قازاقستان ارمياسى قانداي درونداردى پايدالانادى

نۇر- سۇلتان. قازاقپارات - قورعانىس مينيسترلىگى جاۋىنگەرلىك ماقساتتا پايدالانىلاتىن ۇشقىشسىز ۇشۋ اپپاراتتارىمەن تانىستىردى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

قازاقستاننىڭ قارۋلى كۇشتەرىندە ۇشقىشسىز اۆياتسيالىق جۇيەلەردى ەنگىزۋ جانە دامىتۋ بويىنشا بەلسەندى جۇمىس جۇرگىزىلىپ جاتىر.

«ۇشقىشسىز ۇشۋ اپپاراتتارىنىڭ پايدا بولۋى اسكەرلەر مەن قارۋ- جاراقتى قولدانۋدا جاڭاشىلىق بولدى. بۇگىندە ولار قارۋلى قاقتىعىستاردا دا، سونداي- اق ءىس- شارالاردىڭ قاۋىپسىزدىگىن قامتاماسىز ەتۋ ءۇشىن دە كەڭىنەن قولدانىلادى. قارۋ- جاراقتىڭ بۇل ءتۇرى قازاقستان اسكەرىندە بەلسەندى تۇردە ەنگىزىلىپ كەلەدى. قارۋلى كۇشتەردىڭ قۇرلىق اسكەرلەرى «SkyLark» تاكتيكالىق وزدىگىنەن ۇشاتىن اپپاراتپەن جابدىقتالعان. ول 10 شارشى شاقىرىم اۋماقتى باقىلاۋعا ارنالعان، بازادان 40 شاقىرىم قاشىقتىقتا بىرنەشە جۇزدەگەن مەتر بيىكتەن جەردەگى ادامداردى كورۋگە جانە سۋرەتتى وپەراتوردىڭ مونيتورىنا بەرۋگە قابىلەتتى.

اسكەري- اۋە كۇشتەرىنىڭ ەسەبىندە «WingLoong» بارلاۋ- سوققى بەرۋ كەشەنى بار. ول اۋە بارلاۋىن جۇرگىزۋ مىندەتتەرىن عانا ورىنداپ قويماي، باسقارىلاتىن زىمىراندار جانە بومبالارمەن جوعارى دالدىكتە سوققى بەرۋگە دە قابىلەتتى»، دەلىنگەن حابارلامادا.

ۆەدومستۆونىڭ مالىمدەۋىنشە، وزدىگىنەن ۇشا الاتىن اپپاراتتار ارنايى ينفروقۇرىلىمدى تالاپ ەتپەيدى. بۇل رەتتە ولار، جاۋىنگەرلىك تيىمدىلىكتى ايتارلىقتاي ارتتىرىپ، اۆياتسيا جۇكتەسىن تومەندەتەدى. ولار ماقساتتى ايقىنداۋعا، ارتيللەريا اتىسىن تۇزەتۋگە، جەردەگى نىساناعا سوققى بەرۋگە، اسا ماڭىزدى نىسانالار مەن ولاردىڭ ەلەمەنتتەرىن جەدەل تەرەڭدىكتە جويۋ ءۇشىن قولدانىلادى.

«كوروناۆيرۋس پاندەمياسىنا بايلانىستى توتەنشە جاعداي كەزىندە قر قارۋلى كۇشتەرىنەن ۇشقىشسىز ۇشۋ اپاراتتارىنىڭ ەسەپتەرى تارتىلدى. ولاردىڭ كومەگىمەن 80-گە جۋىق بۇزۋشىلىق انىقتالدى. اتاپ ايتقاندا كارانتين ايماقتارىنان تىس جەرلەرگە رۇقساتسىز ادامداردىڭ جانە كولىكتەردىڭ شىعۋى انىقتالعان»، دەلىنگەن حابارلامادا.

ۇشقىشسىز ۇشۋ اپپاراتتارىن قامتاماسىز ەتۋ مەن پايدالانۋ بويىنشا مامانداردى اۋە قورعانىسى كۇشتەرىنىڭ اسكەري ينستيتۋتى دايارلايدى. تاراز قالاسىندا ۇشقىشسىز ۇشۋ اپپاراتتارىن دايىنداۋ جانە جاۋىنگەرلىك قولدانۋ ورتالىعى قۇرىلدى. ول جەردە وپەراتورلار بىلىكتىلىگىن ارتتىرىپ، نۇسقاۋشىلاردى وقىتادى. سونداي- اق جىل سايىن وقۋ- ادىستەمەلىك جيىندار دا وتكىزىلەدى.

«قازاقستاندىق اسكەري قىزمەتشىلەر بىلىكتىلىكتەرىن ارميا حالىقارالىق ويىندارى بارىسىندا دا شىڭداي تۇسەدى. قازاقستان جىل سايىن ەلىمىزدە وتكىزىلەتىن «سۇڭقار اڭشىلىعى» ۇشقىشسىز ۇشۋ اپپاراتتارىن ەسەپتەۋ سايىسىنىڭ باستاماشىسى بولدى. 2017 -جىلدان 2019 -جىلعا دەيىن قارۋلى كۇشتەرىنىڭ كومانداسى سايىستا ءبىرىنشى ورىنعا يە بولۋى، بۇل ءبىزدىڭ ەلىمىزدە قارۋ- جاراقتىڭ وسى ءتۇرىن تابىستى قولدانۋ مەن دامۋىن ايقىنداي تۇسەدى»، دەلىنگەن حابارلامادا.