«حان شاتىر» ساۋدا ورتالىعىندا كارانتين ءتارتىبىن بۇزۋ فاكتىلەرى انىقتالدى

نۇر- سۇلتان. قازاقپارات - بۇگىن تاۋارلار مەن كورسەتىلگەن قىزمەتتەردىڭ ساپاسىن باقىلاۋ باسقارماسى، جەرگىلىكتى پوليتسيا قىزمەتى جانە ەسىل اۋدانى اكىمدىگىنىڭ وكىلدەرى كەزەكتى رەيدكە شىقتى.

بۇل جولى باقىلاۋشىلار ءىرى ساۋدا ورتالىقتارىن تەكسەردى، دەپ حابارلايدى قازاقپارات.

اكىمدىكتىڭ مالىمەتىنە سەنسەك، 28-قازاندا ءموبيلدى توپ مۇشەلەرى ءۇش ساۋدا ويىن- ساۋىق ورتالىعىن - «ازيا پارك» س و و، «حان شاتىر» س و و، Mega SilkWay س و و جانە ماڭگىلىك ەل داڭعىلى، 17 ۇيدە ورنالاسقان Korkem Centre ساۋدا ءۇيىن تەكسەردى.

«حان شاتىر» س و و- دا بۇزۋشىلىقتار انىقتالدى. اتاپ ايتقاندا، Sterling Silver بيجۋتەريا دۇكەنى مەن Tudors ەرلەر كيىمى دۇكەنىندە ساتۋشى- كەڭەسشىلەر ماسكا تاعۋ رەجيمىن بۇزدى»، - دەپ اتاپ ءوتتى ەسىل اۋدانى اكىمدىگى.

باسقا س ءۇ جانە فيتنەس- ورتالىقتاردا ەسكەرتۋلەر بولعان جوق. سونىمەن قاتار، تەكسەرۋشىلەر زاڭسىزدىقتاردىڭ باسىم بولىگى كەشكى ۋاقىتتا بولاتىنىن اتاپ ءوتتى. كوپتەگەن ويىن- ساۋىق ورىندارى جۇمىس كەستەسىن بۇزادى جانە بەلگىلەنگەن ۋاقىتتان كەيىن اشىلادى.

«نۇر- سۇلتاندا كارانتين باستالعاننان بەرى بۇگىنگى كۇنگە دەيىن 1600 گە جۋىق راپورت پەن 746 حاتتاما جاسالدى. 166 ميلليون اكىمشىلىك ايىپپۇل سالىندى»، - دەپ ءتۇسىندىردى ەسىل اۋدانى تاۋارلار مەن كورسەتىلگەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ارمان قۇربانوۆ.

جاۋاپتى تۇلعالار تاعى دا ساۋدا ورتالىقتارىنىڭ قىزمەتكەرلەرىن، ويىن- ساۋىق ورىندارىنىڭ كەلۋشىلەرى مەن يەلەرىن سانيتارلىق نورمالاردى قاتاڭ ساقتاۋعا شاقىرادى. ولاردىڭ ءارى قاراي جۇمىستى جالعاستىراتىنى نەمەسە توقتاتاتىنى وسىعان بايلانىستى.