ماڭعىستاۋدا سۋ تۇشىتاتىن زاۋىت ىسكە قوسىلادى

اقتاۋ. قازاقپارات - ماڭعىستاۋ وبلىسىنداعى قاراجانباس كەن ورنىندا سۋ تۇشىتاتىن زاۋىت سالىنىپ جاتىر.

نىسان كەلەر جىلدىڭ ءبىرىنشى توقسانىندا ىسكە قوسىلادى دەپ جوسپارلانعان. جوبا ىسكە اسسا، كومپانيا مۇناي شىعارۋ ءۇشىن، وڭدەلگەن جەراستى سۋىن پايدالانادى، دەپ حابارلايدى قازاقپارات ءتىلشىسى.

ال، قازىر قولدانىپ وتىرعان ەدىل وزەنىنەن كەلەتىن سۋ ءوڭىر تۇرعىندارىنىڭ پايدالانۋىنا بەرىلەدى. بۇل ايماقتاعى سۋ تاپشىلىعىن ازايتۋعا سەپتىگىن تيگىزەدى. كەن ورنى «استراحان- ماڭعىستاۋ» سۋ قۇبىرىنان تاۋلىگىنە 17 مىڭ جارىم تەكشە مەتر سۋ الادى. جەراستى ءنارىن تۇشىتاتىن زاۋىت سالۋ وسى تاۋەلدىلىكتەن بوساتىپ قانا قويماي، ءبىرقاتار تەحنولوگيالىق ماسەلەلەردى دە شەشەدى. سونداي- اق ۇڭعىمالاردى كۇردەلى جانە جەراستى جوندەۋدى ازايتۋ، گريفونداردىڭ پايدا بولۋىن شەكتەۋ كۇن تارتىبىندە تۇر.

«تۇشى سۋدى الامىز دا، بۋعا اينالدىرامىز. بۋدى جەرگە ايدايدى دا، سول كەزدە مۇنايدى شىعارامىز. مۇنايمەن بىرگە شىعاتىن سۋدى «پوپۋتنىي» سۋ دەيدى عوي. ەندى سونى تازارتىپ، تۇشىتۋ كەرەك. سول ءۇشىن وسىنداي ەرەكشە زاۋىتتى سالىپ جاتىرمىز. جوسپار بويىنشا مۇندا 54 ادام جۇمىس ىستەيدى»، - دەيدى قۇرىلىس جۇمىستارىن قاداعالاۋ ينجەنەرى مەيىربەك وتاروۆ.