كوروناۆيرۋس پەن پنيەۆومنيا وكپەدە ءىز قالدىرا ما - مامان پىكىرى

نۇر-سۇلتان. قازاقپارات - ۇلتتىق كارديوحيرۋرگيا ورتالىعىنىڭ راديولوگيا ءبولىمىنىڭ مەڭگەرۋشىسى، مەديتسينا عىلىمدارىنىڭ دوكتورى، قازاقستان راديولوگيالىق قوعامىنىڭ ۆيتسە-پرەزيدەنتى تايىرحان ءداۋىتوۆ كوروناۆيرۋس پاندەمياسى كەزىندە قالاي جۇمىس ىستەگەندەرىن، كومپيۋتەرلىك توموگرافيانىڭ قانشالىقتى ءتيىمدى ەكەنىن ايتىپ بەردى، دەپ حابارلايدى قازاقپارات ءتىلشىسى.

«كوروناۆيرۋس ينفەكتسياسى انىقتالعان ناۋرىز ايىندا ناۋقاستار كوپ بولعان جوق. ناعىز شارىقتاۋ شەگى - مامىر، ماۋسىم، شىلدە ايلارىندا بولدى. وندا كوپتەگەن كلينيكالار جانە پروۆيزورلىق ورتالىقتار ەكى اۋىسىممەن جۇمىس ىستەپ ءجۇردى. ال قالا سىرتىنداعى تۋبەركۋلەزگە قارسى فتيزيوپۋلمونوگيالىق ورتالىق تاۋلىك بويى جۇمىس ىستەپ تۇردى. مۇنداي سۇرانىستىڭ باستى سەبەبى - كومپيۋتەرلىك توموگرافيانىڭ وكپە اۋرۋلارىن انىقتاۋداعى تيىمدىلىگى دەپ ەسەپتەيمىن. سەبەبى كوروناۆيرۋستىق ينفەكتسيانىڭ العاشقى ساتىسىندا رەنتگەن ەشتەڭە كورسەتپەيدى. حالىقارالىق دەڭگەيدە مويىندالعان ءادىس - كومپيۋتەرلىك توموگرافيا بولدى. ءبىر قىزىق دەرەك، قازاقستان راديولوگتار قوعامى - ەۋروپا قوعامىنىڭ، ازيا جانە تىنىق مۇحيتى راديولوگتارى قوعامىنىڭ مۇشەسى. سولارمەن فورۋم جاساعاندا، ازيا ەلدەرىنىڭ بارلىعىندا ماۋسىم-شىلدە ايلارىندا ك ۆ ي ناۋقاستارى كوبەيگەنىن بىلدىك»، - دەدى دارىگەر قازاقپارات تىلشىسىنە بەرگەن سۇحباتىندا.

دارىگەر كومپيۋتەرلىك توموگرافيا مەن رەنتگەندىك تەكسەرۋدىڭ ايىرماشىلىعىن ءتۇسىندىرىپ بەردى.

«جوعارىدا اتاپ وتكەنىمدەي، وكپە اۋرۋلارىن انىقتاۋداعى حالىقارالىق مويىندالعان ءادىس - كومپيۋتەرلىك توموگرافيا بولدى. ونى حالىقارالىق راديولوگتار قوعامى، ماگاتە مويىنداعان. ال رەنتگەن پروفيلاكتيكا ءۇشىن قولدانىلادى نەمەسە اۋىر جاعدايدا جانساقتاۋ بولىمىندە جاتقانداردى كومپيۋتەرلىك توموگرافياعا اپارا الماعان جاعدايدا عانا قولدانادى. وكپەنىڭ نەشە پايىزعا زاقىمدالعانىن رەنتگەن ەمەس، كومپيۋتەرلىك توموگرافيا كورسەتە الادى. سوسىن كومپيۋتەرلىك توموگرافيانىڭ دوزالىق جۇكتەمەسى وتە تومەن. ادامدار رادياتسيا دەپ قاشپاۋى كەرەك. كەز كەلگەن ادام ۇشاققا مىنگەندە جىلىنا 2-3 ميلليزيۆەرت الۋى مۇمكىن. كومپيۋتەر دە سونداي دوزا، ءتىپتى ودان دا از بولادى. ماسەلەن، ونكولوگيالىق ناۋقاستار جىلىنا 1-2 رەت تەكسەرۋدەن وتەدى. ودان اعزاعا زاقىم كەلمەيدى. تيىسىنشە، جىلىنا نەشە رەت تۇسۋگە بولادى دەگەن ۇعىم جوق. دارىگەرلەر تەكسەرىپ، دەنە قىزۋى، ەنتىگۋ جانە وكپەدەن سىرىل ەستىلسە، كومپيۋتەرلىك توموگرافياعا جىبەرەدى»، - دەپ ءتۇسىندىردى تايىرحان ءداۋىتوۆ.

سونىمەن بىرگە، مامان «ك ۆ ي، پنيەۆمونيامەن اۋىرعانداردىڭ وكپەسىندە ءىز قالا ما؟» دەگەن سۇراققا جاۋاپ بەردى.

«كومپيۋتەرلىك توموگرافيادان كورىنۋى مۇمكىن. ءبىراق قايتا تەكسەرۋگە كەلگەن ناۋقاستاردىڭ كوپشىلىگىندە وكپە 1-2 ايدان كەيىن ءىزسىز جازىلىپ كەلەدى. بۇل جەردە ىلەسپە اۋرۋلار وتە كوپ ىقپال ەتەدى. برونحيت، حوبل، قانت ديابەتىمەن اۋىراتىنداردا كوروناۆيرۋس ينفەكتسياسىنان كەيىن ءىز قالۋى مۇمكىن. ال دەنساۋلىعى جاقسى ادامداردىڭ وكپەسىنەن ءتىپتى كومپيۋتەرلىك توموگرافيامەن دە ەشقانداي ءىز كورىنبەيدى. ناۋقاستى امان الىپ قالۋ دا وسى ىلەسپە اۋرۋلارعا تىكەلەي بايلانىستى. كوپ جاعدايدا يممۋنيتەتتى تۇسىرەتىن قانت ديابەتى، ونكولوگيالىق اۋرۋى بارلار قايتىس بولدى»، - دەيدى دارىگەر.

ونىڭ ايتۋىنشا، دۇنيەجۇزىلىك دەنساۋلىق ساقتاۋ ۇيىمىنىڭ تالابىنا سايكەس، 100 مىڭ حالىققا 1 كومپيۋتەرلىك توموگرافيا بولۋى قاجەت.

«ەلوردادا 1 ميلليون حالىققا ونشاقتىسى جەتەدى دەگەن ءسوز. ال بىزدە نۇر-سۇلتان قالاسىندا جەكە كلينيكالاردى قوسقاندا، 20 كومپيۋتەرلىك توموگرافيا بار. قازاقستان بويىنشا 170 كومپيۋتەرلىك توموگرافيا. دەمەك، ولاردىڭ باسىم بولىگى نۇر-سۇلتان مەن الماتى قالالارىندا ورنالاسقان»، - دەدى ت. ءداۋىتوۆ.

ءسوز سوڭىندا دارىگەر كوروناۆيرۋس پەن پنيەۆمونيادان قورعانۋ بويىنشا تۇرعىندارعا كەڭەس بەردى.

«كوروناۆيرۋستىڭ تاعى ءبىر تولقىنى كەلسە دە، جەڭىل وتەدى دەپ ويلايمىن. ويتكەنى ادامدار كوندىكتى، باياعىداي دۇرلىكپە جوق. ماسكا، دەزينفەكتسيالىق رەجيم ساقتالۋدا. ەڭ باستىسى، يمۋنيتەت پەن پسيحولوگيالىق تۇرعىدا مىقتى بولۋ كەرەك. ادامنىڭ ۇرەيگە بەرىلۋى دە يممۋنيتەتكە تىكەلەي اسەر ەتەدى. ىلەسپە اۋرۋلاردان ساقتانۋ كەرەك. سوسىن قوناق پەن تويدان ءالى دە تارتىنۋىمىز كەرەك. ءبىز تويشىل حالىقپىز. كارانتيننەن امان-ەسەن شىقتىق، جۋايىق دەگەن اڭگىمەنى قويۋ كەرەك. ەندى كوروناۆيرۋس كەلمەيدى دەپ ارقانى كەڭگە سالۋعا دا بولمايدى. كەي ەلدەردە قورعانىس كيىمدەرى، ماسكا تاعۋ تۇتاس مادەنيەتكە اينالىپ كەتتى عوي. ءبىز دە جەكە گيگيەنا مەن وقشاۋلانۋدى ۇستانساق، دارىگەرلەرگە كوپ كومەكتەسكەن بولار ەدىك»، - دەيدى دارىگەر.