پەتروپاۆلدا قالا تۇرعىنى ەمحاناعا گراناتا اكەلىپ، دارىگەرلەردى قورقىتتى
سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وقىس وقيعا بۇگىن تاڭەرتەڭ بولدى. 58 جاستاعى پەتروپاۆلدىق 4-قالالىق اۋرۋحاناعا كەلىپ، گراناتامەن مەديتسينالىق قىزمەتكەرلەردى قورقىتقان.
بىردەن پوليتسياعا حابار بەرىلىپ، ەمدەۋ مەكەمەسىنە بارلىق ءتيىستى قىزمەتتەر جۇمىلدىرىلدى. «102 نومىرىنە حابار ساعات 9.10 مينۋت كەتكەندە ءتۇستى. وقيعا ورنىنا بارلىق ماماندار جونەلتىلدى. №4-قالالىق ەمحانا عيماراتىنان بارلىق مەديتسينالىق قىزمەتكەرلەر مەن دارىگەردىڭ قابىلداۋىنا كەلگەن 100 دەن استام ادام قاۋىپسىز جەرگە شىعارىلدى»، - دەيدى س ق و پ د باستىعىنىڭ ورىنباسارى ەڭبەك سەمبين.
گراناتانى جارعىش تەحنيكتەر ارنايى كونتەينەرگە ورنالاستىردى. مامانداردىڭ ايتۋىنشا، ف-1 گراناتاسىندا تۇتاندىرعىشى بولماعان، ياعني جارىلۋى مۇمكىن ەمەس. ەر ادام ۇستالىپ، ءىستىڭ ءمان-جايىن انىقتاۋ ءۇشىن پەتروپاۆل قالالىق پوليتسيا باسقارماسىنىڭ ءبىرىنشى پوليتسيا بولىمىنە جەتكىزىلدى.
بۇل فاكتى ق ر قىلمىستىق كودەكسىنىڭ 287-بابى 3-بولىگى بويىنشا سوتقا دەيىنگى تەرگەپ- تەكسەرۋدىڭ ءبىرىڭعاي تىزىلىمىنە ەنگىزىلدى، ونىڭ اياسىندا ساراپتاما تاعايىندالادى. ۇستالعان ادامنىڭ ايتۋىنشا، ونىڭ مۇنداي قادامعا بارۋىنا مەديتسينالىق مەكەمەنىڭ ساپاسىز قىزمەتى يتەرمەلەگەن. ەر ادام اۋعان سوعىسىنا قاتىسۋشى، پاراليمپيادالىق ويىندارعا قاتىسقان. بۇعان دەيىن س ق و-نىڭ يمانتاۋ اۋىلىندا ءيتىن سەرۋەندەتۋگە شىعارعان تۇرعىننىڭ پاكەتكە سالىنعان گراناتانى تاۋىپ العانىن حابارلاعان بولاتىنبىز.
اۆتور: اقەركە داۋرەنبەك قىزى