سوڭعى اپتالاردا بالالار اراسىندا كوروناۆيرۋس جۇقتىرۋ جاعدايلارىنىڭ سانى ارتتى

نۇر- سۇلتان. قازاقپارات - سوڭعى اپتالاردا بالالار اراسىندا كوروناۆيرۋس جۇقتىرۋ جاعدايلارىنىڭ سانى ارتتى. بۇل تۋرالى «پەدياتريا جانە بالالار حيرۋرگياسى عىلىمي ورتالىعى» ا ق باسقارما ءتوراعاسى ريزا بورانبايەۆا ايتىپ بەردى، دەپ حابارلايدى قازاقپارات ءتىلشىسى.

«ءساۋىر ايىنىڭ باسىنان بەرى 2940 بالا اۋىرىپ قالدى. بۇل - 2 - ساۋىردەن باستالاتىن مالىمەتتەر. ال قازىرگى ۋاقىتتا كوروناۆيرۋس ينفەكتسياسى دياگنوزىمەن 275 بالا تىركەلدى. ونىڭ 41 ءى اۋرۋحاناعا جاتقىزىلدى. قالعانى ۇيدە ەمدەلىپ جاتىر. سوڭعى اپتالاردا بالالاردا كوروناۆيرۋس اۋرۋىنىڭ ءوسۋى بايقالادى»، - دەدى ريزا بورانبايەۆا «قازاقپارات» تىلشىسىنە بەرگەن سۇحباتىندا.

ونىڭ پىكىرىنشە، اۋرۋ سانىنىڭ ءوسۋىن كەزەكشى سىنىپتارمەن بايلانىستىرۋعا بولمايدى.

«سەبەبى، ناۋقاس 275 بالانىڭ 182 ءسى - مەكتەپ وقۋشىسى بولسا، 15 ءى - بالاباقشاعا بارعان بالالار. ونىڭ ىشىندە 62 بالا كەزەكشى سىنىپتاردا وقىدى، سايكەسىنشە 120 بالا قاشىقتان وقىعان. ياعني، كەزەكشى سىنىپتاردا وقيتىن بالالار عانا ەمەس، قاشىقتان وقيتىن بالالار دا اۋىرىپ جاتىر. سونىمەن بىرگە، ولاردىڭ اراسىندا مەكتەپ جاسىنا جەتپەگەن بالالار دا بار»، - دەپ ءتۇسىندىردى دارىگەر.

سونداي- اق، دارىگەر بالالاردىڭ كوروناۆيرۋس ينفەكتسياسىنىڭ اۋىر فورماسىمەن ەرەسەكتەرگە قاراعاندا سيرەك اۋىراتىنىن ەسكە سالدى.

«بالالار اراسىنداعى اۋرۋدىڭ ءوز ەرەكشەلىكتەرى بولادى، كوپ جاعدايدا بالالار سيمپتومسىز نەمەسە جەڭىل تۇردە اۋىرادى. ماسەلەن، قازىر بالالاردىڭ %86 سيمپتومسىز نەمەسە جەڭىل فورمادا اۋىرىپ جاتىر. اۋىر سىرقات تۇرلەرى بالالاردىڭ جاسىندا وتە سيرەك - وعان نەگىزىنەن سوزىلمالى پاتولوگياسى بار بالالار عانا شالدىعادى»، - دەپ قورىتىندىلادى ريزا بورانبايەۆا.