قوعامدىق سانانى جاڭعىرتۋ ءبىر كۇندىك ءىس- شارا ەمەس - ايدا بالايەۆا
«ءسوز جوق، اقپارات جانە قوعامدىق دامۋ مينيسترلىگى «رۋحاني جاڭعىرۋ» باعدارلاماسى تيىمدىلىگىن ارتتىرۋ باعىتىنداعى جۇمىستاردى ءوز قۇزىرەتى شەگىندە الدا دا جالعاستىراتىن بولادى. دەگەنمەن، بۇل جۇمىس ۇنەمى جەتىلدىرۋدى تالاپ ەتەدى. وسى ورايدا، ۇلتتىق كوميسسيانىڭ قاراۋىنا ۇسىناتىن ءبىرقاتار پروبلەمالىق ماسەلەلەر بار»، - دەدى مينيستر.
وسى رەتتە ايدا بالايەۆا اتالعان پروبلەمالىق ماسەلەلەرگە قىسقاشا توقتالىپ ءوتتى.
«قوعامدىق سانانى جاڭعىرتۋ ءبىر كۇندىك ءىس- شارا ەمەس. قازىرگى جاعداي كورسەتىپ وتىر، ەگەر الەمنىڭ ۇزدىك جەتىستىكتەرىنەن ءۇمىتىمىز بولسا، ءبىز ەڭ الدىمەن سانامىزداعى پايداسىز قاعيدالار مەن قاجەتسىز ادەتتەردەن، ءتىل مەن ءدىلدىڭ قادىرسىزدىگىنەن، تالعامسىز سالت پەن داراقى داستۇرلەردەن دەر كەزىندە ارىلۋىمىز شارت. ول ءۇشىن جوعارىدا باياندالعان جاڭا جوسپاردى باسشىلىققا الا وتىرىپ، ەلدىڭ تۇتاستاي «رۋحاني جاعدايىنا» اۋقىمدى زەرتتەۋ جاساپ، قانداي وڭىرلەردە قانداي ماسەلەلەر بارىن انىقتاپ، سول ايماقتاردا ادرەستى تۇردە جۇمىس جاساۋ قاجەت. بۇل جۇمىستىڭ ناتيجەسى تۋرالى ءوڭىر باسشىلىعىنىڭ ءار جارتى جىل سايىن ۇكىمەت دەڭگەيىندە ەسەپ بەرۋىن ەنگىزۋ كەرەك»، - دەدى ول.
ەسكە سالا كەتەيىك، مەملەكەتتىك حاتشى قىرىمبەك كوشەربايەۆتىڭ توراعالىعىمەن وتكەن كوميسسيا وتىرىسىندا «رۋحاني جاڭعىرۋ» باعدارلاماسىن ودان ءارى تەرەڭدەتىپ ۇلتتىق جاڭعىرۋ كەزەڭىنە وتكىزۋدىڭ ارنايى جول كارتاسىن جاساۋ قاجەت دەگەن شەشىم قابىلداندى. بۇل قۇجات اسا ماڭىزدى ۇلتتىق جوبا رەتىندە جۇرگىزىلەدى. ۇلتتىق جاڭعىرۋ جوباسىنىڭ ەڭ باستى ءمانى - ۇلتتىڭ باسەكەگە قابىلەتتىلىگىن ارتتىرۋ. بۇل - ۇلتتىق جاڭعىرۋدىڭ ستراتەگيالىق ماقساتى بولىپ قالادى. جول كارتاسىندا مەملەكەتتىك ءتىل مارتەبەسىن ارتتىرۋ، ءبىلىم جانە عىلىمدى دامىتۋ، جوعارى ۇلتتىق جانە جالپىادامزاتتىق قۇندىلىقتار نەگىزىندە رۋحاني- ادامگەرشىلىك جانە پاتريوتتىق تاربيە بەرۋ، ەڭبەك ادامىن قالىپتاستىرۋ، اۋىلدى تۇلەتۋ سياقتى ت. ب كەشەندى ءىس- شارالار قامتىلادى. مەملەكەتتىك حاتشى وتىرىستى قورىتىندىلاي كەلە، «رۋحاني جاڭعىرۋ» باعدارلاماسىنىڭ باسىم باعىتتارى بويىنشا جۇمىستى ودان ءارى جانداندىرۋ بويىنشا ناقتى تاپسىرمالار بەردى.