پرەزيدەنتكە «سامۇرىق- قازىنانى» ينۆەستيتسيالىق حولدينگكە اينالدىرۋ تۇجىرىمداماسى ۇسىنىلدى
احمەتجان ەسىموۆتىڭ مالىمەتىنشە، ەسەپتىك كەزەڭدەگى تازا تابىس جوسپارلانعان 167 ميلليارد تەڭگەدەن 2,6 ەسەگە اسىپ، 436 ميلليارد تەڭگەگە جەتكەن. بيىل اكسيونەر - ق ر ۇكىمەتىنە 120 ميلليارد تەڭگە ديۆيدەندتەر تولەنىپ، 2017 -جىلعى كورسەتكىشپەن سالىستىرعاندا 10 ەسە ارتىق. سونداي- اق ەنەرگەتيكالىق، مۇناي-گاز، ۋران، تەلەكوممۋنيكاتسيالار، پوشتا جانە باسقا دا سالالارداعى كومپانيالار توبىنىڭ بارلىق كاسىپورىندارىندا ۇزدىكسىز جۇمىس قامتاماسىز ەتىلدى. وندىرىستەگى جۇمىس ورىندارى جاپپاي قىسقارتۋعا ۇشىراماي، پەرسونال تولىق قۇرامدا ساقتالدى، قىزمەتكەرلەرگە ەڭبەكاقى ۋاقىتىلى تولەنىپ وتىر.
«سامۇرىق- قازىنا» باسشىسى قور ساتىپ الۋلار جۇيەسى ارقىلى ەل ەكونوميكاسىن قولداۋعا قاتىستى مەملەكەت باسشىسىنىڭ تاپسىرمالارىن ورىنداۋ جونىندەگى جۇمىستى جالعاستىرىپ جاتقانىن حابارلادى. بيىلعى 9 ايدىڭ قورىتىندىسى بويىنشا قوردىڭ ساتىپ الۋلار جۇيەسىندەگى جەرگىلىكتى ءونىم ۇلەسى %66 قۇرادى. باسەكەلەستىك ورتاعا 819 ميلليارد تەڭگەگە ساتىپ الۋلار شىعارىلعان. بيزنەستىڭ 17000 سۋبەكتىسى قوردىڭ ساتىپ الۋلارىنا قاتىسۋعا مۇمكىندىك الدى.
2020 -جىلدىڭ باسىنان بەرى كومپانيالار توبى 2,4 تريلليون تەڭگەگە وتاندىق بيزنەسپەن شارتتار جاساسىپ، جەرگىلىكتى كاسىپورىندارعا 12 مىڭ تاپسىرىس بەرىلگەن. اتالعان كاسىپورىنداردا 280 مىڭ ادام جۇمىس ىستەيدى. ەسەپ بويىنشا مەملەكەتتىك بيۋدجەتكە 170 ميلليارد تەڭگە كولەمىندە سالىق تولەمدەرى ءتۇسۋى ءتيىس.
سونداي-اق قازاقستان پرەزيدەنتىنە قوردى ينۆەستيتسيالىق حولدينگكە اينالدىرۋ تۇجىرىمداماسى ۇسىنىلدى. باسقارما باسشىسى احمەتجان ەسىموۆ قاسىم-جومارت توقايەۆقا ينۆەستيتسيالىق حولدينگكە اينالدىرۋدىڭ ارتىقشىلىقتارى تۋرالى ايتتى.
ونىڭ سوزىنشە، بۇل پورتفەلدى اكتيۆتەردىڭ گەوگرافيا جانە سالار بويىنشا ءارتاراپتاندىرۋعا، حالىقارالىق ينۆەستيتسيالاردان تۇسەتىن تابىسىن ارتتىرۋعا، ديۆيدەندتەردىڭ ەسەبىنەن بيۋدجەت تۇسىمدەرىن ارتتىرۋعا مۇمكىندىك بەرەدى. مەملەكەت باسشىسىنا جولداۋداعى تاپسىرمالارعا سايكەس، قور اكتيۆتەرىن جەكەشەلەندىرۋ باعدارلاماسى جالعاسا بەرەتىنى تۋرالى حابارلاندى.
بۇل رەتتە، قور مەملەكەتتىك جانە جەكە مەنشىك مۇددەلەر اراسىنداعى تەپە تەڭدىكتى قامتاماسىز ەتۋ ماقساتىندا ءىرى جانە ستراتەگيالىق كومپانيالارداعى ۇلەسىن 51 جانە ودان دا كوپ پايىزىن باقىلاۋدى ساقتاپ قالادى.