قازاقستاندىق دزيۋدوشى الەمدەگى ەڭ ۇزدىك ون بالۋاننىڭ تىزىمىنە ەندى
جارىسقا الەمنىڭ 69 ەلىنەن 459 سپورتشى قاتىستى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
جارىس قورىتىندىسى بويىنشا ارميا ورتالىق سپورت كلۋبىنىڭ سپورتشىسى ەفرەيتور عۇسمان قىرعىزبايەۆ 60 كەلىگە دەيىنگى سالماق دارەجەسىندە الەمدىك رەيتينگتەگى ۇزدىك دزيۋدوشىلاردىڭ جەتىنشى ساتىسىندا تۇر. ونىڭ ەسەبىندە 4080 ۇپاي بار.
«بۋداپەشتتەگى «ۇلكەن دۋلىعا» جارىسى - كوروناۆيرۋس پاندەمياسىنا بايلانىستى ۇزاق ۇزىلىستەن كەيىنگى العاشقى ماڭىزدى تۋرنير. سايىسقا قاتىسۋشىلار قۇرامى وتە مىقتى. الەمنىڭ ۇزدىك بالۋاندارى قاتىستى. وسىعان قاراماستان عۇسمان جوعارى ناتيجە كورسەتتى. ءبىزدى الداعى جارىستارعا قارقىندى دايىندىق كۇتىپ تۇر»، - دەپ اتاپ ءوتتى ارميا ورتالىق سپورت كلۋبىنىڭ وليمپيادالىق سپورت تۇرلەرى بويىنشا شتاتتىق كوماندالاردى دايارلاۋ ءبولىمىنىڭ باستىعى مايور ءانۋار ۇسەنوۆ.
عۇسمان قىرعىزبايەۆ - ق ر ۇلتتىق قۇراماسىنىڭ مۇشەسى، 2016-جىلى تسيۋريحتە (شۆەيتساريا) وتكەن CISM (حالىقارالىق اسكەري سپورت كەڭەسى) اسكەري قىزمەتشىلەرى اراسىنداعى الەم چەمپيوناتىنىڭ جەڭىمپازى، 2018-جىلى اگاديردە (ماروككو) وتكەن گران-پري كەزەڭىنىڭ جانە 2019-جىلى ابۋ-دابيدە (ب ا ءا) وتكەن «ۇلكەن دۋلىعا» (Grand-Slam) ءتۋرنيرىنىڭ چەمپيونى، حالىقارالىق تۋرنيرلەردىڭ بىرنەشە دۇركىن جۇلدەگەرى.