قازاقستاندا بالالاردىڭ قاۋىپسىزدىگى تۋرالى ينتەرنەت پورتال قۇرىلماق
بۇل تۋرالى ق ر پرەمەر- ءمينيسترى اسقار ءماميننىڭ سەنات دەپۋتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
«ينتەرنەتتى پايدالانۋ مادەنيەتىن ارتتىرۋ، ينتەرنەت- قىزمەتتەردى پايدالانۋشىلاردىڭ جاۋاپكەرشىلىگىن تاربيەلەۋ ماقساتىندا ءبىلىم بەرۋ ۇيىمدارىنىڭ وقۋشىلارى مەن تاربيەلەنۋشىلەرى ءۇشىن (3 ميلليونعا جۋىق وقۋشى، اتا- انالار) «مەن OFFLINE «، «قاۋىپسىز ينتەرنەت» كەڭ اۋقىمدى اقپاراتتىق ناۋقاندار وتكىزىلەدى. 2019 -جىلدان باستاپ ينتەرنەت جەلىسىندە تەرروريستىك جانە ءدىني- ەكسترەميستىك سيپاتتاعى ماتەريالداردى انىقتاۋ، ەسەپكە الۋ، باعالاۋ جانە ولارعا قول جەتكىزۋدى شەكتەۋ جونىندەگى جۇمىسقا تارتىلعان مەملەكەتتىك ورگانداردىڭ ءوزارا ءىس- قيمىلىن وڭتايلاندىرۋعا جانە اۆتوماتتاندىرۋعا باعىتتالعان «كيبەرنادزور» اقپاراتتىق جۇيەسى جۇمىس ىستەيدى»، - دەدى ۇكىمەت باسشىسى.
ونىڭ دەرەگىنشە، وسى جىلدىڭ باسىنان بەرى ينتەرنەت كەڭىستىكتە بالا قۇقىقتارىن بۇزۋمەن بايلانىستى 1756 بۇزۋشىلىق، سۋيتسيدتى، قاتىگەزدىككە تابىنۋدى جانە زورلىق- زومبىلىقتى ناسيحاتتايتىن 553 ماتەريال انىقتالدى. ولاردى ينتەرنەت رەسۋرستاردىڭ مەنشىك يەلەرى مەن اكىمشىلىكتەرى الىپ تاستادى.
«قازىرگى ۋاقىتتا ۋاكىلەتتى ورگاندار ۇيعارىمدار نەگىزىندە زاڭدا تىيىم سالىنعان اقپارات قامتىلعان ينتەرنەت رەسۋرستارعا قول جەتكىزۋدى شەكتەۋ بويىنشا شارالار قابىلداۋدا. بالالار مەن اتا- انالار ءۇشىن Facebook, Instagram الەۋمەتتىك جەلىلەرىندە جاريالانعان «بالالاردى ينتەرنەت جەلىسىندەگى زياندى اقپاراتتان قورعاۋ تۋرالى»، «بالالاردى ينتەرنەتتەگى زياندى اقپاراتتان قورعاۋ جونىندەگى اتا- انالارعا ارنالعان اقپاراتتىق كۋرس» ۇسىنىمدارى ازىرلەندى، سونداي- اق Telegram مەسسەندجەرىندە جەدەل حابارلامالار رەجيمىندە تاۋلىك بويى «BALA QORGAU» چاتى ۇيىمداستىرىلعان. سونىمەن قاتار، بالالار مەن اتا- انالاردىڭ سيفرلىق ساۋاتتىلىعىن ارتتىرۋ ءۇشىن «بالالاردىڭ قاۋىپسىزدىگى تۋرالى» ينتەرنەت پورتالىن قۇرۋ جوسپارلانىپ وتىر»، - دەدى اسقار مامين.
اۆتور: مارلان جيەمباي