ەلوردا تۇرعىندارى اراسىندا ەڭ تانىمال بەس سپورت ءتۇرى

نۇر- سۇلتان. قازاقپارات - ەلوردالىق دەنە شىنىقتىرۋ باسقارماسى استانالىقتار اراسىندا ەڭ تانىمال بەلسەندى بەس سپورت ءتۇرىن اتادى، دەپ حابارلايدى قازاقپارات قالا اكىمدىگىنە سىلتەمە جاساپ.

ەلوردادا بالالار مەن ەرەسەكتەر اراسىندا بۇقارالىق سپورتتى دامىتۋ بويىنشا تۇراقتى جۇمىس جۇرگىزىلۋدە. جاڭا ساياباقتار، الاڭدار اشۋ جانە اۋلالاردى جايلاستىرۋ تەك قالانىڭ سىرتقى كەلبەتىن جاقسارتۋ ءۇشىن عانا ەمەس، سونىمەن قاتار قالالىقتاردىڭ جاقسى ۋاقىت وتكىزۋى ءۇشىن دە جۇزەگە اسىرىلادى. بۇگىندە 340 مىڭنان استام نۇر- سۇلتان تۇرعىنى سپورتپەن بەلسەندى اينالىسادى.

جۇگىرۋ

جۇگىرۋ كەزىندە دەنە وتتەگىمەن قانىعىپ، بارلىق ىشكى اعزالاردىڭ جۇمىسىنا جانە تەرىنىڭ كۇيىنە جاقسى اسەر ەتەدى. جۇگىرۋ جاتتىعۋلارى جۇرەك پەن قان تامىرلارىنا، وكپەگە جانە اۋرۋلاردىڭ الدىن الۋعا پايدالى. تۇرعىندارعا ىڭعايلى بولۋ ءۇشىن ەلوردانىڭ ءار اۋدانىندا ارنايى جابدىقتالعان سوقپاقتى ساياباقتار بار. قازىرگى ۋاقىتتا ەلوردادا 116,4 ك م ۆەلوسيپەد جانە جۇگىرۋ جولدارى بار، ءارى قاراي ينفراقۇرىلىمدى دامىتۋ جۇمىستارى جالعاسادى.

ۆەلوسيپەد تەبۋ

ۆەلوسيپەدپەن ءجۇرۋ ەلوردا تۇرعىندارى اراسىندا جىل ساناپ تانىمال بولىپ كەلەدى. ماماندار ۆەلوسپورتپەن اينالىسۋدىڭ ونداعان پايدالى سەبەپتەرىن اتايدى. بۇل ۇيقىنىڭ جاقسارۋى، قان اينالىمى، توزىمدىلىكتىڭ جوعارىلاۋى، سترەسستىڭ تومەندەۋى جانە ت. ب. قازاقستان استاناسىندا سالاۋاتتى ءومىر سالتىنا جاعىمدى بونۋس - بۇل ادەمى كورىنىستەر مەن جايلى جاعدايلار. ۆەلوسيپەد سۇيەر قاۋىم ونى ترياتلون جانە استانالىق ساياباقتا، بوتانيكالىق باقتا تاماشالاي الادى.

فۋتبول

بۇگىندە فۋتبول الاڭدارى كوپتەگەن اۋلالاردا جابدىقتالعان، بالالار دا، ەرەسەكتەر دە وسى سپورت تۇرىمەن قۋانا اينالىسادى. قالادا 318 فۋتبول الاڭى بار.

Street workout

ستريت ۆوركاۋت قازاقستان استاناسىندا جىلدان جىلعا تانىمال بولىپ كەلەدى. بۇگىنگى كۇنى بۇل ەڭ قولجەتىمدى سپورتتىق ءىس- شارالاردىڭ ءبىرى. اقىر سوڭىندا، ءوزىڭىزدىڭ فورماڭىزدى ساقتاۋ ءۇشىن جاتتىعۋ زالدارىنا، جەكە جاتتىقتىرۋشىمەن جانە ارنايى جابدىقتارمەن ساباقتارعا اقشا جۇمساۋدىڭ قاجەتى جوق. سىزگە تەك ىڭعايلى سپورت كيىمدەرى مەن كروسسوۆكا كەرەك. بۇگىنگى تاڭدا قالادا 23 ستريت ۆوركاۋت الاڭى بار. ارنايى جابدىقتا ءارتۇرلى تريۋك جاساپ، بىرنەشە نەگىزگى بۇلشىقەت توپتارىن: اياق، مويىن، ارقا، قول، ءىش پەن كەۋدە بۇلشىقەتىن شىنىقتىرا الاسىز.

سكانديناۆيا ءجۇرىسى

سكانديناۆيا ءجۇرىسى قالا تۇرعىندارى اراسىندا ەڭ تانىمال سپورت تۇرلەرىنىڭ بەستىگىنە كىرەدى. زەرتتەۋلەرگە سايكەس، بۇل بۇلشىقەتتەردىڭ شامامەن %90 ىنا اسەر ەتىپ، جۇرگىرۋدەن گورى ەكى ەسە كوپ كالوريا جۇمساۋعا كومەكتەسەدى. سوندىقتان ساياباقتاردا جانە قالا كوشەلەرىندە ءسىز ءار ءتۇرلى جاستاعى ادامداردى ارنايى جابدىقپەن ءجيى كەزدەستىرە الاسىز.

«مەملەكەت باسشىسىنىڭ تاپسىرمالارىن، سونداي- اق 2021 -جىلدان باستاپ بالالار مەن جاستار جانە بۇقارالىق سپورتتى دامىتۋدىڭ باسىمدىعىن ەسكەرە وتىرىپ، قاراجاتتى قايتا ءبولۋ جوسپارلانىپ وتىر. بالالاردى دەنە شىنىقتىرۋ مەن سپورتقا تارتۋ ماقساتىندا سپورتتىق ينفراقۇرىلىمنىڭ قالىپتاسقان جاعدايلارىنا سۇيەنە وتىرىپ، بۇقارالىق دەنە شىنىقتىرۋ- ساۋىقتىرۋ جۇمىستارىن اقىسىز نەگىزدە دامىتۋدىڭ كەشەندى باعدارلاماسى جاسالدى»، - دەپ اتاپ ءوتتى باسقارماداعىلار.

باعدارلامادا فۋتبول، شاحمات، ستريت ۆوركاۋت، باسكەتبول، بالالاردىڭ فيتنەس جاتتىعۋى بار. سونداي- اق زەينەتكەرلەرگە ارنالعان جاتتىعۋلار: سكانديناۆيالىق سەرۋەندەۋ، يوگا، شاحمات، دويبى جانە باسقا دا سپورت تۇرلەرى. وسىلايشا، سالاۋاتتى ءومىر سالتىن قالىپتاستىرۋ جانە ازاماتتاردى بۇقارالىق سپورتقا باۋلۋ بويىنشا جۇمىس جالعاسادى.