بالايەۆا: قوعام ءۇشىن جاعىمدى جانە تانىمدىق اقپاراتتىق كەڭىستىك قالىپتاستىرۋ قاجەت
«جۇمىستىڭ تيىمدىلىگى، ەڭ الدىمەن، وعان جاسالعان جاعدايعا بايلانىستى. تاجىريبە كورسەتىپ وتىرعانداي، قاي جەردە اكىم «رۋحاني جاڭعىرۋدى» دۇرىس ءتۇسىنىپ، جۇمىستى جەكە باقىلاۋىنا السا، سول وڭىرلەردە باعدارلامانىڭ ناتيجەلىگى دە جوعارى. مىسالى، الماتى، قوستاناي وبلىستارىندا جۇيەلى جۇمىس كورىنىپ تۇرسا، ماڭعىستاۋ، باتىس- قازاقستان سياقتى وڭىرلەردە بۇلاي ايتا المايسىڭ. سوندىقتان دا، وبلىستاردا جاڭادان قۇرىلعان «رۋحاني جاڭعىرۋ» مەملەكەتتىك مەكەمەلەرىن ماتەريالدىق- تەحنيكالىق تۇرعىدان دا، كاسىبي مامان تارتۋ جاعىنان دا تۇراقتى قولداۋى قاجەت» ، - دەدى مينيستر.
ونىڭ اتاپ وتۋىنشە، ەلىمىزدە بولىپ جاتقان سوڭعى وقيعالار الەۋمەتتىك جەلىلەردى قولدانۋ مادەنيەتىن دامىتۋدىڭ وزەكتى ەكەنىن كورسەتتى. «قوعام ءۇشىن جاعىمدى جانە تانىمدىق اقپاراتتىق كەڭىستىك قالىپتاستىرۋ قاجەت. بۇل ورايدا اقپاراتتى جىلدام جەتكىزۋدىڭ ماڭىزى زور. سوندىقتان دا، «رۋحاني جاڭعىرۋ» جوبالارىنا جاۋاپتى بارلىق مەملەكەتتىك ورگاندارعا ءبىرىنشى كەزەكتە ينتەرنەت كەڭىستىگىندە، الەۋمەتتىك جەلى پاراقشالارىندا جۇمىستى كۇشەيتۋ كەرەك»، - دەدى ايدا بالايەۆا.
ەسكە سالا كەتەيىك، مەملەكەتتىك حاتشى قىرىمبەك كوشەربايەۆتىڭ توراعالىعىمەن وتكەن كوميسسيا وتىرىسىندا «رۋحاني جاڭعىرۋ» باعدارلاماسىن ودان ءارى تەرەڭدەتىپ، ۇلتتىق جاڭعىرۋ كەزەڭىنە وتكىزۋدىڭ ارنايى جول كارتاسىن جاساۋ قاجەت دەگەن شەشىم قابىلداندى. بۇل قۇجات اسا ماڭىزدى ۇلتتىق جوبا رەتىندە جۇرگىزىلەدى. ۇلتتىق جاڭعىرۋ جوباسىنىڭ ەڭ باستى ءمانى - ۇلتتىڭ باسەكەگە قابىلەتىن ارتتىرۋ. بۇل - ۇلتتىق جاڭعىرۋدىڭ ستراتەگيالىق ماقساتى بولىپ قالادى. جول كارتاسىندا مەملەكەتتىك ءتىل مارتەبەسىن ارتتىرۋ، ءبىلىم جانە عىلىمدى دامىتۋ، جوعارى ۇلتتىق جانە جالپىادامزاتتىق قۇندىلىقتار نەگىزىندە رۋحاني- ادامگەرشىلىك جانە پاتريوتتىق تاربيە بەرۋ، ەڭبەك ادامىن قالىپتاستىرۋ، اۋىلدى تۇلەتۋ سياقتى كەشەندى ءىس- شارالار قامتىلادى. مەملەكەتتىك حاتشى وتىرىستى قورىتىندىلاي كەلە، «رۋحاني جاڭعىرۋ» باعدارلاماسىنىڭ باسىم باعىتتارى بويىنشا جۇمىستى ودان ءارى جانداندىرۋ بويىنشا ناقتى تاپسىرمالار بەردى.