نىعماتۋلين ەكولوگيا مينيسترىنە: اۋىلعا بارىپ كەلىڭىز...

نۇر-سۇلتان. قازاقپارات - پارلامەنت ءماجىلىسىنىڭ ءتوراعاسى نۇرلان نىعماتۋلين ەكولوگيالىق كودەكستىڭ جوباسىن قاتاڭ سىنعا الدى، دەپ حابارلايدى قازاقپارات ءتىلشىسى.

ايتا كەتسەك، پارلامەنت ءماجىلىسىنىڭ وتىرىسىندا ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ەكولوگيالىق كودەكستىڭ جوباسىن قورعاعان بولاتىن.

زاڭ جوباسى بويىنشا پارلامەت ءماجىلىسىنىڭ ءتوراعاسى نۇرلان نىعماتۋلين پىكىرىن ءبىلدىردى.

«زاڭ جوباسىن قاراساق بىلاي: ماسەلەن قاراعاندى وبلىسىنىڭ ۇلىتاۋ اۋدانىنىڭ تۇرعىنىنىڭ 5-10 تاۋىعى بار دەلىك. ونى دەكلاراتسيالاۋ ءۇشىن ول وبلىستىق تابيعي رەسۋرستار باسقارماسىنا بارۋى كەرەك. ال ول وبلىس ورتالىعىندا ورنالاسقان. ياعني، ول ءتىپتى 5 ەمەس، ءتىپتى 1 تاۋىعىن دەكلاراتسيالاۋ ءۇشىن 700 شاقىرىمدى ءجۇرۋى كەرەك. كودەكستە وسىلاي جازىلعان. نەلىكتەن ولاي؟ ءسىز كودەكستە (ماعزۇم مىرزاعاليەۆكە قاراتا) «100 جانە ودان تومەن باس ءۇشىن» دەپ جازاسىز. وعان، ياعني، مال بولسىن، قۇس بولسىن كىرەدى. ول سانعا 99 مالدى دا، 1 مالدى دا كىرگىزۋگە بولادى. البەتتە ءبىر تابىننىڭ ءبىر تاۋىققا قاراعاندا ەكولوگياعا تيگىزەتىن اسەرى مول ەكەنىن الدىمەن ءتۇسىنىپ الۋ كەرەك. بۇل نورمانى جازعان كەزدە ويلانۋ كەرەك بولاتىن»، - دەدى نۇرلان نىعماتۋلين.

ءماجىلىس ءتوراعاسى زاڭ جوباسىن وسىنداي نورمالارىن وقىعان كەزدە «بۇل نورمانى جازعان ادام اۋىلدا بولدى ما؟» دەگەن سۇراق تۋىندايتىنىن ايتىپ ءوتتى.

«بولماعان شىعار. شىركىن، وسى نورمانى جازعان ادامدى 2-3-ايعا اۋىلعا جىبەرسە عوي. سوندا عانا ول ادام تاۋىق پەن سيىردىڭ ايىرماشىلىعىن تۇسىنەتىن ەدى. قالاي ويلايسىز، مينيستر مىرزا؟ كودەكستى قابىلداعاننان كەيىن اۋىلعا بارىپ كەلىڭىز»، - دەگەن نۇرلان نىعماتۋلين ەكىنشى وقىلىمدا وسى ولقىلىقتاردى رەتكە كەلتىرۋدى تاپسىردى.