ەلوردا تۇرعىنى تىكەلەي ەفيردە وزىنە قول جۇمساماق بولدى

None
None
نۇر- سۇلتان. قازاقپارات - ەلوردانىڭ پوليتسيا قىزمەتكەرلەرى الەۋمەتتىك جەلىنىڭ تىكەلەي ەفيرىندە سۋيتسيد جاساماق بولعان ازاماتتىڭ ءومىرىن امان الىپ قالدى، دەپ حابارلايدى قازاقپارات ءتىلشىسى.

نۇر- سۇلتان قالالىق پوليتسيا دەپارتامەنتىنىڭ مالىمەتىنشە، 25-قازان كۇنى شامامەن 22:00 دە Facebook الەۋمەتتىك جەلىسىن قولدانۋشىلاردىڭ ءبىرى بەلگىسىز ەر ادامنىڭ تىكەلەي ەفيردە كوپىردەن سەكىرەيىن دەپ تۇرعانىن حابارلايدى. وسىدان كەيىن تەز ارادا جۇمىسقا كىرىسكەن بەينەباقىلاۋ وپەراتورلار سۋيتسيد جاساماق بولعان ادامنىڭ سارايشىق كوپىرىندە تۇرعانىن انىقتاپ، وقيعا ورنىنا پاترۋلدىك پوليتسيا ەكيپاجىن جىبەرەدى.

«پوليتسيا قىزمەتكەرلەرى كۇيزەلىستى جاعدايدا ءارى كوپىر تايانىشىنان تومەن قاراي سەكىرۋگە دايىن تۇرعان ازاماتتى تاپتى. پوليتسيا قىزمەتكەرلەرىمەن سويلەسۋ بارىسىندا ول تاعدىرىنا نالىپ، ايەلىمەن اجىراسقانىن، بالالارىن ساعىنعانىن ايتىپ مۇڭىن شاقتى. قىزمەتكەر ازاماتپەن سويلەسۋىن جالعاستىرا وتىرىپ، ونى سەكىرمەۋگە كوندىرۋگە تىرىستى. پوليتسيا قىزمەتكەرى وعان جاقىن كەلگەن ساتتە قاپسىرا قۇشاقتاپ الىپ، قاۋىپسىز جەرگە الىپ شىقتى. ومىرمەن قوش ايتىسپاق بولعان 34 جاستاعى ەلوردا تۇرعىنى ءمان- جايدى انىقتاۋ ءۇشىن ەسىل اۋداندىق پوليتسيا باسقارماسىنا جەتكىزىلدى»، - دەپ اتاپ وتەدى دەپارتامەنتتەن.

ازاماتتىڭ پسيحوەموتسيالىق جاعدايىن تۇراقتاندىرۋ ءۇشىن پسيحولوگتار جۇمىس ىستەدى. كۇيزەلىس كەزىندە كاسىبي پسيحولوگيالىق كومەك كورسەتىلگەن.




سوڭعى جاڭالىقتار