كوروناۆيرۋس: سلوۆاكيادا جالپى ۇلتتىق تەستىلەۋ وتەدى، ماجارستاندا رەكوردتىق ءولىم كورسەتكىشى تىركەلدى
سلوۆەنيادا ەل ازاماتتارىنا ون كۇن بويى ءوز اۋداندارى مەن قالالارىنان شىعۋعا تىيىم سالىندى.
COVID-19-عا قاتىستى احۋال شيەلەنىسكەن جاعدايدا ول ۇزارتىلۋى مۇمكىن. سونداي-اق، ەل بيلىگى بارلىق شۇعىل ەمەس مەديتسينالىق كومەك كورسەتۋدى ەكى اپتاعا توقتاتتى. سونىمەن قاتار، سەنبىدەن باستاپ بارلىق مەيرامحانا، سۇلۋلىق سالونى مەن تۇرمىستىق قاجەتتىلىككە جاتپايتىن تاۋارلاردى ساتاتىن دۇكەندەر جابىلىپ، مەكتەپتەر قاشىقتان وقىتۋعا كوشەدى.
چەحيا رەسپۋبليكاسىنىڭ بيلىگى تاعى دا شەتەلدىكتەردىڭ ەلگە كىرۋىن توقتاتىپ، بارلىق ادامنىڭ ەل ىشىندە ەركىن ءجۇرۋىن شەكتەۋ قويدى. بۇل ءبىر اپتا ىشىندە كوروناۆيرۋس جۇقتىرۋدىڭ جاڭا جاعدايلارىنىڭ سانى ەلدە رەكوردتىق دەڭگەيگە، 15 مىڭعا جەتكەننەن كەيىن قابىلدانعان شەشىم بولاتىن. سارسەنبىدەن باستاپ چەحيادا ساعات 9 دان تاڭعى 5 كە دەيىن كومەندانتتىق ساعات ەنگىزىلەدى.
تەك جۇمىس ىستەيتىندەر مەن مەديتسينالىق كومەك كورسەتۋ ءۇشىن ەرەكشە جاعدايلار قاراستىرىلعان.
سلوۆاكيا بيلىگى كوروناۆيرۋسقا جالپىۇلتتىق تەستىلەۋ جۇرگىزىلەتىنىن حابارلادى.
ەلدىڭ بارلىق حالقى، شامامەن 5,5 ميلليونعا جۋىق ادام وسى دەمالىس كۇندەرى تەكسەرىلمەك.
بۇعان دەيىن سلوۆاكيا پرەمەر- ءمينيسترى اۋرۋدى ەڭ كوپ جۇقتىرعان اۋدانداردا الدىن-الا تەستىلەۋ ءساتتى وتكەنىن مالىمدەدى.
سونداي-اق، ماجارستاندا ءولىم كورسەتكىشىنىڭ جاڭا رەكوردى تىركەلدى. سەيسەنبى كۇنگى تاڭەرتەڭگى جاعداي بويىنشا ءبىر تاۋلىكتە 63 ادام كوروناۆيرۋستان كوز جۇمعان.
ولاردىڭ باسىم كوپشىلىگى ەگدە جاستاعى ادامدار مەن سوزىلمالى اۋرۋلارى بار پاتسيەنتتەر.
وسىلايشا كوروناۆيرۋستان بولعان ءولىم كورسەتكىشىنىڭ سانى 1535 ادامعا جەتتى. ەلدە جالپى COVID-19 جۇقتىرۋدىڭ 63 مىڭنان استام جاعدايى تىركەلگەن.