ەلوردانىڭ تاۋەلسىزدىك داڭعىلىندا سالىناتىن جاڭا كوپىردىڭ ەسكيزى جاريالاندى

نۇر- سۇلتان. قازاقپارات - تاۋەلسىزدىك داڭعىلىندا جاڭا كوپىر سالىنادى. ول تاۋەلسىزدىك سارايىنان كەرەي، جانىبەك حاندار كوشەسىنە دەيىن جالعاساتىن بولادى. كوپىر نۇر- سۇلتان قالاسىنداعى كولىك قوزعالىسىن ايتارلىقتاي ازايتادى، دەپ حابارلايدى قازاقپارات.

اكىمدىكتىڭ مالىمەتىنشە ، جاڭا كوپىردىڭ ەسكيزدەرىن قالالىق ۋربانيستيكا ورتالىعى ازىرلەگەن. كوپىردىڭ جالپى ۇزىندىعى - 910 م، ەنى - 36 م، شامداردىڭ بيىكتىگى - 5-تەن 16 مەترگە دەيىن جەتەدى. كوپىر شامدارى ماساق تۇرىندە جاسالادى. جوبانىڭ نەگىزگى يدەياسى تىڭ جەرلەردى يگەرۋ تاريحي وقيعاسىمەن بايلانىستى. كوپىردە ورنالاسقان ءتورت باعان ويۋ- ورنەكتەرمەن بەزەندىرىلەدى.

كوپىردە تروتۋار جانە ۆەلوسيپەد جولاقتارى دا قاراستىرىلعان. ول ەلوردانىڭ وڭ جانە سول جاعالاۋىن جالعايدى. بۇل قۇرىلىس «نۇر- سۇلتان- جايلى قالا» ماستەر- جوسپارى اياسىندا جۇرگىزىلۋدە. سونىمەن قاتار، بۇقارالىق سپورتتى دامىتۋ ءۇشىن جاڭا كوپىر استىنداعى قوعامدىق كەڭىستىك قۇرىلادى.

«تاۋەلسىزدىك داڭعىلىنان جالعاساتىن جاڭا كوپىر ەلوردامىزدىڭ تاريحي وتكەنىن بەينەلەيدى. كوپىر سول جانە وڭ جاعالاۋدى جالعاپ، اكىمشىلىك ورتالىقتان جاڭا تەمىرجول ۆوكزالىنا دەيىن جول ءجۇرۋ ۋاقىتىن قىسقارتىپ، جولاۋشىلار اعىنىن جەڭىلدەتەتىنى ماڭىزدى»، - دەپ اتاپ ءوتتى نۇر- سۇلتان قالاسىنىڭ ۋربانيستيكا ورتالىعىنىڭ باسشىسى ەلنار بازىكەن. جاڭا كوپىردىڭ قۇرىلىسى كەلەسى جىلعا جوسپارلانعان.