڭىزدى ەكەنىن اتاپ ءوتتى.
- وسىعان بايلانىستى مەن جاڭا ەكونوميكالىق باعىتتىڭ باستاماشىسى بولدىم. بۇل باعىت قۇرىلىمدىق رەفورمالارمەن عانا ەمەس، سونداي-اق بارىنشا قارقىندى ءارى مىقتى مەملەكەت قۇرۋمەن بايلانىستى. قازاقستان كورەي ينۆەستورلارى ءۇشىن ارنايى ازىرلەنگەن قۇرالداردى ۇسىنۋعا ءازىر. بۇل رەتتە، سالىق جانە كەدەن ارتىقشىلىقتارى، جوبالاردى قوسا قارجىلاندىرۋ، ەكسپورتتى قولداۋدىڭ ءىشىنارا كەپىلدىكتەرى مەن تەتىكتەرىن ايتۋعا بولادى، - دەدى پرەزيدەنت.
مەملەكەت باسشىسى اعىلشىن قۇقىعى بويىنشا قىزمەت كورسەتەتىن «استانا» حالىقارالىق قارجى ورتالىعىنىڭ الەۋەتىن دە ءسوز ەتتى. پرەزيدەنت بۇل ورتالىقتىڭ شەتەلدىك بيزنەسكە ارنالعان ەكوجۇيەسىنىڭ بىرەگەيلىگىن ەرەكشە اتاپ ءوتتى. ءسوز سوڭىندا قاسىم-جومارت توقايەۆ فورۋم قاتىسۋشىلارىنا جۇمىستىڭ تابىستى، ال وڭتۇستىك كورەيا پرەزيدەنتى مەن ۇكىمەتىنىڭ يگى باستامالارىنىڭ ءساتتى بولۋىنا تىلەكتەستىك ءبىلدىردى.