ت م د ەلدەرى كوروناۆيرۋسپەن كۇرەستەگى ىنتىماقتاستىقتى تالقىلادى
ق ر دەنساۋلىق ساقتاۋ ءمينيسترى الەكسەي سوي قاتىسۋشىلارعا كوروناۆيرۋستىڭ ىقتيمال ەكىنشى تولقىنىنا ەلىمىزدىڭ دايىندىق بارىسىن باياندادى، دەپ حابارلايدى قازاقپارات ءتىلشىسى.
«پاندەميانىڭ العاشقى اپتالارىنان باستاپ ەل ۇكىمەتى كۇش-جىگەردى ەكونوميكالىق تۇراقتىلىقتى قامتاماسىز ەتۋ جانە ينفەكتسيانىڭ تارالۋىنا قارسى شارالار ازىرلەۋگە باعىتتادى. ق ر پرەمەر- ءمينيسترىنىڭ توراعالىعىمەن ۆەدومستۆوارالىق كوميسسيا قۇرىلدى، COVID-19 ماسەلەلەرى بويىنشا جەدەل شتاب جۇمىسىن باستادى. سونداي-اق مينيسترلىك جانىنان ەپيدەميولوگيالىق احۋال بويىنشا ساراپشىلاردىڭ رەسپۋبليكالىق شتابى قۇرىلدى»، - دەدى ا. سوي.
مينيستر اتاپ وتكەندەي، از ۋاقىت ىشىندە رەسپۋبليكادا حالىقارالىق ستاندارتتارعا سايكەس كەلەتىن 16 ينفەكتسيالىق كەشەن سالىندى. ايىنا 60 مىڭعا جۋىق ناۋقاستى COVID-19 ينفەكتسياسىنان ەمدەۋگە ارنالعان ءدارى-دارمەكتىڭ ەكى ايلىق قورى قۇرىلدى. قوسىمشا سانيتارلىق كولىكتەر ساتىپ الىندى.
بۇگىندە ەلىمىزدىڭ تۇكپىر-تۇكپىرىنە 100 موبيلدى مەديتسينالىق كەشەن جەتكىزىلدى. وتىرىسقا كەڭەس مۇشەلەرى مەن قازاقستان، ارمەنيا، بەلارۋس، قىرعىزستان، مولدوۆا، رەسەي، تاجىكستان، تۇرىكمەنستان جانە وزبەكستاننان، سونداي-اق د د س ۇ ەۋروپالىق ايماقتىق بيۋروسى، ت م د جانە ەۋرازيا ونكولوگيا جانە رەنتگەنولوگيالىق راديولوگيا ورتالىقتارى مەن ينستيتۋتتارىنىڭ ديرەكتورلارى قاۋىمداستىعى، حالىقارالىق فەدەراتسيا مەن قىزىل كرەست جانە قىزىل جارتى اي قوعامدارى، مۇددەلى ۇيىمدار مەن ۆەدومستۆولاردىڭ وكىلدەرى قاتىستى.
قاتىسۋشىلار كوروناۆيرۋس ينفەكتسياسىمەن كۇرەستە ت م د- عا مۇشە مەملەكەتتەردىڭ ءوزارا بايلانىسىن دامىتۋ، سونداي-اق قانت ديابەتىنىڭ الدىن الۋ جانە ەمدەۋ بويىنشا ت م د ىنتىماقتاستىق باعدارلاماسىن جۇزەگە اسىرۋ ماسەلەلەرىن تالقىلادى.
«وتىرىسقا قاتىسۋشىلار د د س ۇ ەۋروپالىق ايماقتىق بيۋروسىنىڭ قوعامدىق دەنساۋلىق ساقتاۋ جۇيەلەرىنىڭ ۇلتتىق فۋنكتسيونالدىق الەۋەتىن باقىلاۋ جانە مەملەكەتتىك دەڭگەيدە COVID-19 ينفەكتسياسىن الدىن-الۋ شارالارىن مونيتورينگىلەۋ جانە باعالاۋ بويىنشا ۇزدىك تاجىريبەلەردى انىقتاۋ ماقساتىندا ىنتىماقتاستىقتى ودان ءارى دامىتۋ تۋرالى ۇسىنىستى ءبىراۋىزدان ماقۇلدادى.
ت م د مەملەكەتتەرىندە COVID - 19 ەپيدەميولوگيالىق، كلينيكالىق جانە عىلىمي دەرەكتەردى جيناۋ، تالداۋ ماقساتىندا كەڭەسكە 2020-جىلعى 25- جەلتوقسانعا دەيىن ءجىتى رەسپيراتورلىق ينفەكتسيالار مەن تۇماۋمەن سىرقاتتانۋشىلىقتىڭ ماۋسىمدىق كوتەرىلۋى كەزەڭىندە كوروناۆيرۋس ينفەكتسياسىنىڭ ەرەكشەلىكتەرى جانە ت م د- عا قاتىسۋشى مەملەكەتتەردە پوپۋلياتسيالىق يممۋنيتەتتىڭ جاي-كۇيى تۋرالى تالدامالىق اقپارات ۇسىنۋ تاپسىرىلدى. سونىمەن قاتار، كەزدەسۋ قورىتىندىسى بويىنشا ت م د- عا قاتىسۋشى مەملەكەتتەردىڭ قانت ديابەتى ماسەلەلەرى جونىندەگى ساراپشىلار كەڭەسىنە 2016-2020-جىلدارعا ارنالعان قانت ديابەتىنىڭ الدىن الۋ جانە ەمدەۋ جونىندەگى باعدارلامانىڭ ورىندالۋ قورىتىندىلارى تۋرالى اقپاراتتى جانە ستاتيستيكالىق دەرەكتەرگە تالداۋ جاساۋ تاپسىرىلدى»، - دەلىنگەن ق ر دەنساۋلىق ساقتاۋ مينيسترلىگىنىڭ اقپاراتىندا.