پاندەميا بالالاردىڭ سمارتفونعا قۇمارلىعىن ارتتىرىپ، كوز اۋرۋىن كوبەيۋۋىنە سوقتىرۋدا - دەپۋتات

نۇر- سۇلتان. قازاقپارات - ءماجىلىس دەپۋتاتى مۇرات تەمىرجانوۆ بالالار وفتالمولوگياسى سالاسىنداعى كەمشىلىكتەردى كەلتىرىپ، ۇكىمەت باسشىسىنا دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.

«وكىنىشكە قاراي كوروناۆيرۋس پاندەمياسى ءبىزدىڭ بالالارىمىزعا سمارتفوندى، كومپيۋتەرلەر مەن باسقا دا گادجەتتەردى بۇرىنعىدان كوبىرەك قولدانۋىنا يتەرمەلەدى. مۇنىڭ سالدارى كورۋ قابىلەتىن ناشارلاتادى. كوپتەگەن ەلدە بالالاردىڭ كورۋ قابىلەتىنىڭ ازايۋۋى - ۇلتتىق قاۋىپ رەتىندە مويىندالدى. بالالاردى قارايتىن وفتالمولوگتاردىڭ جوقتىعى جاعدايدى ءتىپتى قيىنداتىپ تۇر. ال جەتەكشى وفتالمولوگيالىق ەمحانالار ادامداردى 18 جاستان باستاپ قانا قابىلدايدى»، - دەيدى ول.

دەپۋتات قازىرگى قاشىقتان وقىتۋ كەزىندە دەنە شىنىقتىرۋ ساباعىنىڭ ءوزى ەسسە جازۋ كۇيىندە ءوتىپ جاتقانىن مىسالعا كەلتىردى.

«كوزىن قاراتۋ ءۇشىن اقشا تابا الماي جاتقان ادامدارعا قالاي كومەكتەسەمىز؟ دەنساۋلىق ساقتاۋ مينيسترلىگىنەن العان جاۋاپتان بۇل جاعدايدا مەملەكەتتەن كومەك بولمايتىنىن ۇقتىق. ال الەۋمەتتىك جەلىنى اقتارىپ وتىرىپ، كۇندە- كۇندە كومەك كۇتكەن ناۋقاستاردىڭ سۋرەتىن كورەمىز»، - دەدى ول.

وسى ماسەلەلەردى ايتا كەلە مۇرات تەمىرجانوۆ بىرنەشە ۇسىنىس ءبىلدىردى. «وسىعان بايلانىستى ۇكىمەتتەن بالالار وفتالمولوگياسى سالاسىنداعى جاعدايعا تۇزەتۋ ەنگىزىپ، شۇعىل شارالاردى قابىلداۋدى سۇرايمىز. سونىمەن قاتار ازاماتتاردىڭ دەنساۋلىعىنا ءمان بەرىپ، الەۋمەتتىك جەلىلەرگە كۇندەلىكتى مونيتورينگ جۇرگىزىپ، كومەك بەرىلۋى ءتيىس ناقتى ادامداردىڭ ساناتىن انىقتاۋ كەرەك»، - دەدى ول.

اۆتور: ايان بەكەن ۇلى