د د س ۇ كوروناۆيرۋس جۇقتىرۋدىڭ رەكوردتىق ءوسىمىن تىركەدى

جەنەۆا. قازاقپارات - وتكەن اپتادا الەم بويىنشا كوروناۆيرۋسقا شالدىعۋشىلاردىڭ رەكوردتىق سانى تىركەلدى.

بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ ەپيدەميولوگيالىق بيۋللەتەنىندە جاريالاندى، دەپ حابارلايدى قازاقپارات.

19-25 قازان ارالىعىندا 2,8 ميلليون COVID-19 انىقتالعان.

بۇل - پاندەميا باستالعالى ەڭ جوعارى كورسەتكىش. ءبىر اپتا ىشىندە كوروناۆيرۋستان 40 مىڭعا جۋىق ادام كوز جۇمعان.

د د س ۇ مالىمەتتەرى بويىنشا، اۋرۋ، اسىرەسە، ەۋروپا وڭىرىندە جىلدام تاراۋدا.

COVID-19 جۇقتىرۋدىڭ جاڭا جاعدايلارىنىڭ جارتىسى اتالعان ايماقتان تىركەلگەن.

ءبىر اپتا ىشىندە ەۋروپادا 1,3 ميلليوننان استام ادام كوروناۆيرۋسقا شالدىققان. بۇل - الدىڭعى اپتاداعى كورسەتكىشتەن %33 - عا كوپ.

كوروناۆيرۋس جۇقتىرۋدىڭ اپتالىق ءوسىمى بويىنشا العاشقى بەستىكتەگى ەلدەر:

فرانتسيادا — 217,7 مىڭ ادام اۋرۋ جۇقتىرعان؛

ۇلىبريتانيادا — 148,5 مىڭ؛

رەسەيدە — 114,5 مىڭ؛

يتاليادا — 101,9 مىڭ؛

بەلگيادا — 90,8 مىڭ.